Veivakabulai kei na Bula va-Kalou
Ena nona ituvatuva tawamudu na Kalou, sa ka ni tamata yadua na veivakabulai; ia na bula vakalou sa ka vakamatavuvale.
Eda vakavinavinaka ka kidavaki Elder D. Todd Christofferson ki na Kuoramu ni iApositolo Le Tinikarua. Eda tokona ena yaloda taucoko na Mataveiliutaki totoka oqo kei ira kece sara era sa kacivi.
Kemuni na taciqu kei na ganequ, ena noda a ciqoma na itukutuku ni nona sa mai leqa o Peresitedi Gordon B. Hinckley, eda sa dui vakila yadua ni sa yali e dua na ka levu. Ena noda qai vakila mai ni sa tiko dina ga ena liga ni Turaga na vanua ena laki cava kina, sa dina sara ni da sa vakila na tavuki mai ni yalo, mai na rarawa ki na vakavinavinaka. Eda sa vakavinavinakataka vakalevu ena vuku ni veika eda sa vulica mai vua na Parofita cecere oqo ni Kalou.
Nikua, ena soqoni bibi oqo, eda sa vakataucokotaka na loma ni Turaga, ena nona a kaya, “sa sega ni kilikili vua e dua me laki vunautaka na noqu ivakavuvuli, se tauyavutaka na noqu isoqosoqo lewe ni lotu; ia vei koya walega sa lesi me kitaka vakakina … io me lesi koya e dua sa kilai raraba ena lotu ni ratou sa solia vua na kaukauwa ni veilesi ko iratou na iliuliu ni lotu.”1 Na lawa taurivaki oqo,2 sa na vakayacori tale, ka sa na toso tale ki liu na Lotu ena kena ilakolako ka sa tuvalaki tu.
O ira na lewenilotu ena vuravura taucoko era tokoni Peresitedi Thomas S. Monson kei rau na nona daunivakasala yalodina. Eda sa “qai sega tiko ni vulagi kina se kai tani, dou sa koro vata ga kei ira era sa lotu, ka dou sa lewe ni vale ni Kalou;
“Ka dou sa tara cake ena nodra yavu na iapositolo kei ira a parofita, ia sai koya ko Jisu Karisito sa kena ivakadei ena tutu-ni-vale.”3
E a vakaraitaka na Turaga na vuna “sai koya sa solia eso, me ra iapositolo; ka so, me ra parofita.” Me ra “vakavinakataki kina ko ira sa lotu, me ia na cakacaka ni talatala me vakatataki cake na ivavakoso nei Karisito:
“Me yaco sara koi keda kece me da loma vata ena vakabauta ka kila sara na Luve ni Kalou.”4
O koya gona sa nodra ilesilesi na iApositolo—na Mataveiliutaki Taumada kei na Le Tinikarua—me ratou kauta mai na duavata ni vakabauta ka vunautaka na noda kila na iVakavuvuli. Sa noda ilesilesi meda vakalougatataka na nodra bula kece era sa vulica ka muria na veika me baleta na Turaga ena ivalavala sa “uasivi cake na kena vinaka”.5 Ka meda vukei ira na tamata me ra vakarautaki ira ki na nodra na vakabulai kei na bula vakalou.
Na ikatolu ni yavu ni vakabauta ka tukuni kina ni “na vakabulai na tamata kecega ena iSoro nei Karisito, kevaka eda sa muria na vunau kei na ivakavuvuli ni iTukutuku Vinaka.”
Me na vakabulai—se me rawati na veivakabulai—sa kena ibalebale meda vakabulai mai na mate vakayago kei na mate vakayalo. Ena vuku ni Tucaketale nei Jisu Karisito, sa rawa ki na tamata kece sara me tucaketale ka vakabulai mai na mate vakayago. Sa rawa talega ki na tamata me vakabulai yadua mai na mate vakayalo ena vuku ni Veisorovaki i Jisu Karisito, ena nodra vakabauti Koya, ena nodra bulataka ka talairawarawa ki na lawa kei na veicakacakatabu vakalotu ni Nona kosipeli, ka vakakina na nodra qaravi Koya.
Me na rawa ni vakalou—se me rawati na bula vakalou—e dusia tiko na marau kei na lagilagi ena matanitu vakasilesitieli. Ena qai yaco mai vei keda na veivakalougatataki oqo ni da sa biuta na bula malumalumu vakatamata oqo. Sa ikoya oqo na gauna meda vakavakarau kina ki na noda vakabulai kei na bula vakalou.6
Me tiki ni vakavakarau oqori, sa dodonu taumada vua e dua me rogoca ka kila na kosipeli. Ena vuku ni ka oqo sa kau kina na kosipeli i Jisu Karisito “vei ira kece talega na veimatanitu kei na veimataqali, kei na duivosavosa, kei ira na tamata.”7
iTavi Yadua
Ena vica na yabaki sa oti au a sota kei na dua na tui ni dua na yavusa mai Aferika. Ena gauna e kila kina ni sa vakavulici tiko mai vua e dua na iApositolo ni Turaga, sa luvuci vakalevu sara. E a kaya ni ra na yaco me papitiso e vuqa vakavuqa sara na nona tamata kevaka me solia o koya vei ira e dua na veivakadonui vaka o ya. Au a vakavinavinakataka na nona yalololoma, kau vakamacalataka ni sega ni dau cakacaka vaka o ya na Turaga.
Na vakatuburi ni vakabauta na Turaga e ka ni tamata yadua. Na veivutuni e ka ni tamata yadua talega. Ena vukuna duadua ga e dua sa na rawa kina vua me papitaiso ka ciqoma na Yalo Tabu. Eda a dui sucu yadudua mai; sa vakakina, ni o keda yadua ena noda, “sucu tale.”8 Sa ka ni tamata yadua na vakabulai.
iTavi Vakamatavuvale
E veivakauqeti ena matavuvale na tubucake yadudua, ka sa “iusutu ni nona ituvatuva na Dauniveibuli me baleta na nodra icavacava tawamudu na Luvena.”9 Na vuvale me sa nona volau na Kalou ni veilomani kei na veiqaravi. Me lomani watina e kea o tama, o tina me lomana na watina, ka me ra veilomani vakakina na itubutubu kei ira na gone.
Era sa ravuti tiko vakawasoma na veimatavuvale ena veiyasai vuravura taucoko. Kevaka era druka na veimatavuvale, era na druka vakakina ena nodra itavi e vuqa sara vei ira na noda veisoqosoqo vakapolitiki, vakailavo, kei na veisoqosoqo raraba. Kevaka era druka na veimatavuvale, era na sega ni sotava na lagilagi ni tawamudu ni veika e dodonu me nodra.
Na Tamada Vakalomalagi e vinakati ira na tagane vakawati kei na watidra me ra dau yalodina vua na kena ikarua, ka me ra rokovi ira ka lomani ira na gone me vaka ni ra isolisoli ni Turaga.10 Ena dua na matavuvale vakaoqo eda na dau vulica na ivolanikalou ka masu vata. Ka vakanamata na noda rai ki na valetabu. Mai kea eda na ciqoma kina na veivakalougatataki cecere duadua ka sa navuca tu na Kalou me baleti ira na Luvena yalodina.
Me vakavinavinakataki na nona ituvatuva cecere ni marau na Kalou,11 sa rawa ni bula vata na matavuvale me tawamudu—me ra na bula ena bula vakalou. E a kaya kina na Tamada Vakalomalagi, “Raica oqo na inaki kei na lagilagi ni noqu cakacaka; io me ra tucake tale mai na mate na tamata kecega, ka rawata na bula tawamudu.”12 E rau a rawati vakavinaka ruarua na nona inaki ena Veisorovaki nei koya na Luvena Lomani, o Jisu Karisito. Na Nona Veisorovaki e vakavuna me dina na tucaketale kei na rawati ni bula tawamudu vei ira kece sara era bula.
Na tucaketale, se tawa mate rawa, ena soli ki na tagane kei na yalewa kece sara, ni sa isolisoli soli wale ka sega na ka e lavaki kina.
Na bula tawamudu, se lagilagi vakasilesitieli se bula vakalou, sa isolisoli ka tiko na ka e lavaki kina. Sa lavaki tu eso na ka me baleta na rawati ni isolisoli oqo mai vua na Turaga, ena nona kaya,“Raica kevaka ko sa muria na noqu vunau ka vosota me yacova na ivakataotioti, ko na rawata na bula tawamudu; oqo na isolisoli uasivi duadua ni Kalou.”13 O ira na veika lavaki o ya e okati kina na vakabauta na Turaga, veivutuni, papitaiso, ciqomi ni Yalo Tabu, kei na yalodina tiko ki na veicakacakatabu vakalotu kei na veiyalayalati ni valetabu.
Sa sega ni rawa vua e dua na tagane ena Lotu oqo me rawata na ivakagedegede cecere duadua ni matanitu vakasilesitieli kevaka e rau sa sega ni vakamau ena veiyalayalati tawamudu kei na dua na yalewa sa kilikili.14 Na cakacakatabu vakalotu ni valetabu oqo ena vakatara vei rau ruarua na bula vakalou.
Na vakaitavi ena Lotu, ena dau yaco na gauna meda vagalalataki kina. Ia e sega ni rawa meda na vakagalalataki mai na noda itavi vakaitubutubu. Mai na ivakatekivu ni veisiga ena itukutuku makawa vakatamata, e a sa vakaroti ira mai kina na itubutubu na Turaga me ra vakavulica vei ira na luvedra na kosipeli.15 E a vola vakaoqo o Mosese: “Ia mo ni gumatua … ni vakavulica … vei ira na luvemuni, ka dau vosataka na [vosa ni Kalou] ni kemuni sa tiko ena nomuni vale, ni kemuni sa lako voli talega ena sala, ni kemuni sa koto sobu, ni kemuni sa duri cake.”16
Ena noda veisiga oqo, e kaya kina na Turaga, “Dou vakavulici ira na luvemudou me ra kila na rarama kei na dina.”17 Sa dodonu me vukei ira na itubutubu na Lotu ka sega ni sosomitaki ira na itubutubu ena nodra itavi vakaitubutubu.
Ena gauna oqo ka sa tubu sara tiko kina vakalevu na ivalavala tawakilikili kei na veivakatotogani ni iyaloyalo vakasisila, sa nodra itavi bibi na itubutubu na vakavulica vei ira na luvedra na bibi ni nona tiko na Kalou ena nodra bula.18 Na veika ca oqori, ka cecere sara na nona rawa ni vakarusa na rawati ni veika vakalou, sa dodonu me qaqaco vinaka na kedra vakatikitikitaki mai vei ira na luve ni Kalou.
Sa dodonu talega meda vakavulici ira na gone me ra dau rokovi ira na nodra itubutubu. E tukuni ena ikalima ni vunau: “Mo vakarokorokotaki rau na tamamu kei na tinamu: me dede kina na nomu bula ena vanua sa solia vei iko ko Jiova na nomu Kalou.”19
Na cava na sala vinaka duadua ni noda vakavulici ira na luveda? Sa vakarota vakatabakidua kina na Turaga:
“Raica sa sega ni kilikili me vakayacori na cakacaka vakabete ena ivakarau kaukauwa me vakasaurara; ia me vakayacori ga ena veivakauqeti, na vosota vakadede, na yalomalua, na yalomalumalumu, kei na loloma e sega ni veivakaisini;
“Io ena yalo e veidokai, kei na yalomatua; raica ena rarama sara kina na yalona, ka sega vua na veivakaisini kei na lawaki—
“Me veivunauci vakaukauwa sara ena veivakauqeti ni Yalo Tabu, ia me kusarawa me lomani koya tale a vunauca; kevaka e sega sa na okata o koya me kena meca.”20
Ena gauna e gadreva kina e dua na gone na veivakadodonutaki, o na rawa ni tarogi iko mada vakaoqo, “Na cava sara mada au na rawa ni kaya se vakayacora ka na rawa me vakavuna vei koya me digia na veisala vinaka cake?” Ena nomu veivakadodonutaki taudonu tiko, vakayacora lo, vuni, ena loloma ka kakua ena matanalevu. Ke gadrevi na veivosataki, vakaraitaka na loloma levu ena kena gauna donu me kakua kina ni tiko tale na sore ni veicacati. Kevaka mo ni rawa ni veirawai, sa dodonu me vakaidina na nomuni loloma ka yavutaki mai na ivunau vakalou kei na ivakavuvuli dodonu na nomuni veivakatavulici.
Kakua ni tovolea mo ni lewai ira na luvemuni. Ia, mo ni dau vakarorogo vei ira, vukei ira me ra vulica na kosipeli, vakauqeti ira, ka tuberi ira yani ki na bula tawamudu. Sa ikemuni na mata ni Kalou ena nodra qaravi na gone. Sa nuitaki kemuni kina o Koya. Me tikoga e yalomuni na Nona veivakauqeti vakalou ena nomumi veivakavulici ka veivakayarayarataki.
Tubuda
Ena sega ni taucoko na veivosaki kece vakamatavuvale ena vakarautaki ni bula vakalou kevaka me okati tikoga kina o tina, tama kei ira na gone. Vakacava o ira na tubuda kei ira na vo ni tubuda mai liu? Sa vakaraitaka na Turaga ni sa sega ni rawa meda vakavinakataki sara ke sega ko ira; ka ra na sega talega ni rawa ni vakavinakataki sara ke sega ko ikeda.21 Na cakacakatabu vakalotu ni veivauci e gadrevi ena bula vakalou. Sa gadrevi vua e dua na yalewa vakawati me vauci vua na watina; sa gadrevi me ra vauci vei ira na nodra itubutubu o ira na gone; ka da gadreva kece sara meda semati yani vei ira na tubuda.22
Vakacava o ira era sega ni rawa ni vakamau ena bula oqo, se o ira era sega ni rawa ni vauci vei ira na nodra itubutubu ena bula oqo? Eda sa kila ni Turaga ena lewai keda yadudua na tamata me vaka na gagadre ni yaloda, ka vakakina ena noda ivalavala,23 o koya gona sa na soli kina na veivakalougatataki ni vakalou vei ira kece era kilikili kaya.24
Eda sa tokoni vakalevu sara ni da sa gone ni veiyalayalati. Ena yaloda sa teivaki tu kina na veiyalayala ka vakayacori vei iratou na Tamada o Eparaama, Aisake, kei Jekope. Sa kaya kina na Turaga:
“Raica o kemudou sa nodra kawa ka sa tu vei kemudou na kena dra; ia era sa sega ni kilai kemudou na kai vuravura, ni dou sa tu vata kei Karisito vua na Kalou… .
“Raica, dou sa kalougata kevaka dou sa vakayacora tikoga na noqu cakacaka; io mo dou vu ni rarama vei ira na matanitu tani; ia mo dou vakabulai ira na noqu tamata na Isireli ena nomudou ilesilesi vakabete.”25
Sa kena gauna oqo ena bula oqo meda vakavakarautaki keda ki na noda vakabulai kei na bula vakalou.26 Ena nona ituvatuva tawamudu na Kalou, sa ka ni tamata yadua na vakabulai; ia na bula vakalou sa ka vakamatavuvale.
Ni da sa gone ni veiyalayalati, eda sa mai sota vata tiko ena mataka nikua ena soqoni bibi oqo. Sa vakanamata vakatabakidua kina na noda rai ki na veiulutaga tabu me baleti ira na parofita kei na iapositolo. Ia, na icavacava ni itavi ni vakavakarau ki na veivakabulai kei na iotioti sa no vei keda yadudua, na noda na tarogi ena digidigi yadudua, noda vakaitavi ena noda dui matavuvale, na noda tokara na yaca tabu vakatina, tama, luvena yalewa, luvena tagane, tubuda se tukada.
Ena veitavi bibi oqori, meda toso yani kina ki liu ena vakabauta, ena veituberi nei Jisu Karisito, o koya sa nona na Lotu oqo, o koya talega ka sa vosa tiko mai ena vukuna na Nona parofita, sa noqu masu ena yaca i Jisu Karisito, emeni.