Elder Marcos A. Aidukaitis
Ena Vitusagavulu
Ena gauna se yabaki walu tiko kina na ulumatua tagane nei Elder Marcos Antony Aidukaitis, a droinitaka o koya na nodratou matavuvale me ivakaraitaki ni cakacaka ni vuli. Ena gauna o ya a cakacaka sara tiko vakaukauwa o Elder Aidukaitis vaka-manidia levu ni dua na kabani e São Paulo e Brazil. “Sa levu sara na gauna ni noqu cakacaka kau dau veilakoyaki ki na veivanua e vuravura,” e nanuma lesu.
E kilai levu sara ga na nona yali mai o Elder Aidukaitis ena ivakaraitaki ni droini nei luvena. “Evei o tamamu?” a tarogi gonetagane o qasenivuli. “O koya e cakacaka,” a sauma yani.
Kivei Elder Aidukaitis, na ka o ya sa kaci ni veivakayadrati sara ga vua. “Au sa veisautaka na noqu cakacaka ka vakavinakataka na veika me vakavinakataki,” a kaya, ni sa vaka oya na nona sasaga me sa vakaliuci na nona matavuvale.
A sucu o Elder Aidukaitis kivei Antony Aidukaitis kei Maria Dittrich Aidukaitis ena ika 30 ni Okosita, 1959, e Porto Alegre, Brazil. O tamana, a papitaiso ena 1940, ka isevu ni lewe ni Lotu ena nodratou matavuvale, ka vakakina o Luisa Englert Aidukaitis, na wati Elder Aidukaitis. Erau a vakamau o Elder kei Sisita Aidukaitis ena ika 13 ni Janueri, 1986, ni bera toka ni oti e dua na vula mai na siga a papitaisotaki koya kina. Erau a vauci ena Valetabu e Provo Utah ena yabaki ka tarava. Erau itubutubu ni lima na gone.
E kaya o Elder Aidukaitis, ka a veiqaravi ena Tabana ni Kaulotu ni Ceva kei Brazil São Paulo mai na 1979 ki na 1981, ni nona kaulotu o ya a veisautaki kina na nona bula. E vakatorocaketaka kina na nona lomana na iVakabula, vakarautaki koya me qarava na nona matavuvale kei na Tamana Vakalomalagi, ka kaya kina o koya, “e soli vei au e dua na yaloqaqa meu vakavulica ka papitaisotaki watiqu.”
Ni oti na nona kaulotu, a taura kina o koya na nona diqiri ni idinia vakamekenikali kei na MBA, mai na Brigham Young Univesiti, ka lewena kina na kena timi ni soka. Ni qeretueti oti a laki cakacaka sara vaka-iliuliu ki na veikabani vakaveimatanitu, e liu ki Amerika ka tarava sara e Brazil, ka yaco me sa tauyavutaka ga na nona bisinisi.
Ni bera ni kacivi ki na iMatai ni Kuoramu ni Vitusagavulu, a veiqaravi taumada o Elder Aidukaitis vaka-peresitedi ni Tabana ni Kaulotu e Brazil Brasilia, Vitusagavulu ni iWasewase, peresitedi ni iteki, mata ni welefea ni iwasewase, ka lewe ni matabose e cake.