Elder Tad R. Callister
No te Hitu Ahuru
Ma te faaoti i te haere i reira te Fatu e tono ai ia’na, te faaite papû nei Elder Tad Richards Callister e, e hopoi mai te taviniraa i te Fatu i te mau haamaitairaa e rave rahi.
« E tauturu te Fatu ia outou noa’tu aita outou e mana‘o ra e, e mea ti‘amâ outou », o te parau ïa a Elder Callister. « E mea rahi a‘e te hoê pi‘iraa i te taata iho, e e pûpû mai te Fatu i Ta’na tauturu. Noa’tu e e mea maniania-ore e te hau Ta’na arata‘iraa, eita râ Oia e vaiiho noa ia outou e o outou ana‘e ».
Ua fanauhia Elder Callister ia Reed Callister e ia Norinne callister i te 17 no titema 1945, i Glendale, Kalifonia, i te Mau Hau Amui no Marite. Ua tavini oia ei misionare rave tamau i roto i te misioni no te pae hiti‘a o te râ o Atlantic States, ei episekopo, ei peresideni tĭtĭ, ei ti‘a retioni, ei Hitu Ahuru Area, e te tavini ra oia ei peresideni misioni no Canada Toronto hiti‘a o te râ a piihia’i oia i roto i te pŭpŭ piti no te Hitu Ahuru.
Ua riro te taviniraa ei peresideni misioni ei hoê iteraa rau aita e nehenehe e parau i to’na faaauraa no Elder Callister, o tei here i te haapa‘oraa i te taime no to’na utuafare.
« E haapii outou i te here i te mau misionare mai te mea ra e mau tamaroa e e mau tamahine ratou na outou », o ta’na ïa i parau.
I muri mai i te roaaraa o ta’na parau tu‘ite tuarua nui i roto i te ohipa haapa‘o faufaa i te fare haapiiraa tuatoru no Brigham Young, te hoê parau tu‘ite no te ture i UCLA e te hoê parau ‘aiihi tuatoru i roto i te ture no te tuteraa no te fare haapiiraa tuatoru no New York, ua faaohipa Elder Callister i te reira i roto i te ture e 34 matahiti i roto i te hoê taiete a te utuafare i Los Angeles i Kalifornia.
Te faaohiparaa i te mau parau tumu i roto i te ti‘araa ohipa e i te mau ohipa a te taata iho, ua parau Elder Callister e, « te faaohiparaa i te ture ua riro ïa ei haapiiraa no te haavîraa i te hi‘opo‘araa i te niu o te hoê fifi, te iteraa e eiaha e horo noa i te mau hopearaa, e ia maramarama e, e hinaaro outou e ite i te taato‘araa o te mau ohipa i tupu hou a rave ai i te hoê faaotiraa. Oia’toa, te ti‘aturi nei au e e titau mai te Fatu ia rave outou i ta outou ohipa i roto i te imiraa i te heheuraa a te taata iho ».
Ua matau Elder Callister i ta’na vahine o Kathryn Louise Saporiti a haere ai raua i BYU e ua faaipoipohia i roto i te hiero no Los Angeles i Kalifonia i te 20 no titema 1968. E ono a raua mau tamarii.