Elder Gérald Caussé
No te Hitu Ahuru
E mea here na Elder Caussé Gérald te taata. « Ei peresideni tĭtĭ i Paris, i Farani, e farerei au rave rahi mau taata no te mau vahi atoa o te ao nei », o ta’na ïa i parau. « A tavini ai au ia ratou, i ite ai au e, hoê â aau to tatou paato‘a e hoê â iteraa papû ia haere tatou i te evanelia ».
Te tavini ra oia ei Hitu Ahuru Area no te Area no Europa too‘a o te râ i te taime a piihia’i oia i roto i te pŭpŭ matamua no te Hitu Ahuru, ua tavini atoa na o Elder Caussé i roto i te hoê episekoporaa, ei arata‘i pŭpŭ no te mau tahu‘a rahi, e ei tauturu i roto i te peresideniraa tĭtĭ.
Fanauhia i Bordeaux, i Farani i te 20 no me 1963 ia Jean Caussé e ia Marie-Blanche Bonnet Caussé, ua faanuu Elder Caussé i Paris i te 19raa o to’na matahiti. I reira ua tavini oia hoê matahiti i roto i te nuu i roto i te toro‘a faatere i NATO. No roto raua Valérie Babin i te hoê â paroita i Paris e ua haamatau raua i reira. No roto mai raua i na utuafare faaroo, area râ, ua matau ihoa raua mai to raua tamariiraa mai. Ua taatihia raua i te 5 no atete 1986 i roto i te hiero no Bern i Tuite, e e pae a raua tamarii.
E toro‘a hi‘opoa maa to Elder Caussé, e e mea maoro to’na raveraa i te ohipa maa, ua roaa ta’na parau ‘Aiihi Tuatoru i te matahiti 1987 mai ESSEC mai, te hoê fare haapiiraa toro‘a i Paris. I te taime a piihia’i oia, e ti‘a faatere oia e e taata faatere oia no te hoê taiete no te ohipa opereraa maa no te mau fare tunuraa maa e no te mau ana‘iraa fare toa rarahi.
Te vai nei te here o Elder Caussé no te pehe i to’na haamataraa i te haapii i te faata‘i i te piana i te hituraa o to’na matahiti. I teie mahana, e faî te himene e te faaotoraa i te hoê tauihaa no te pehe i te fare o Caussé ma, e faata‘i te mau melo atoa o te utuafare i te piana, te fira e aore râ, i te fira iti.
« I to Iesu ma‘itiraa i Ta’na mau Aposetolo, rave rahi o ratou e feia tai‘a, e ua fa‘aru‘e vitiviti roa ratou i ta ratou mau upe‘a e ua pe‘e Ia’na », o te parau ïa a Elder Caussé. « Te ite nei au e, te na reira atoa nei te Ekalesia i te ohiparaa i teie mahana. Te ite nei au e, no ô mai to‘u pi‘iraa i te Fatu na roto mai i Ta’na peropheta, te Peresideni Thomas S. Monson. E pee atoa vau i te Faaora ».