Vakalesuimai ni Vakabauta ena Matavuvale
O ira na matavuvale tudei era vakarautaka na yavu ka taura vata tu na itikotiko ka vakaqaqacotaki kina na kawatamata.
Ena noda kila tu na “ituvatuva cecere ni marau”1 sa noda kina na gauna vinaka kei na itavi ni kena veivuketaki na vakalesuimai ni vakabauta ena matavuvale.
Ena vuqa sara na sala sa rawa me vakatauvatani na noda cakacaka kei ira era veiqaravi ena buturara vakawainimate kei na vulici ni vakadidike. Mai na veilawa yavutaki era kila rawa kina na sala me vakalailaitaki kina na kune rarawa kei na vakatoroicaketaki ni ivakatagedegede ni bula.
Ena yalava ni vakabauta vakalotu, o ira na marama kei na turaga vakabauta, ena nodra vakayagataka na ivakavuvuli vakadonui,2 sa rawa me ra veivuke ena vakamavotaki ni uto ka e lolosi tiko, vakasuka mai na inuinui kei na veivakadeitaki ki na lomaleqa ni vakasama.
Na rawa ka ni dua na dauvakadidike e rawa mai ena nona duavata tiko kei na dua na ka, ka vakatokai me veilawa ni ka ni veibuli. O ira na dauvakadidike levu e liu vakakina o ira ena gauna oqo era sega ni a bulia na veilawa me baleta na kedra yaco tiko na veika oqo; ia era a kunei ira ga.
Ena dua na ivola vei ira mai Korinica, e a taroga kina o Paula na iApositolo e dua na taro vakavure vakasama me baleta na kaukauwa ni vakasama ni tamata: “Io, ko cei na tamata sa kila na ka ni tamata, a yalo ni tamata ga sa tiko e lomana?”3
Sa vakatuburi na kila ka, ka vakalevutaki na kilai ni ka, ena vakayagataki ni vakasama kei na vuli. Ena vakayagataki ni sala oqo, sa kilai rawa kina na veiyavutu kei na lawa ka ra ciqomi sara me ra ivakarau dina ni veika.
E dua na ka, ka sa qai matata mai ki na vakasama ka sa vakararamataki sai koya ni sa tu na veilawa ka ra tauri rau vakatautauvata tu na bula kei na veika bula. Na kunei ni lawa ni fisiki kei na kena vakamuri sa yaco mai kina na tubu, ka vakavuna na kena rawa vua na tamata me yacova na vanua cecere ni rawa ka mai na ka e nanumi rawa vua.
Au vakabauta ni sa taurivaki talega na yavu oqo ki na ivakatagedegede donu kei na ivakarau vinaka ni bula. O koya gona o ya, sa noda kina na itavi ni kena yadravi na vuvale me vaka e dua na vanua ni vuli ka rawa kina me taurivaki na veivakarau vivinaka oqo ena dua na vanua ni veilomani ena kaukauwa ni ivakaraitaki.4
E vakatavuvulitaka kina vakaoqo o Peresitedi Thomas S. Monson, “Era gadreva vakalailai ga na vakalewai ka vakalevu cake na ivakaraitaki o ira na itabagone.”5
Ena noqu railesuva tiko na noqu bula au nanuma sara na noqu mai rawata na vosa vinakataki ena vuku ni veiyavutu ni ivakarau vivinaka ena taraicake ni dua ka ivakarau vinaka. Evei sara mada au a vulica mai kina na dau dina, yalodina kei na nuitaki? Au a vulica na veivakarau oqo e vale ena nodrau ivakaraitaki na noqu itubutubu. Au a rawata li vakacava na vosa vinakataki ena vuku ni veiqaravi ena sega ni nanumi koya ga vakaikoya? Au rawata mai na noqu dau wanonova matua ka taleitaka na nona dau qarava ena yalodina o tinaqu na nona matavuvale. Evei au vulica mai kina na nodra dokai ka rokovi na luvena yalewa na Kalou? Au vulica mai na ivakaraitaki nei tamaqu.
Sai koya ena matavuvale au a vulica mai kina na ivakavuvuli ni bula ni raiyawa kei na vakaliuci ni cakacaka. Au se rawa tikoga ni raitayaloyalotaki tinaqu ena nona dau vakayagataka voli vakalevu na nona misini butu ena veibogi me cula ivava kina me ra laki volitaki ena dua na vale ni vava voleka ga. Qo e sega ni baleta me rawa kina vua me volia na veika me baleti koya ga ia me vukei koya ena nona veivuke vakailavo me rawa kina vei keirau kei taciqu tagane me keirau lako i koliji. E muri e qai dau vakaraitaka na kena dau ivurevure ni vakacegu vua na itavi ni veiqaravi oqo.
E dua na turaga vuku, ka daucakacaka o tamaqu. E vakavulici au ena ta kau ena vakayagataki ni ivaro, na vakaisosomitaki kei na cobari ni dua na wa ni livaliva ni dua na iyaya vakalivaliva ni loma ni vale, kei na vuqa tale na veicakacaka tarai ena liga.
O ira kece na veilesoni oqo e dua vata ga na kedra itoko: kakua ni lomavinakataka na ka e rawa ni ko vakayacora vakavinaka cake tale.
Au a tara cake e dua na kila ni vakayaco vakatulewa bibi ena noqu dau veitalanoa kei rau na noqu itubutubu kei na noqu vuli mai na nodrau veivakasalataki. Ni vakuri na veika oqo, vakatulewa vakaikoya, nodra nanumi na tani, veivakauqeti ena rawati ni gauna ni vuli, ena sega ni mudu rawa na lisi.
Au a vakaveikilaitaki ki na kosipeli vakalesuimai nei Jisu Karisito ena noqu yabaki ni itabagone mai vei Pamela, ka a qai yaco e muri me watiqu. O koya talega ka a qai vukea me dua na ivakatagedegede cecere ki na noqu bula mai na dua na ivakatagi memela wale tu ga.6
Au sa marautaka oti mai e 67 na yabaki mamarau ni vakawati kei na vakamatavuvale—21 me vaka e dua na luvena tagane ena nodrau vale na noqu itubutubu, ka 46 vakaturaga vakawati, ka soqoni vata yani ena marau vakatama kei na tukanigone. Na cava tale me na vinakata e dua? Meu vakarawarawataka ga, ni sa rawa me da marautaka vata kece sara na veigauna vivinaka vakaoqo.
Ni da lesu ki na ivakavuvuli nei Paula ka volai ena Korinica eda kunea kina na veivosa oqo:
“Sa vaka talega kina na veika ni Kalou, sa sega e dua sa kila [vakavo ga ke sa tu vua] na Yalo ni Kalou …
“Ia na tamata sa vakayago sa sega ni kila na vakabauta na veika ni … Kalou: ni sa ka lialia vua: a sa sega ni kila rawa ko koya, ni ra sa kilai vakayalo ga.”7
Sa dau kilai na veika ni vakadidike mai na kedra vakadikevi na ka, kedra vakatovolei ka vakakina na vakayagataki ni vakasama.
Era dau rawata na nodra ivakadinadina na tisaipeli i Karisito mai na nodra vulica na Nona vosa, vakadikeva na Nona cakacaka, vakatovotovotaka na ivakavuvuli ni kosipeli, ka vakakina na ciqomi ni veivakauqeti ni yalotabu.8
“Ia ka sa tiko e dua na yalo ena loma ni tamata: a sa solia vei ira na vuku na icegu i Koya sa Kaukauwa.”9
E dina ga ni ra sega soti ni dau vakabauti na veidina vakayalo, vei ira sa yalolokomi sa sega sara ni rawa me ra cakitaki. E ka bibi sara na kena kilai ni ra a sega ni kilai mai ena vuku ni via rogo na veilawa ni veika bula. Era yavutaki mai ka tudei tu ena vatu ni veika dina.
Sa tu talega na veivakarau vinaka ka sega ni lako mai vua na tamata.10 Era sa iusutu ni ituvatuva vakalou, ka sa dau kauta mai na marau levu kei na inuinui ena noda ilakolako ena bula oqo na kedra kunei kei na vakayacori.11
Me kena ivakaraitaki, au vakabauta, me vaka e vakaraitaki ena “Na Matavuvale: Ai Vakaro ki Vuravura Raraba,”12 ka sa vakamacalataki ena ivakatakila vakalou, ni sa ka vakatabui mai vua na Kalou na vakawati kei na matavuvale. E tukuni ena ivolanikalou: “O koya oqo sa na biuta kina na tamana kei na tinana na tagane, ka kabita na watina, a rau na lewe duabau ga.”13
Era sa vakarautaka mai na tamata vuku ena veigauna makawa e dua na ivotavota ni vuli. Ka sa dodonu me da solia yani vei ira na noda kawa mai muri e dua na yavutu ni vakabauta ena matavuvale, me vaka e vakaraitaka na Kalou.14
E dodonu me da kua ni guilecava ni galala kei na marau ena veiyasa kece ni bula e lako mai ena kena kilai kei na vakadinati na veivakavuvuli tawamudu ni kosipeli. Era vakarautaka e dua na yavudei ka me tarai cake kina e dua na bula vuavuaivinaka ka marautaki.15
Na vakamuri ni ivakarau ka vakavulici ena nona ituvatuva na Tamada sa vakatara vei au meu vakila na kena ibalebale na bulataki ni “keimami sa tiko marau”16 ka “ia dou na takiva ena reki na wai mai na mata-ni-wai ni bula.”17
E a vakatavuvulitaka na iVakabula, “Au sa lako mai me rawa vei ira na bula, ia me rawa vakalevu sara.”18
Sa rawa me dau vakalatilati ki na noda rawa ni marautaka eso na veigauna vinaka sara ni bula na noda vakasama kei na ivakarau.
Sa rawa me tarogi kina na taro, “E vakacava mada o ira era sega ni se bau bulataka e dua na bula vinaka vakamatavuvale?”
O ira na matavuvale tudei era vakarautaka na yavu ka taura vata tu na itikotiko ka vakaqaqacotaki kina na kawatamata, me yacovi ira sara mada ga era vakila ni ra bula tu ena veivanua dredre toka.
Kivei ira era na yalodina tikoga19 ka masulaka tiko na veimaliwai vakaoqo,20 au via wasea vata kei kemuni na vosa rawarawa ka veivakacegui oqo nei Helen Steiner Rice;
Na Kalou ni yalayala,
Ena dei tu ga,
Ni veika sa yalataka na Kalou ena vakayacora
Me vaka sara ga o ya.
Ena nomu yalolailai
Ka seyavu yani na inuinui kecega,
Nanuma lesu na veiyalayala ni Kalou
Me ivakadei ni nomu vakabauta.21
Sa noqu masu ni na rawa me da tutaka vata, ena yaloqaqa kei na nuidei ena noda maroroya na isolisoli ni Kalou oqo, na matavuvale. Ena yaca i Jisu Karisito, emeni.