Elder F. Michael Watson
No te Hitu Ahuru
Toru ahuru ma va‘u matahiti ohiparaa i pihai iho i te mau aposetolo e te mau peropheta i te mau mahana atoa, ua riro ïa ei haapuairaa i te iteraa papû o Elder Frank Michael Watson no te pŭpŭ matamua no te Hitu Ahuru.
Ua tavini na o Elder Watson ei tauturu papa‘i parau, ei papa‘i parau no te Pŭpŭ no te Tino Ahuru Ma Piti Aposetolo mai te matahiti 1970 tae atu i te matahiti 1972. Haamata i te matahiti 1972, ua tavini na oia ei tauturu papa‘i parau no te Peresideniraa Matamua e mai te ava‘e eperera o te matahiti 1986 ua tavini oia ei papa‘i parau no te Peresideniraa Matamua.
« Te mau mea o ta‘u i ite i roto i te ohiparaa i te mau mahana tata‘itahi na roto i teie mau matahiti e rave rahi, ua faarahi te reira i to‘u iteraa papû », o ta’na ïa i parau. « Aita e uiraa i roto i to‘u nei feruriraa e te ora nei te Atua, e o Iesu te Mesia, e te taata o Ta’na e pii ua riro ïa ei peropheta Na’na no taua anotau ra ».
Ua fanauhia Elder Watson i te 9 no mati 1943 i te Oire no Spring, i Utaha i te Mau Hau Amui no Marite ia Frank C. e ia Genniel Baxter Watson. Ua tavini oia ei misionare rave tamau i roto i te misioni no Peretane apato‘erau hiti‘a o te râ mai te matahiti 1962 tae atu i te matahiti 1964, apeehia mai e ta’na tau taviniraa i roto i te nuu faaehau mai te matahiti 1966 tae atu i te matahiti 1969, e hoê matahiti o teie nei mau matahiti ua tavini ïa i roto i te Repubilita no Anami apatoa. Ua roaa ta’na parau tu‘ite tuarua nui i te fare haapiiraa tuatoru no Utaha State.
Ua faaipoipohia oia ia Jolene Mann i te 3 no tetepa 1965 i roto i te hiero no Roto Miti. E na metua raua no na tamarii 12. Ua tavini na oia ei peresideni no te pŭpŭ o te mau peresibutero, ei peresideni misioni no te tĭtĭ, ei episekopo, ei peresideni tĭtĭ e ei taata ta‘ati i roto i te hiero no Bountiful i Utaha.
« Ua amui noa vau i pihai iho i te Mau Hui Mana Faatere Rahi i teie mau matahiti nei e te ti‘araa i rotopu ia ratou o te hoê ïa iteraa haehaa », o ta’na ïa i parau. I muri mai i te ohiparaa i pihai iho ia ratou no teie mau tau roa, ua oaoa roa Elder Watson i to’na pii-raa-hia i roto i teie ti‘araa no te haapuai faahou atua â i to’na mau iteraa papû no te mau peropheta e no te mau apotesolo e no te misioni a Te Ekalesia a Iesu Mesia i te Feia Mo‘a i te Mau Mahana Hopea Nei.