Te mau iteraa rau o te amuiraa
I te Monire i muri mai i te amuiraa rahi, ua farii te mau taata tapa‘o Ve‘a [na te Ekalesia], i te hoê titauraa na roto i te rata uira faauru, ia faaite i te mau iteraa rau o te amuiraa mo‘a e i te tahi atu mau tuhaa o te amuiraa. E faahoho‘araa te rata uira i muri nei, hau atu i te 1.200 pahonoraa i te mau ve‘a a te Ekalesia tei fariihia.
I te po‘ipo‘i mahana maa hou te amuiraa i haamata’i, ua huehue to matou fare i te mau ohipa matarohia o te mahana maa, i î ai ta matou afata teata i te mau hi‘oraa e i te mau tona o te Pŭpŭ Himene a te Fare Menemene i te omuaraa o te amuiraa rahi. Ua haaputu mai maua i ta maua na tamarii iti e ua « haamamu » ia raua no te pure matamua. Ia haere mai te Peresideni Uchtdorf i te pupite no te haamata i teie amuiraa mo‘a, ua taui te huru o to matou utuafare. Ua tuturi matou e maha i mua i te afata teata, e ua î to matou fare i te Varua. Ua ite au i taua taime ra i te hoê huru ê i ni‘a ia‘u i te mea e, ua amui matou i teie taime mo‘a e aita to matou mau ahu i tano no te mau ohipa huenane o teie po‘ipo‘i. Area râ, a ti‘a’i tata‘itahi ai matou i ni‘a no te hopoi i to matou rima i ni‘a i te patururaa, ua î roa to‘u aau i te oaoa. Inaha ua ti‘a matou i ni‘a ei utuafare, e tae noa’tu e ua hopoi atoa te ‘aiu i to’na rima atau i ni‘a, e ua itehia te mo‘araa o te nehenehe noa e itehia i roto i te hiero. Ua ti‘a matou i ni‘a ei mau ite e i to te Varua haapapûraa e, e parau mau.
I muri noa mai, ua haamata faahou te maniania o te mau tamarii e ua taviri faahouhia te puai ia faaroohia te mau feia a‘o area râ, ua vai tamau noa teie taime iti no te hau i roto i to matou fare e i roto i te aau.
Christina N., no Utaha, Mau Hau Amui no Marite
Aita e parau e tano no te faaite i to‘u huru i teie nei amuiraa. Ua puai maitai te Varua ; ua nehenehe ia‘u ia mata‘ita‘i mai to‘u iho fare, e ua ite au i te Varua i te haa‘atiraa ia‘u. Eita vau i te mea itoito roa i teie taime, e i to‘u faarooraa i te Peresideni Monson i te ani manihiniraa mai ia‘u ia ho‘i i roto i te nănă, e au atura e, te parau ti‘a mai nei oia ia‘u. Ua oaoa roa vau i te taato‘araa o te mau a‘oraa. Te paraparau mai nei te Metua i te Ao ra na roto mai ia ratou, e ua ite papû roa vau i te reira. Ua ite au e, e ere au i te mea maitai roa area râ, ua ite au e e mea ti‘a ia‘u ia ho‘i i roto i te ekalesia ia faaamuhia vau e ia haamata apî faahou. Aita vau i fiu i teie amuiraa. No reira ua haere au i ni‘a i te tahua Itenati no te faaroo faahou. Te feruri nei au i te ho‘i i roto i ta‘u paroita i teie hepetoma i muri nei.
Jeanne U.
E mea au roa ia faaroo i te mau parau poro‘i o te amuiraa, ta te peropheta ora ihoa ra, te Peresideni Monson, noa’tu e te noho nei au i te afaraa o te ao nei i te hoê fenua aita â te evanelia e nehenehe ia porohia. Area râ, na roto i te mau rave‘a apî ua nehenehe ia‘u ia amui e ia farii i te Varua e ia faaitoitohia. I te faarooraa i te mau a‘oraa e i te mau iteraa papû i horo‘ahia inaha râ, ua feruri au ahiri te taato‘araa o to tatou mau taea‘e e tuahine e nehenehe ia ite atoa i te mau haamaitairaa e rave rahi o te evanelia. Te pure nei au e, ia tupu te reira eiaha ia maoro roa.
Janryll F.
Te taime puai mau o teie nei amuiraa, o te a‘oraa ïa i horo‘ahia e te Peresideni Uchtdorf no ni‘a i te manureva tei topa i te fenua toetoe no Antartique. Ua faarepurepu te reira i roto ia‘u i te mana‘o e e mea nahea te hoê mea iti na‘ina‘i roa e faatupu ai i te hoê hopea ri‘ari‘a. Ua faaite atoa te reira e noa’tu eaha te atearaa o to tatou hahi-ê-raa i te e‘a afaro e te piriha‘o, titauhia tatou ia farii e, ua hape tatou e e imi tatou i te faaoreraa hara i to tatou Metua here i te Ao ra. Te ite hohonu nei Oia i to tatou oaoa e te here nei ia tatou ia ite tatou i to tatou mau hape, ia haapii no te reira e ia tupu na roto i te reira i te pae varua.
Orion H., no Colorado, Mau Hau Amui no Marite
Ua ui mai to‘u hoa maitai i te fare haapiiraa eaha te ohipa o ta‘u i rave i teie hopea hepetoma. Ua pahono vau ia’na, e na te parau tumu o te amuiraa rahi i iriti i te uputa no ta’na mau uiraa no ni‘a i ta‘u faaroo e i te Buka a Moromona. Ua nehenehe ia‘u ia faaohipa i te mau Hiro‘a Faaroo e ia opere i te tahi mau taa-ê-raa faufaa a to tatou nei Ekalesia i te tahi atu mau ekalesia Keretiano, e ua nehenehe ia‘u ia faaite ma te ateate eaha mau te Buka a Moromona e e mea nahea to’na tu‘atiraa i te Bibilia.
Ua popou roa vau i teie nei rave‘a i horo‘ahia ia‘u ! Ua ite au e, ua arata‘i te Varua ia‘u i roto i ta‘u mau pahonoraa i ta’na mau uiraa, e ahiri e eere i to te amuiraa, eita paha e ti‘a ia‘u ia arata‘ihia e te varua no te pahonora i te reira.
Ellie W., Peretane
Ua faafariuhia mai au i te matahiti 1972, ua mauiui au e 20 matahiti te maoro. Ua itoito faahou mai au a 10 matahiti i teie nei e ua ta‘atihia i roto i te hiero i ta‘u tane, melo faafariu-atoa-hia. Ua here au i te Peresideni Hinckley e ua mana‘o vau eita te tahi atu taata e nehenehe e mono ia’na. I to te peresideni Monson i‘oa i te tuu-raa-hia mai no te hoê patururaa, ua riri-rii-hia vau no te mea ua mana‘o vau e, eita oia e nehenehe e rave i teie nei ohipa. Aue ho‘i to‘u ‘a‘i eta‘eta e ! I te ti‘araa mai te peresideni Monson no te paraparau, ua hi‘o ti‘a vau i roto i to’na mata e ua hi‘o atoa i ta’na mau peu atoa. Ua ite au i taua maramarama e taua ana‘ana ra i roto i to’na na mata o ta‘u i ite na i roto i te mata o to‘u Peresideni here o Hinckley ! Ua î roa vau i te oaoa e i te mauruuru i te taeraa mai te Varua Maitai i roto i teie nei taata – to‘u peropheta apî, te ite e te heheu parau.
Mary Lou R., Mehiko Apî, Mau Hau Amui no Marite
Ua faaitoitohia vau e te Varua i roto i teie nei amuiraa ia taui i to‘u oraraa. Noa’tu e e mea « itoito » ihoa vau i roto i te Ekalesia i roto i to‘u nei oraraa, ua faaitoitohia râ vau e te Varua i roto i teie nei amuiraa. Te mana‘o nei au e, ua parau-ti‘a-hia mai te mau parau poro‘i atoa i ni‘a ia‘u. E haere ïa vau e imi i to‘u mau fetii e i to‘u mau hoa e ia tatarahapa’tu ia ratou no ta‘u mau hapa i rave e ia faaore i ta vera ma mau hape tei haamauiui ia‘u. E hamani maitai au i te feia o te hinaaro ia na reira atoa mai ia‘u e ia pee maite i te hi‘oraa maitai o te Faaora.
Delbert C., Mau Hau Amui no Marite
E faaohou to‘u utuafare i te mau ohiparaa o te pureraa pô utuafare. Na ta‘u tane te faatereraa i te monire i muri mai i te amuiraa. I roto i te tuhaa pureraa o te sabati avatea, ua horo‘a mai Elder Zwick i te hoê haapiiraa no ni‘a i te tape‘araa i ta tatou mau ture teitei. Ua haere au i ni‘a i te tahua Itenati e ti‘i i teie a‘oraa e tu‘u i roto i ta‘u MP3. I reira ua parahi matou ei utuafare no te faaroo faahou i te a‘oraa. Na te reira i horo‘a ia matou te hoê uputa no te hi‘oraa i te mau tumu parau no te ma‘itiraa i te mau hoa maitai, te raveraa i te mau opuaraa maitai e i te opuaraa i te hoê faanahoraa no te oraraa e ta maua tamaiti 14 matahiti.
Gwen D., Washington, Mau Hau Amui no Marite
I roto i te amuiraa mo‘a, ua oaoa, ua haehaa e ua popou vau i te amuiraa i roto i teie amuiraa na to‘u atu fare e ia ti‘a e ia afa‘i i to‘u rima i ni‘a no te paturu i to tatou peropheta apî, te Peresideni Monson. Ua tahe to‘u roimata i to ta‘u tamaiti, 12 matahiti ti‘araa i ni‘a e te Autahu‘araa a Aarona e i to ta‘u tamahine atoa ti‘araa e te Feia Apî Tamahine ia na reira atoa. Na te maitaihope o te Varua i haapapû puai i to‘u aau e e taata ma‘iti-mau-hia Thomas S. Monson e te Fatu ia riro ei upo‘o no Ta’na Ekalesia i teie mahana ! Aita roa e fea‘araa i roto i to‘u feruriraa i te hanahana o to’na piiraa mo‘a.
Maridee H., Mehiko Apî, Mau Hau Amui no Marite
No te mea e otahi au, e i roto i te a‘oraa a Elder Ballard, ua putapu to‘u feruriraa e to‘u aau i te mau rave‘a o tei parauhia no te faaineineraa ia‘u iho nei ia here i ta‘u vahine e ia tavini maitai ia’na e ia faateitei i ta’na mau hopoi‘a ia mama te reira. Aita’tu e mea faufaa i roto i to‘u nei oraraa i teie taime maori râ, te imiraa i te hoê vahine o ta‘u e faaipoipo atu i roto i te hiero e i te utuuturaa i te hoê utuafare ia itehia e ia haapopouhia oia. Te oaoa nei au e te tia‘i nei au no te here ia’na ma to‘u aau atoa, ma to‘u itoito, ma to‘u mana‘o e ma to‘u puai atoa.
Mike S., Florida, Mau hau Amui no Marite