Sucu Tale
Na sucu vou vakayalo e vakayavutaki ena vakabauti Jisu Karisito ka ni da sa veisautaki ena nona loloma vakalou.
Ena tinikalima na yabaki sa oti au a tucake kina ena imatai ni gauna ena itutu ni vunau ni Valecavu niu se qai tokoni vou ga ki na Vitusagavulu. Au a sa yabaki 48. Na drau ni uluqu e vavaku ka damu. Au nanuma niu sa kila na cava na kena ibalebale me da vakila na noda lolovira. Ni oti na noqu vosa ka lima na miniti na kena balavu, sa suasua tu na noqu sote ena buno. E dua na gauna dredre na gauna kece o ya. Ia, nikua, ni laurai lesu na gauna ko ya, e vaka ni dua na gauna vinaka.
Ena imatai ni gauna erau a tokoni kina o Peresitedi Dieter F. Utchdorf kei Elder David A. Bednar me rau lewe ni Kuoramu ni iApositolo Le Tinikarua, a yaco mai vei au ena gauna ni soqoni o ya e dua na ivakadinadina me baleta na vakalou ni ivurevure ni veikacivi erau kacivi kina. A soli talega kina vei au ena gauna ko ya meu kila na kena bibi ka tabu sara na ilesilesi kei na veiqaravi ni dua na iApositolo ni Turaga ko Jisu Karisito. E sega vei au na vosa me vakamacalataki kina na veika o ya baleta ni a vakadewataki mai na Yalotabu ki na yalo ka sega ni vosataki. Niu vakasamataka ena gauna oqo, sa vakalailaitaki au sobu ena dua na malumalumu titobu ni yalo au se bera vakadua ni bau vakila, kau sa vakatakekere kina vua na Tamaqu mai Lomalagi me tokoni au ena kena levu duadua e rawata, me rawa kina niu yacova e dua na ivakatagedegede ka levu cake sara, mai na vanua au rawa ni rawata ka meu rawa kina niu raica yani na veika e taudaku, ka meu vakayali au kina ena noqu qaravi kemuni. Au vakabauti Koya, ka kila ni sa rauta vakavinaka na Nona iloloma soli wale, o koya au sa sega kina ni vakataratutu ena noqu yalataka na veika kece e tu vei au, kei au, vua na Kalou kei na Luvena Lomani. Au sa yalataki au talega kina, na noqu yalodina, na noqu veiqaravi, kei na noqu loloma ki na Mataveiliutaki Taumada kei ira na Tuakaqu ena Le Tinikarua.
Na noqu veivakalougatataki vakapeteriaki au a ciqoma niu yabaki 13 mai vua e dua na tukaqu lomani, e oka kina na veimalanivosa oqo: “[Na Tamamu Vakalomalagi] sa talai iko mai ena iotioti ni itabagauna lagilagi oqo mo mai sucu ena loma ni veiyalayalati vou ka sega ni mudu oqo mai vei rau na itubutubu vinaka, ka bula dodonu.” Ena vakavinavinaka cecekia au vakaraitaka kina ni sai koya oqo na veivakalougatataki cecere ka vakayavutaki kina na noqu bula. Au vakacaucautaki rau kina na noqu itubutubu, ia ena loloma au vakila tu na noqu dinau vei rau kei rau na nodrau itubutubu kei na veitabatamata era liu vei rau. Sega ni dede mai na noqu kacivi ki na Vitusagavulu a yaco e dua na gauna meu tucake tu ena yasa ni nona ibulubulu e dua vei ira na tubuqu oqo, ka mate ena vica vata na yabaki niu se bera ni sucu. Niu vakasamataka na solibula era a vakayacora, o koya kei ira na nona matavuvale ena nodra ciqoma na kosipeli vakalesui mai i Jisu Karisito, au a luvuci ena vakavinavinaka ka votu mai yaloqu meu rokova na nona solibula kei ira era qai muri mai vua ena noqu yalodina vua na Kalou kei na veiyalayalati ni kosipeli, me vakataki ira.
Ena noqu cavuta tiko na veivakalougatataki, au okati ira kina na taciqu lomani kei na dui watidra, me vaka era tiko rawa nikua eke. E va na luvei keirau tagane ka dua na yalewa kei na watiqu, ka ra sa dui vakawati vinaka, se, ena vukuna na luvei keirau tagane gone sara, sa na vakarau vakamautaka e dua na goneyalewa totoka. Keirau lomani ira vata kei ira na makubui keirau ka taleitaka na sala era vakalougatataka kina na neirau bula ena nodra yalodina tu vua na iVakabula kei na Nona kosipeli. Ena kena tuvuka, e tu kina o Kathy, na watiqu, ka dau qarava na neitou vale, na rarama ni noqu bula, e dua na itokani yalomatua ka tudei, ka vakasinaiti tu ena kila ka vakayalo, na veiwali vinaka, na vakanuinui vinaka, kei na loloma uasivi. E sega ni vakamacalataki rawa na noqu lomani koya kau nuitaka meu na vakaraitaka vakavinaka cake ena veisiga kei na veiyabaki sa tu mai liu.
A noqu veivakalougatataki meu kaulotu tudei niu se cauravou e Argentina ena nodrau veituberi e rua na peresitedi ni kaulotu uasivi, o Ronald V. Stone kei Richard G. Scott kei rau o Patricia kei Jeanene, na dui watidrau. Au vakavinavinaka vua na Kalou ena nodratou veivakauqeti vei au. Ni oti na noqu tauri ivola mai na koronivuli ni loya, keirau a vakaitikotiko kei Kathy vata kei ira na luvei keirau ena yasana o Maryland, Tennessee, Virginia, North Carolina, kei Utah ena gauna oqo. E tolu na yabaki talei keitou a tiko kina mai Mexico. Ena veivanua kece oqori, keitou sa vakalougatataki kina mai vei ira na itokani lomani ena loma ni Lotu ka vakakina e taudaku ka ra dau lomani keitou ka vakavulici keitou ka vakaitokanitaki keirau vata kei ira na luvei keirau ka ra se vakayacora tikoga oqo. Au taura na gauna vinaka oqo meu vakaraitaka raraba kina na vakavinavinaka vei ira.
Na noqu iloloma kei na vakanuinui vinaka e sega ni yalani vei ira na Taciqu ena Vitusagavulu kei iratou na Matabisopi Vakatulewa. Au reki niu na voleka tikoga vei ira ena noqu tomana tiko na noqu veiqaravi ka na yaco mai eso na gauna meu veiqaravi kina vata kei ira. Na tatevu ni ivakatakila ena noda gauna ka vakatikori kina na Vitusagavulu ena kena itutu ena Lotu sa lewena e dua na cakacaka mana levu ka rairai sega beka ni dau kilai sara vakavinaka ena itukutuku ni veigauna ni nona cakacaka na Turaga ni gauna oqo. Na Vitusagavulu e idola ni qaqa ena cakacaka oqo ena gauna oqo kei na veiyabaki sa tu mai liu, sa sega kina ni yalani na noqu doka ni a bau mai volai ena maliwa ni yacadra na yacaqu. Me vakalougatataki kemuni na Taciqu na Kalou.
Au gadreva meu wasea vei kemuni na noqu ivakadinadina me baleti Jisu Karisito, na Luve ni Kalou, kei na kaukauwa ni Nona solibula veisorovaki cecere. Niu vakayacora vakakina, au na nanuma lesu tale e dua na ka au a sotava ena noqu gauna e Tennessee. Ena dua na bogi mai kea au a taura e dua na qiri e vale mai vua e dua na turaga au sega ni kila. A vakatakilai koya ni sa qai vakacegu ga mai na itutu vakaitalatala ni dua na mata vakabauta ka kerea o koya me keirau laki sota vakatikitiki ena Sigatabu ka tarava. Ni keirau sa sota, a tukuna vakamatata sara vei au na noqu vulagi oqo ni sa rui leqataka na kena vakabulai na yaloqu. A taura mai na nona beqi ni vunau e dua na lisi balavu ni ivolanikalou mai na Veiyalayalati Vou ka kaya me keirau raica vata mada na veitikina o ya ka raica kevaka ena vukei au meu vakabulai kina. Au a kurabuitaka vakalailai na vanua e sa mua tiko kina o koya, ia au rawa ni tukuna ni sa yalona dina tiko, kau vakauqeti sara ena nona kauwaitaki au dina.
E sivia e dua na auwa na neirau veivosaki kei noqu vulagi, ka dolavi koya me vakarorogo ki na noqu vakamacalataka na veika e baleta na noqu vakabauta ka vakakina na neirau wilika vata eso na ivakavuvuli mai na iVola i Momani ka sega tu ni kila o koya. Keirau raica ni levu sara na ka keirau duavata kina ka so keirau sega ni duavata kina. Keirau vakila e dua na yalo ni veiwekani ka keirau masu vata ni bera ni gole yani o koya. Na ka sa qai vo toka vei au o ya na neirau a veivosakitaka na sucu tale. Sa lewe ni noqu ivakadinadina me baleti Jisu Karisito sai koya na sucu tale vakayalo ena Vukuna.
Sai Jisu a kaya ni curu ki na matanitu ni Kalou sa gadrevi ki na tamata yadua me sucu tale—sucu ena wai kei na Yalotabu (raica Joni 3:3–5). Na Nona ivakavuvuli me baleta na papitaiso vakayago kei na vakayalo e vukei keda me da kila vakavinaka kina ni noda ivalavala vakaikeda kei na veisotavi ni kaukauwa vakalou sa gadrevi dina sara ki na veivakavoui ni sucu vou oqo—na veisau mai na tamata itovo vakayago ki na yalosavasava (raica Mosaia 3:19). E vakamacalataka na sucu tale o Paula ena malanivosa matata oqo: “Ia kevaka sa tu vata kei Karisito e dua na tamata, sa qai buli vou” (2 Korinica 5:17).
Mo vakasamataka mada e rua na ivakaraitaki mai na iVola i Momani. Ni vo toka e dua na senijiuri ni bera ni sucu na Karisito, e a vakavulici ira na nona tamata o Penijamini na Tui ena nona lesu mai kei na Veisorovaki ni iVakabula. Na Yalo ni Turaga e a vakayacora e dua na veisau levu ni yalodra na tamata ka sa yaco me ra “biuta tani na gagadre ca, ka via kitaka tikoga na i valavala dodonu” (Mosaia 5:2). Ena vuku ga ni nodra vakabauta na Karisito, era kaya kina, “Sa lomai keimami me keimami veiyalayalati kei na neimami Kalou me keimami vakayacora na nona lewa ka muria na nona vunau … ena gauna ni neimami bula sa vo” (Mosaia 5:5; vakamatatataki). E a qai vosa kina vakaoqo na tui, “Ia ena vuku ni veiyalayalati dou sa vakayacora dou sa vakatokai kina mo dou luve i Karisito, [luvena tagane, kei na luvena yalewa]; raica, sa vakasucumi kemudou vakayalo ko Koya ena siga oqo, ni dou sa kaya ni dou sa vakabauta na yacana ka veivutuni” (Mosaia 5:7; raica talega V&V 76:24).
Na itukutuku kei Alama e veivakasalataki talega. Ena nona sa lako yani kei iratou na nona ilawalawa ka vakacacana na Lotu i Karisito, eratou a qai cudruvi mai vua e dua na agilosi. E tarava sara na tolu na siga kei na bogi kivei Alama ka vakamacalataka o koya ni sa vaka, “sa kani au na yaluma e sega ni tukuni rawa… . Ia, au sa nanuma mai na noqu ivalavala ca kei na noqu caka cala kecega, kau sa voleka ni mate ena noqu rarawa” (Alama 36:12–13). Sa qai yaco, “niu sa voleka koto ni mate … kau veivutunitaka sara” (Mosaia 27:28), ena nona ivakamacala, sa qai votu mai ki na noqu vakasama na itukutuku kamikamica i Jisu Karisito kei na Nona Veisorovaki. E a vakamamasu o Alama, “Oi kemuni Jisu na Luve ni Kalou, ni lomani au mai, raica au sa yaluma sara ka kune rarawa, ka sa vesuki au na ivesu ni mate” (Alama 36:18). E sa mani vosoti o koya, ka sa tucake ka vakatusa raraba yani:
“Au sa veivutunitaka na noqu ivalavala ca, ka sa vakabulai au na Turaga; raica au sa sucu vou ena Yalotabu.
“A sa kaya vei au na Turaga: Kakua ni kurabui ni sa dodonu me sucu tale na tamata kecega; io na tagane kei na yalewa, na veimatanitu, veimataqali, duivosavosa kei na lewe ni veivanua, io me ra sucu tale vua na Kalou, ka saumaki mai na nodra ivalavala vakayago kei na ivalavala ca me ra ivalavala dodonu; a sa vakabulai ira na Kalou ka sa yaco me ra luvena.
“O koya sa yaco kina me ra tamata vou” (Mosaia 27:24–26).
Ni da vakananuma na ivakaraitaki oqo kei na veivolanikalou tale eso, sa matata kina ni sucu vou vakayalo e vakayavutaki ena vakabauti Jisu Karisito ka ni da sa veisautaki ena nona loloma vakalou. Me voci vakavudi eke, ni vakabauti Karisito me vaka ni o Koya na Dauveisorovaki, na Dauveivueti sa rawa me veivakasavasavataki mai na ivalavala ca ka veivakatabui. (raica Mosaia 4:2–3).
Ena gauna sa vakawakana kina ena dua na tamata na vakabauta dina oqo ena veimuataki dina sara ki na veivutuni. E vakavulica o Amuleki ni Nona solibula na iVakabula ni “ko ira kecega sa vakabauta na yacana, era na bula; ia na nona loloma ga sa vakacabori Koya kina, me vakadonui kina na ka sa virikotori ena vunau; a sa vakacabori Koya me i soro me ra vakabauta, veivutuni ka bula kina na tamata” (Alama 34:15, vakamatatataki).
Me sa taucoko, o koya gona, sa gadrevi ena veivutuni e dua na veiyalayalati ni talairawarawa. Sai koya oqo na veiyalayalati era a tukuna tiko na tamata nei Penijamini “me keimami vakayacora na lewa ni [Kalou], ka muria na nona vunau kecega” (Mosaia 5:5). Oqo na veiyalayalati ena vakadinadinataki ena papitaiso ena wai (raica Mosaia 18:10), ena so na gauna e dau vakatokai tiko ena ivolanikalou me “papitaiso ni veivutuni” se “veivutuni ka papitaiso” me vaka ga ni sai koya na vatuiubi ni noda veivutuni. (raica, kena ivakaraitaki, Cakacaka 19:4; Alama 7:14; 9:27; V&V 107:20).
Me vaka ga ni sa yalataki tu, na Turaga e sa mai papitaisotaki keda ena bukawaqa kei na Yalo Tabu” (3 Nifai 9:20). E a vakamatatataka kina vakaoqo o Nifai : “Ia na matamata ni koro mo dou curu kina sai koya na veivutuni kei na papitaiso ena wai; ia dou na qai papitaisotaki ena Yalo Tabu kei na bukawaqa me bokoci kina na nomudou ivalavala ca” (2 Nifai 31:17).1 Ena noda vakararavi “ki na loloma i Koya sa kaukauwa me ia na veivakabulai” (2 Nifai 31:19), eda sa “vakaukauwataki sara kina” (Mosese 6:65) ia, ke sega ni taucoko na noda sucu tale, eda sa muataki dina yani ki na salatu ni sucu tale vakayalo.
Ia oqo, na Turaga sa dau vunauci keda me da qaqarauni baleta ni “lewe vuqa era na vuki tani ga” (V&V 20:32), o ira mada ga era sa vakasavasavataki (raica tt. 32–34). Me vaka e vakasalataka o Nifai: “Mo dou toso ki liu ka tudei vei Karisito ena nomudou vakanuinui taucoko sara, mo dou lomana na Kalou kei na tamata kecega. Ia kevaka dou sa toso ki liu ka tugana ki lomamudou na vosa i Karisito ka vosota me yacova na ivakataotioti, raica sa kaya vakaoqo na Tamada: Dou na rawata na bula tawamudu” (2 Nifai 31:20).
O ni na taroga beka, Na cava beka e a sega ni yaco totolo kina vei au na veisau cecere oqo?“ E dodonu mo ni nanuma tiko na nodra ivakaraitaki cecere na tamata nei Penijamini na Tui, Alama, kei ira tale eso ena ivolanikalou era sa totoka dina ka sega ni dau yaco vakawasoma.2 Ni vuqa vei keda, na veisau e dau tiko vakamalua ka taura e dua na gauna. Ni da sucu tale, sa dua na ka vakaituvatuva e levu cake mai na dua na ka e a yaco ka sega ni vakataka na noda sucu mai vakayago. Na ka sa yaco ena ituvatuva oqo sai koya na iusutu ni inaki ni bula vakayago oqo.
Ena gauna vata oqo, me da sa kakua ni laki tiko vakacegu sara ena dua na bula vakawelewele. Me da kakua ni vakadonui keda vakaikeda ka tiko vakacegu. Me da kakua ni vakacegu tiko me da cakava na veika butobuto. Me da kilikili kaya ena noda vakaivotavota ena sakaramede ena veimacawa ka tomana tikoga na veitokani ni Yalo Tabu me ciluma laivi mai tuba na iotioti ni tiki ni veika tawa savasava mai lomada. Au vakadinadinataka ni ena nomu lakova tikoga na sala ni sucu vou vakayalo, ena kauta tani na nomu ivalavala ca na veisorovaki nei Jisu Karisito ka vakakina na dukadukali ni ivalavala ca era tu vei iko, ena malumalumu na sasaga ni veitemaki, ia ena vukui Karisito ena yaco me da savasava, me vaka ni rau sa savasava o Koya vata kei Tamada.
Au kila ni o Jisu Karisito sai Koya na luvena bula sa tucake tale na Kalou.
[Au] kila ni veivakadodonutaki ena loloma soli wale ni noda Turaga ka iVakabula ko Jisu Karisito e dodonu ka dina;
“Ia [au] kila talega ni veivakasavasavataki ena loloma soli wale ni noda Turaga ka iVakabula ko Jisu Karisito e dodonu ka dina, vei ira kece era lomana ka qarava na Kalou ena lomamudou taucoko, kei na yalomudou taucoko, kei na nomudou igu taucoko” (V&V 20:30–31; raica talega Moronai 10:32–33).
Au rekitaka ni ena vo ni noqu gauna ni bula sa na rawa niu solia vei Karisito, meu solia na itukutuku vinaka i Karisito ki vuravura taucoko. Au vakadinadinataka na dina kei na nona loloma na Kalou, na Tamada Vakalomalagi, o koya a vakalagilagia tikoga ko Jisu. Au lomana ka vakadinadinataka na Parofita ko Josefa Simici. Ena nona veitokani vata kei na Turaga, na nona vakadewataka kei na nona tabaka na iVola i Momani, kei na nona dregata ena nona dra ni solibula na nona ivakadinadina, sa yaco kina ko Josefa me dauvakatakila cecere duadua i Jisu Karisito ena Nona ituvaki dina vaka Dauveivueti vakalou. E se sega tale ni dua na ivakadinadina cecere cake se dua na nona itokani yalodina cake ko Jisu, mai vei Josefa Simici. Au tukuna na noqu ivakadinadina ena veikacivi nei Peresitedi Thomas S. Monson ni parofita ka Peresitedi ni Lotu i Jisu Karisito ni Yalododonu Edaidai ena gauna oqo, kau yalataka na noqu yalodina vua kei rau na nona daunivakasala ena nodratou itavi tabu. Au masuta na veivakalougatataki ni Kalou vei keda kece. Ena yacai Jisu Karisito, emeni.