Faanahoraa Video
I roto i te hoê hoho‘a video tei patahia i roto i te putuputuraa rahi na te Feia Apî Tamahine, te vai ra te parau a te peresideni Thomas S. Monson – e tae noa’tu i te mau mana‘o o te hoê pŭpŭ feia apî tamahine e to ratou mau ti‘a faatere no ni‘a i te hoê iteraa tei roaa ia ratou no te haapii i te imiraa e te fariiraa i te arata‘iraa a te Fatu.
Te tuahine Clayton
I te pu‘e tau mahanahana i ma‘iri a‘e nei ua ui mai te mau feia apî tamahine i te hoê uiraa papû maitai. Ua hinaaro ratou ia ite e, eaha te faaotiraa a te Ekalesia no ni‘a i te mau ahu hopuraa miti. Ua mana‘o matou e, e horo‘a i te hoê pahonoraa ia ratou, tera râ, i roto i to matou ti‘araa feia faatere no ratou, ua faaoti matou e, e mea maitai a‘e ia parau ia ratou ia ui roa’tu i te Atua. E nehenehe ta ratou e ani ; e nehenehe ta ratou iho e imi i te pahonoraa e ia farii ratou i te hoê faanahoraa e te hoê iteraa no ni‘a i te mau mana‘o e hotu mai i roto ia ratou e no ni‘a atoa i te huru no te imiraa e no te fariiraa ratou iho i te arata‘iraa no te ra‘i mai, ia tihoi ia ratou ia rave tamau noa i te reira huru raveraa i roto i to ratou oraraa i muri a‘e.
Tamahine matamua
I te taime matamua a haamata ai matou, ua feruri au e, « Ok. Te tahi teie ohipa ê atu e afa‘i i te fare no te tuatapapa ».
Tamahine piti
Na teie ohipa i tauturu ia‘u ia faatata rii atu i te Metua i te Ao ra.
Tamahine matamua
Ua tauturu atoa te reira ia‘u i mua i ta‘u mau tamahine i to‘u paariraa mai.
Tamahine toru
I to‘u hoa haamataraa i te imi i te pahonoraa, e mea vitiviti roa te reira i te tae mai.
Te tuahine Clayton
Ia faaau ana‘e tatou i teie faanahoraa i ni‘a i te parau no te haapiiraa, aita ïa e vahi hau atu i te faufaa i reira e haere ai e imi maori râ te mau papa‘iraa mo‘a.
Tamahine toru
I te matamua, ua tamata papû vau ia imi i te pahonoraa i roto i te mau papa‘iraa mo‘a, e mai te mea ra e, aita to roto.
Tamahine matamua
I to‘u râ faahohonu-roa-raa i te reira, ua tupu i roto ia‘u te hinaaro ia ite atu â e ia imi atu â.
Tamahine toru
Ua tamau noa vau i te imi i te mau irava no ni‘a i te parau no te ahuraa ma te haehaa, mai te haehaa o te vahine parau maitai ra i te haamataraa, aita vau i taa maitai i te auraa o te reira parau. E i muri iho ua pure au – i roto ia‘u, ua hinaaro vau ia farii i te mau pahonoraa papû maitai na roto i te pure e aita hoi au i farii i te reira. Tera râ, i muri a‘e i to‘u fariiraa i ta‘u pahonoraa, ua ite a‘era vau e, e horo‘a noa mai te pure i te Varua e tei roto mau i te mau papa‘iraa mo‘a te pahonoraa, e ere ïa i te hoê noa huru.
Tamahine piti
Ua farii au i te tahi mau pahonoraa, tera râ, e ere ïa i te mea papû roa no te mea ua titauhia ia‘u ia haapa‘o i ta‘u tuhaa e ia haapii na roto i ta‘u iho rave‘a.
Tamahine toru
Te tia’i ra vau ia parauhia mai e, mai te huru e, « teie te tano ia oe ia oomo, eita i te mea ti‘a ia oe i te oomo i tera ». E aita vau e hinaaro mai te reira no te mea, ta‘u ïa tera ma‘itiraa, e aita vau i farii i te ture mau. Tera râ, te oaoa nei au i teie nei i te mea e, teie te pahonoraa tei fariihia e au no te mea, te feruri nei au e, e mea tano a‘e te reira no te mau tamahine paatoa ati a‘e te ao nei.
Tamahine matamua
Ua ite au e, ua fatata rii atu vau i to‘u Metua i te Ao ra e ua putapû to‘u aau, e, e no teie hoa râ mau tamahine, i roto i ta ratou imiraa, i te mau mea atoa no te farii i ta ratou pahonoraa, putapû roa to‘u aau no ratou: ua here roa vau ia ratou.
Te tuahine Clayton
A rave ai tatou i teie faanahoraa e a faaite ai tatou i te mana‘o o to tatou aau e a farii ai i te faaururaa a te Varua, ua riro mai tatou ei hoê mea taa‘e. Ua haapii mai ratou e, te mana‘ona‘o mai nei te Metua i te Ao ra i te mau mea ta ratou e mana‘ona‘o atoa ra. Ua haapii mai ratou e, te here mai nei Oia ia ratou. Ua haapii mai ratou e, te mau mea atoa ta ratou e ani, e faaroo mai Oia e e pahono mai Oia.
Tamahine toru
Te mana‘o nei au e na roto i teie faanahoraa ua ite au e, te fariiraa i te pahonoraa, e ere ïa i te hoê mea no te hoê noa iho taime i roto i te oraraa, e ohipa râ e ti‘a ia‘u ia faaohipa i te mau taime atoa. E no te farii i te reira mau pahonoraa, e mea ti‘a ia‘u ia pure tamau maite noa e ia tai‘o tamau noa i te mau papa‘iraa mo‘a e ia tapea tamau maite noa i taua varua ra i roto ia‘u.
Tamahine matamua
E nehenehe ta‘u e pure Ia’na i te mau taime atoa e hinaaro vau, e tei ô nei Oia no‘u, aita e hi‘oraa. Tei pihai iho noa Oia ia‘u e, e tauturu tamau noa Oia ia‘u i roto i te mau huru fifi atoa.
Tamahine piti
I te mau taime atoa e pe‘ape‘a vau e aore ra, e hinaaro vau i te tauturu, e nehenehe ta‘u e ani Ia’na.
Tamahine matamua
Ua ite au e, o vai au e ua ite au e te ti‘a nei no te aha, e ua ite au e, eaha to‘u huru ia ahu ana‘e au i te mau ahu tano. E ua ite au e, mai te mea e, e ahu vau i te ahu ma te haehaa, e fatata rii atu vau i piha’i iho i to‘u Metua i te Ao ra e i piha’i iho i te Varua.
Tamahine toru
E ohipa maere mau ia hi‘o ana‘e oe i roto i to‘u buka aamu e ia ite e, fatata pauroa te mahana ua pahono mai te Fatu i ta‘u mau pure, e ta‘u mau uiraa.
Te peresideni Thomas S. Monson
E iteahia ia tatou te parau mau i roto i te mau papa‘iraa mo‘a, i roto i te mau haapiiraa a te mau peropheta, te mau haapiiraa no roto mai i to tatou mau metua, e te faaururaa te roaa ia tatou a tuu ai tatou i to tatou na turi i raro no te titau i te tauturu a te Atua.
I te tahi taime te mau pahonoraa maitai roa a‘e o ta te feia apî e farii no ni‘a i te mau uiraa o te oraraa, e iteahia ïa te reira i te taime a tuu ai ratou i to ratou turi i raro no te tiaoro i to tatou Metua i te Ao ra.
E te faaite papû nei au e, mai te mea e, e haamana‘o noa ratou e, e mana‘ona‘o te Fatu ia ratou e e pahono mai hoi i ta ratou mau pure, e ti‘a ïa ia ratou ia upootia i roto i te mau titauraa atoa ta ratou e farerei.