Elder José A. Teixeira
No te Hitu Ahuru
Elder José Augusto Teixeira no te pŭpŭ matamua no te Hitu Ahuru, o oia atoa tei roto i te ootiraa o tei tupu i te tau a faati‘ahia’i te mau misonare o te tau hopea nei ia tomo i roto i te fenua Potiti i te hopea no te matahiti 1975. I te matahiti 1976, ua farii to’na na metua o Fernando Teixeira e o Benilde Teixeira e te toe‘a o te utuafare i te evanelia tei faaho‘i-faahou-hia mai, e ua bapetizohia te taato‘araa o te utuafare i te matahiti 1977.
Hou te reira i tupu ai, ua haere tamau noa Elder Teixeira i te pureraa, e ua faatura i te haamoriraa e ua rave i te mau ohipa e titauhia i te hoê taure‘are‘a apî o tei ti‘aturi. Area râ, te vai ra ta’na mau uiraa no ni‘a i to’na faaroo.
I to te mau misionare aniraa ia’na ia tai‘o i te Buka a Moromona e ia pure no te reira, ua na reira oia. « O te haamataraa ïa o to‘u iteraa papû no te Buka a Moromona e no Iosepha Semita », o ta’na ïa i parau.
Ua fanauhia Elder Teixeira i te 24 no fepuare 1961 i Vila Real, i te fenua Potiti area râ, ua paari mai oia i roto i te oire tahito o te fare haapiiraa tuatoru no Coimbra, e i reira oia i faafariuhia’i i roto i te Ekalesia i te 16raa o to’na matahiti. Mai te mau feia faafariu atoa, titauhia oia ia ‘aro i te mau mana‘o o to’na mau hoa. Inaha râ i muri mai, ua farii to’na mau hoa i ta’na mau ture teitei. « Ua ite ratou e, i to‘u taeraa i roto ia ratou, te vaira te tahi mau mea e ore e nehenehe ia ravehia », o ta’na ïa e haamana‘o nei.
I muri mai i to’na taviniraa i roto i te misioni no Lisbon i Potiti, ua tomo Elder Teixeira i roto i te Nuu na te Reva o Potiti e ua faaea i Oeiras ei tuhaa no te hoê ti‘ahapa no te ao nei oia o NATO. I reira, ua piihia oia ei ti‘a faatere no te mau ohipa haaparareraa a te Ekalesia no te fenua iho. I roto i te hoê apooraa haapiipiiraa, ua farerei oia i te hoê ti‘a faatere faatiti‘aifaro i te mau ohipa haaparareraa oia o Filomena Lopes Teles Grilo, o te noho atoa ra i Oeiras. Ua faaipoipohia raua i roto i te hiero no Bern i te fenua Tuite i te 5 no tiunu 1984 e e metua raua no na tamarii e toru, e piti tamaroa e hoê tamahine.
E mau parau tu‘ite ta Elder Teixeira i roto i te ohipa haapa‘o faufaa e i roto i te faatereraa no te ohipa hou oia a piihia’i, e taata hi‘opo‘a oia no te ao atoa nei na te Ekalesia, e e noho oia i Frankfurt i te fenua Heremani. Ua tavini na o Elder Teixeira ei peresideni mataeinaa, ei peresideni tĭtĭ, ei Hitu Ahuru Area e ei peresideni misioni no Paratira São Paulo Apatoa.