Kauwai me baleta na Tamata e Dua O ya
Ko Jisu Karisito sa noda ivakaraitaki cecere duadua. Era a vakavolivoliti koya na lewevuqa ka vosa vei ira na udolu vakaudolu na tamata, ia e dau kauwai tikoga o Koya ki na tamata e dua o ya.
Au sa vakavinavinaka ki na gauna oqo meu mai tiko vata kei kemuni nikua ena Vale ni Koniferedi totoka oqo. Na kena levu me vaka ga na lewe ni ivavakoso oqo, ena yalo e lokomi kau kila ni dua ga na iwiliwili lailai ni milioni era na sarava, rogoca, ka wilika na veivosa ena cauraki tiko ena koniferedi cecere oqo.
Sa dina sara, eda na daudivi noda Peresitedi daulomani o Gordon B. Hinckley. Eda sa tamata vinaka cake, ia, ena vuku ni nona veivakauqeti. Sa mai kaukauwa sara na Lotu ena vuku ni nona veidusimaki. Sa dina, ni sa vanua vinaka cake na vuravura baleta ni a tiko kina e dua na iliuliu me vakataki Peresitedi Gordon B. Hinckley.
Au gadreva meu vosa vakalekaleka me baleti iratou na noda Mataveiliutaki Taumada vou.
Sa balavu sara na gauna na noqu kilai Peresitedi Monson tu mai. O koya e dua na turaga qaqa kei Isireli ka sa tabaki taumada me mai vakatulewa ena Lotu oqo. E kilai o koya ena nona italanoa kei na vosa vakaibalebale e dau veivakauqeti ia kivei keda eda kilai koya vakavinaka sara ni nona bula sa yaco tiko ka ivakaraitaki sara tikoga ena italanoa kece oqori. Me vaka ga ni sa vakavinavinakataki kina o koya ni vuqa vei ira na tamata rogo ka qaqa ni vuravura oqo era kila ka dokai koya, ka rairai ni kena e dau nanumi kina vakalevu o ya ni vuqa vei ira na tamata yalomalua era kacivi koya itokani.
Na kena roka dina, o Peresitedi Monson e tamata vinaka ka dau yalololoma. Na nona vosa kei na nona cakacaka e vakaraitaka tiko na nona kauwai me baleta na tamata e dua o ya.
E turaga vuku, vuli, ka bula vakalou o Peresitedi Eyring. E sega walega ni kilai ka dokai ena loma ni Lotu o koya ia kivei ira talega era sega ni da lotu vata. O koya e dua na tamata, ni dau vosa, era na vakarorogo na tamata kecega. Sa mai kuria na kena vaqaqacotaki na yaca Eyring.
Au a kilai Peresitedi Uchtdorf ena gauna au a Peresitedi ni iWasewase tiko kina e Iurope. Mai na gauna au a sotavi koya kina, au raica vua ni sa dua na tamata sa buta vinaka tu ena veika vakayalo ka gugumatua dina. Au kila ni sa wanonovi koya matua tiko na Turaga. Ena ruasagavulu-katolu na yabaki sa oti, e a ka dokai vei au meu solia vua na veikacivi ni Turaga me veiqaravi vaka-peresitedi ni iteki e Frankfurt, Jamani. Niu vakaraica voli mai na veiyabaki oqori, au raica rawa ni veika kece e veidusimaki kina e rawati kece sara. Sa tiko vata kei koya na Turaga. Niu dau vakasamataki Peresitedi Uchtdorf, e rua na vosa au dau vakasamataka: Alles wohl—o ya na kena vaka Jamani “Daumaka na ka kece.“
O ira na tisaipeli dina i Jisu Karisito era na dau kauwai me baleta na tamata e dua o ya. Ko Jisu Karisito sa noda ivakaraitaki cecere duadua. Era a vakavolivoliti koya na lewevuqa ka vosa vei ira na udolu vakaudolu na tamata, ia e dau kauwai tikoga o Koya me baleta na tamata e dua o ya. “Ni sa lako mai na Luve ni tamata me vakabulai koya sa yali,”1 E kaya o Koya. “Ko cei vei kemudou na tamata, sa dua na drau na nona sipi, kevaka sa vakayalia e dua vei ira, ena sega beka ni biuta laivi tu na ciwasagavulu ka ciwa ena veico, ka laki vakasaqarai koya sa yali, me kunea mada?”2
Na veivakasalataki oqo sa baleti ira kece era muri Koya. Eda sa vakaroti me da laki vakasaqarai ira era sa yali tu. Sai keda me da sa nodra ivakatawa na tacida. Sa sega ni rawa me da vakawalena na itavi oqo sa lesi keda kina na noda iVakabula. E dodonu me da kauwai tiko me baleta na tamata e dua o ya.
Edaidai au na vosa tiko me baleti ira era sa yali tu—eso e baleta ni ra sa duatani, eso e baleta ni ra sa oca, ka so e baleta ni ra sa lako sese.
Eso era sa yali baleta ni ra sa duatani. Era nanuma ni ra sa sega ni wili. E rairai beka ni ra sa duatani, era sa vakila ni ra sa gole tani vakamalua mai na ivavakoso. Ena duatani beka na kedra irairai, ivalavala, nanuma, kei na ivosavosa mai vei ira era vakavolivoli ira ka so na gauna ena vakavuna me ra nanuma ni ra sa sega ni kilikili e kea. Era sa qai vakadeitaka ni ra sa sega ni gadrevi.
E semati tiko ki na yavu cala oqo na nanuma cala ni o ira kece na lewe ni Lotu me tautauvata na kedra irairai, ivosavosa, kei na ituvaki. Na Turaga e a sega ni vakatawai vuravura ena veitovo sa uasivi me baleta walega na kena mai vakaituvakitaki na veika lolovira kei vuravura. Na veiyaya yadua sa iyau talei ka kuria na irogorogo vinaka ni ivakatagi. O ira kece na luvena na Tamada Vakalomalagi era duidui ena so na kedra ivakatagedegede, ia ko ira yadua e vakatagitaka e dua na irorogo totoka e kuria na kena titobu kei na kena vutuniyau e taucoko.
Na isaluwaki ni ibulibuli oqo sa dua na ivakadinadina ni Nona vakamareqeti ira na Luvena na Turaga. E sega ni vakalevulevuya o Koya e dua mai vua tale e dua, ia e “a sa kacivi ira kecega me ra lako mai vua ka vakaivotavota ena nona loloma, ka sa sega ni bureitaka vua e dua sa lako mai vua; io na tamata loaloa kei na tamata vulavula, na bobula kei na i taukei, tagane kei na yalewa: … era sa tautauvata kecega ena mata ni Kalou.”3
Au nanuma na gauna au se gone kina, e dua na gonetagane qasecake e a vakaleqai tu na yagona kei na nona vakasama. E sega tu ni vosa vakavinaka ka dau dredre ni lako. Era dau vakasagai koya na gonetagane. Era a vakalialia ka vosacataki koya ka so na gauna e dau tagi sara ga kina.
Au se rawa ni rogoca tikoga oqo na domona: “O kemudou dau cati au,” a kaya o koya. Ia era se tomana tikoga na nodra vakalialiai koya, biligi koya ka dredrevaki koya.
Ena dua na siga au sa sega tale ni qai vosota rawa. E dina ga niu se qai yabaki vitu, a solia vei au na Turaga na kaukauwa meu vorati ira na noqu itokani o ya.
“Kakua ni tarai koya,” au a kaya vei ira. “Dou kakua ni vakasagai koya. Dou lomana. E luve ni Kalou o koya!”
Era a toso e muri na noqu itokani ka ra gole yani.
Au a vakasamataka ena gauna o ya se sa na vakacacana beka na noqu veimaliwai kei ira. Ia a yaco na kena veibasai. Vakatekivu mai na siga o ya ka lako yani, keimami sa laki duavata sara kei ira na noqu itokani. Era sa laki vakaraitaka e dua na loloma vua na cauravou o ya. Era sa yaco me ra tamata vinaka cake. Au kila ga, ni ra sa sega tale ni vakasagai koya.
Kemuni na taciqu kei na ganequ, kevaka walega me da lomani ira cake vakalevu o ira era duatani mai vei keda ena yaco me mamada sara na leqaleqa kei na rarawa ena vuravura nikua. Ena yaco vakaidina me na dua na itikotiko tabu ka vakalomalagi na noda veimatavuvale kei na Lotu.
Eso era sa yali baleta ni ra sa oca. E rawarawa tu ga na noda rawai. Mai na lomaocaoca kei na veioga kecega eda sotava ena noda gauna kei na nuiqawaqawa ni veisiga, sa sega ni kurabuitaki ni da na oca ga. E vuqa era yalolailai baleta ni ra sega ni yacova na ka me ra rawata rawa. Eso era nanuma ga ni ra sa malumalumu me ra veiqaravi yani. O koya gona, ni sa toso ki liu na qele ni sipi, vakamalua ga, ka sa sega ni tarovi rawa, eso era sa lutu ki muri.
Na tamata yadua ena dau oca ka malumalumu mai ena so na gauna. Au sa vakila ni sa yaco mai vakalevu oqo vei au ni vakatauvatani niu se gone. O Josefa Simici, Brigham Young, ka vakakina o Jisu Karisito eratou kila na cava na ibalebale ni oca. Au sega ni gadreva meu were ubia na icolacola bibi era colata tu e tabadra na lewe ni Lotu, ka sega niu via vakalailaitaka na veivakatovolei vakayalo kei na rarawa era sotava tiko. Oqo ena rawa ni bibi ka wasoma ni dau dredre me taqei rawa.
Ia, e sa tiko, e dua na noqu ivakadinadina ni kaukauwa ni veivakavoui ni kosipeli i Jisu Karisito. E a vakaraitaka o Aisea na parofita ni Turaga,“sa dau solia na kaukauwa vei ira sa malumalumu; ia ena vakalevutaka o koya na kaukauwa vei ira era sa sega ni gumatua rawa.”4 Ena gauna au dau oca kina, au dau nanuma na vosa nei Josefa Simici na Parofita:
“Dou gumatua sara me da vakuria tikoga na inaki uasivi oqo? Raica me da cavuikalawa tikoga ki liu, ka kakua ni suka ki muri. Oi kemudou na wekaqu, dou yaloqaqa ka ia tikoga mo dou rawata na qaqa! Mo dou reki ka marau vakalevu. Dou lagata mai na sere na kai vuravura… .
“… Dou vakacaucautaka na Turaga oi kemudou na veikau ni lekutu kei na veikau kecega ni vanua … io dou kaila ena reki oi kemudou kecega na luve ni Kalou!”5
Kivei kemuni na lewe ni Lotu ko ni sa luluqa ena vuku ni rarawa ni yalomuni, au sa vakamasuti kemuni mo ni kalawa mai ki liu, ni vakataqara ki tabamuni na qiqi, ka bili yani. Ena gauna mada ga ko ni kila ni nomuni kaukauwa ena veivuke vakalailai, na Lotu e gadrevi kemuni. E gadrevi kemuni na Turaga. Mo ni nanuma tiko ni Turaga e dau digitaka “na veika malumalumu ni vuravura oqo” me vakayacora rawa kina na Nona inaki.6
Kivei kemuni kece sa oca, me na vakacegui kemuni na vosa oqo ni iVakabula: “Dou lako mai vei au, koi kemudou vakaaduaga sa oca ka colata na icolacola bibi, ia kau na vakacegui kemudou.”7 Me da sa vakararavi ga ena yalayala o ya. Na kaukauwa ni Kalou ena rawa me vakasinaita na yagoda kei na yaloda ena kaukauwa kei na qaqa. Au sa masuti kemuni mo ni vakasaqara na veivakalougatataki oqo mai vua na Turaga.
Ni toro voleka yani Vua, ka na qai toro voleka mai o Koya, ni sa yalataka tu ni, “ko ira era sa waraki Jiova era na vakaukauwataki tale; era na cabe cake me vaka era vakatabana vakaikeli; era na cici, ka sega ni oca, era na lako tu, ka sega ni malumalumu.”8
Ni da vakaraitaka na noda kauwaitaki ira era sa oca, eda sa “vukei ira era sa malumalumu, vakaukauwataka na liga sa wadamele, kei na duru sa malumalumu.”9 O ira na iliuliu ni Lotu dau veikauwaitaki era kila tu na iyalayala ni nodra rawa ka na tamata yadua, ia era sa dau vakauqeti me ra vakayagataki ira na lewenilotu ena ituvaki ni nodra kaukauwa kei na rawa ka. O ira na iliuliu era veivakavulici ka veitokoni ia era sega ni veivakavorakitaki me ra “cici vakatotolo se cakacaka vakasivia” ke sega ni veiraurau kei na kaukauwa e tiko.10
Me nanumi tiko, ena so na gauna era na laki gugumatua sara o ira era a tekivu vakamalua yani.
Eso era sa yali baleta ni ra sa lako sese. Vakavo ga na Turaga, eda sa caka cala kece sara. Na taro e tiko e sega ni baleta na noda rawa ni tacaqe ka lutu ia, na cava eda na cakava kina? Eso ni ra caka cala, era sa lako tani mai na ivavakoso. E ka rarawa sara oqo. O ni kila tiko li ni Lotu sai koya na vanua era mai soqoni vata kina na tamata caka cala—vata kei na na nodra ivalavala ca kece ni bula oqo—ka na yaco me ra na vinaka cake kina? Ena vei-Sigatabu ena veivalenilotu yadua e vuravura taucoko, eda raici ira kina era sega ni taucoko tu vakayago, tagane, yalewa, kei ira na gone era soqoni vata ena yaloduavata kei na loloma ni ra saga me ra tamata vinaka cake, vuli mai vua na Yalotabu, ka ra veivakayaloqaqataki ka veitokoni kivei ira na tani. Au kila ni sega ni dua na ivakatakilakila ena noda katuba ni valenilotu e tukuna tiko, “E Vakatarai me Curu Eke: Vei Ira Ga Na Tamata Dodonu.”
Me baleta na noda malumalumu, eda sa gadreva kina na Lotu ni Turaga. E kea e vakavulici kina na Nona vunau ni veivakabulai ka qaravi kina na cakacakatabu vakalotu. Na Lotu e vakayaloqaqataka ka vakauqeti keda me da tamata vinaka cake ka mamarau. Sa dua talega na vanua eda na laki soli bula kina me da qaravi ira na tani.
Sa kila tu na Turaga ni da na caka cala. Oqori na vuna a vakararawataki ena vuku ni noda ivalavala ca. E gadreva o koya me da bula rawati keda ka gugumatua me da vinaka cake. E dau kune na marau ena matadra na agilosi ni Kalou, ena vuku ni tamata ivalavala ca e le duabau ga sa qai veivutuni.
Kivei kemuni ko ni sa lako sese baleta ni ko ni a vakacudrui, e rawa beka mo ni biuta vakatikitiki na rarawa ni yalomuni kei na cudru? E rawa beka mo ni vakasinaita na yalomuni ena loloma? Sa tiko oqo e dua na nomuni tikina. Gole mai, mai lewena na ivavakoso mai vakatabuya na nomuni rawa ka, taledi, kei na kila ka. Ko ni na vinaka cake kina ka ra na vakalougatataki kina o ira na tani ena nomuni ivakaraitaki.
Kivei ira era sa lako sese baleta na kauwai ena ivakavuvuli vakalotu, keimami na sega ni kere veivosoti ena vuku ni ka dina. Keimami na sega ni cakitaka rawa na ivakavuvuli vakalotu e a solia sara ga mai Vakaikoya na Turaga. Ena ivakavuvuli oqo sa sega ni rawa me keimami vakatanitaka.
Au kila ni ena so na gauna era sega ni duavata na tamata ena ivakavuvuli vakalotu. Era na laki kaya sara ni sa ka lialia. Ia meu voqataka mada na vosa nei Paula na iApositolo ka kaya ni ena so na gauna ni veika vakayalo ena rairai ka lialia vei ira na tamata. Ia “sa kaukauwa na malumalumu ni Kalou me uasivi vei ira na tamata.”11
Ena ka dina, na veika ni Yalotabu ena vakatakilaitaki mai vua na Yalotabu. “Ia na tamata sa vakayago sa sega ni vakabauta na veika ni Yalo ni Kalou: ni sa ka lialia vua, a sa sega ni kila rawa ko koya, ni ra sa kilai vakayalo ga.”12
Eda sa vakadinadinataka ni kosipeli i Jisu Karisito sa tu edaidai e vuravura. E vakavulica o Koya na vunau nei Tamana, “Kevaka e dua na tamata sa via cakava na loma i koya, ena kila se sa ka mai vua na Kalou na ivakavuvuli, seu vosa vakai au ga.”13
Au kila ni o kemuni yadua ko ni kauwaitaka tiko e dua na nomuni daulomani. Ni vakayaloqaqataka, qarava, ka tokoni ira. Lomani ira. Ni caka vinaka vei ira. Ena dau yaco, me ra lesu mai. Eso era na sega beka. Ia ena veigauna kece, me da sa kilikili kaya na yaca eda sa vakatokai keda kina, sai koya o Jisu Karisito sara ga.
Kivei ira kece na vakatawana tiko na vuravura totoka oqo, au sa laveta na domoqu e cake ka cavuta na noqu ivakadinadina vakalou ni bula tiko na Kalou ni ko Jisu na Karisito, sa noda iVakabula ka noda Tui! E a vakalesuya mai na Nona dina kei na Nona kosipeli kivei Josefa Simici na Parofita. E sa vosa tiko kivei ira na Nona parofita kei na iapositolo. Sa ilumuti ni Turaga o Peresitedi Thomas S. Monson ka sa veidusimaki tiko ena Nona Lotu edaidai au sa vakadinadinataka ena yaca i Jisu Karisito, emeni.