1 Ug karon nahitabo nga sa dihang si Moroni nakadawat niini nga sulat nadasig ang iyang kasingkasing, ug napuno sa hilabihan ka dako nga kamaya tungod sa pagkamatinud-anon ni Pahoran, nga dili usab siya usa ka maluibon sa kagawasan ug sa kawsa sa iyang nasod.

2 Apan nagsubo usab siya sa hilabihan tungod sa pagkadaotan niadtong kinsa mipapahawa ni Pahoran gikan sa hukmanan, oo, ug sa kataposan tungod niadtong mirebelde batok sa ilang nasod ug usab sa ilang Dios.

3 Ug nahitabo nga si Moroni midala og gamay nga pundok sa mga tawo, sumala sa gitinguha ni Pahoran, ug mihatag kang Lehi ug Teancum og kamandoan sa nahibilin sa iyang kasundalohan, ug mimartsa paingon sa yuta sa Gideon.

4 Ug gipataas niya ang bandila sa kalingkawasan sa bisan asa nga dapit nga iyang sudlan, ug midala ni bisan kinsa nga kasundalohan nga iyang makuha sa tanan niyang pagmartsa paingon sa yuta sa Gideon.

5 Ug nahitabo nga liboan ang nagpanon ngadto sa iyang bandila, ug migamit sa ilang mga espada sa pagpanalipod sa ilang kagawasan, aron sila dili maulipon.

6 Ug sa ingon niana, sa dihang napundok ni Moroni si bisan kinsa nga mga tawo nga iyang nakuha sa tanan niyang pagmartsa, miabot siya sa yuta sa Gideon; ug pinaagi sa pakighiusa sa iyang kasundalohan sa kasundalohan ni Pahoran nahimo silang hilabihan kalig-on, gani labaw kalig-on kaysa mga tawo ni Pachus, kinsa mao ang hari niadtong mga masupilon nga miabog sa mga tawo nga gawasnon gikan sa yuta sa Zarahemla ug nanag-iya sa yuta.

7 Ug nahitabo nga si Moroni ug si Pahoran milugsong uban sa ilang kasundalohan ngadto sa yuta sa Zarahemla, ug misulong batok sa siyudad, ug nakigsangka sa mga tawo ni Pachus, mao nga nagkagubat sila.

8 Ug tan-awa, si Pachus napatay ug ang iyang mga tawo gibilanggo, ug si Pahoran gipahiuli sa iyang hukmanan.

9 Ug ang mga tawo ni Pachus nakadawat sa ilang husay, sumala sa balaod, ug kadtong mga tawo usab nga makihari kinsa nabihag ug gibalhog sa bilanggoan; ug gisilotan sila sumala sa balaod; oo, kadtong mga tawo ni Pachus ug kadtong mga tawo nga makihari, bisan kinsa kanila nga dili mogamit sa mga hinagiban sa pagpanalipod sa ilang nasod, apan makig-away batok niini, gipahamtangan sa kamatayon.

10 Ug sa ingon niana kinahanglan nga sundon sa higpit kini nga balaod alang sa kaseguroan sa ilang nasod; oo, ug si bisan kinsa nga mapamatud-an nga naglimod sa ilang kagawasan silotan dayon sumala sa balaod.

11 Ug sa ingon niana natapos ang ikakatloan nga tuig sa paghari sa mga maghuhukom sa katawhan ni Nephi; human nga napahiuli ni Moroni ug ni Pahoran ang kalinaw sa yuta sa Zarahemla, taliwala sa ilang kaugalingon nga katawhan, human nga nakapahamtang og kamatayon ngadto sa tanan kinsa dili matinud-anon sa kawsa sa kagawasan.

12 Ug nahitabo sa pagsugod sa ikakatloan ug usa nga tuig sa paghari sa mga maghuhukom sa katawhan ni Nephi, si Moroni misugo dayon nga ang probisyon kinahanglan ipadala, ug usab ang kasundalohan nga unom ka libo ka tawo kinahanglan ipadala ngadto kang Helaman, aron motabang kaniya sa pagpanalipod niana nga bahin sa yuta.

13 Ug siya usab misugo nga ang kasundalohan nga unom ka libo ka tawo, nga magdala og igo nga gidaghanon sa pagkaon ipadala ngadto sa kasundalohan ni Lehi ug ni Teancum. Ug nahitabo nga gibuhat kini aron sa paglig-on sa yuta batok sa mga Lamanita.

14 Ug nahitabo nga si Moroni ug si Pahoran, nagbilin og daghang tawo didto sa yuta sa Zarahemla, mimartsa uban sa daghang tawo paingon sa yuta sa Nephihah, nagtinguha nga pildihon ang mga Lamanita niana nga siyudad.

15 Ug nahitabo nga samtang nagmartsa sila paingon sa yuta, nakadakop sila og daghang tawo sa mga Lamanita, ug mipatay og daghan kanila, ug mikuha sa ilang mga probisyon ug sa ilang mga hinagiban sa gubat.

16 Ug nahitabo human nga sila midakop kanila, sila mimando kanila nga mosulod sa usa ka pakigsaad nga sila dili na gayod mogamit sa ilang mga hinagiban sa gubat batok sa mga Nephita.

17 Ug sa dihang nakasulod na sila niini nga pakigsaad ilang gipadala sila nga mopuyo kauban sa katawhan ni Ammon, ug sila nga wala mapatay may gidaghanon nga mga upat ka libo.

18 Ug nahitabo nga sa dihang sila mipalakaw na kanila, mipadayon sila sa ilang pagmartsa paingon sa yuta sa Nephihah. Ug nahitabo nga sa dihang nakaabot na sila sa siyudad sa Nephihah, gipabarog nila ang ilang mga tolda sa kapatagan sa Nephihah, nga duol sa siyudad sa Nephihah.

19 Karon si Moroni nagtinguha nga manggawas ang mga Lamanita sa pagpakiggubat batok kanila didto sa kapatagan; apan ang mga Lamanita, nga nasayod sa ilang hilabihan nga kaisog, ug nagtan-aw sa ilang hilabihan nga kadaghan, busa wala sila mangahas sa paggawas batok kanila; busa wala sila makiggubat nianang adlawa.

20 Ug sa dihang miabot ang kagabhion, milakaw si Moroni sa mangitngit nga kagabhion, ug miadto sa ibabaw sa paril sa pagpaniid asa nga bahin sa siyudad nagkampo ang kasundalohan nga Lamanita.

21 Ug nahitabo nga tua sila sa dapit sa silangan, sa may ganghaan; ug silang tanan nangatulog. Ug karon si Moroni mibalik ngadto sa iyang kasundalohan, ug mimando nga magdali sa pag-andam og lig-ong mga pisi ug mga hagdanan, aron ipatighulog gikan sa ibabaw sa paril ngadto sa sulod nga bahin sa paril.

22 Ug nahitabo nga si Moroni mimando nga ang iyang mga tawo momartsa ug mosaka sa ibabaw sa paril, ug mopatighulog sa ilang kaugalingon ngadto niana nga dapit sa siyudad, oo, gani sa kasadpan, nga wala kampohi sa kasundalohan nga Lamanita.

23 Ug nahitabo nga silang tanan mipatighulog didto sa siyudad sa pagkagabii, pinaagi sa lig-on nilang mga pisi ug sa ilang mga hagdanan; ug sa ingon niana nga pagkabuntag silang tanan diha na sa sulod sa mga paril sa siyudad.

24 Ug karon, sa dihang nakamata na ang mga Lamanita ug nakita nga ang kasundalohan ni Moroni naa na sa sulod sa mga paril, nangahadlok kaayo sila, mao nga nanglayas sila agi sa dakong agianan.

25 Ug karon sa dihang nakita ni Moroni nga nanglayas sila gikan kaniya, mimando siya nga moasdang ang iyang mga tawo batok kanila, ug daghan ang napatay, ug miliyok sa kadaghanan, ug mibilanggo kanila; ug ang nahibilin kanila nanglayas ngadto sa yuta sa Moroni, nga anaa sa mga utlanan sa may baybayon.

26 Sa ingon niana naangkon ni Moroni ug ni Pahoran ang siyudad sa Nephihah nga walay nawala nga usa ka kalag; ug dihay daghan nga Lamanita ang napatay.

27 Karon nahitabo nga daghan sa mga binilanggo nga Lamanita nagtinguha nga moipon sa katawhan ni Ammon ug mahimong gawasnon nga katawhan.

28 Ug nahitabo nga kutob sa nagtinguha, ngadto kanila gihatag ang unsay ilang mga gitinguha.

29 Busa, ang tanang binilanggo nga Lamanita miipon sa katawhan ni Ammon, ug misugod sa pagtrabaho sa hilabihan, mitikad sa yuta, mipatubo sa tanang matang sa lugas, ug sa gagmayng kahayopan ug sa dagkong kahayopan sa tanang matang; ug sa ingon niana ang mga Nephita nahupay gikan sa dako nga palas-anon; oo, mao nga nahupay sila gikan sa tanan nga binilanggo nga Lamanita.

30 Karon nahitabo nga si Moroni, human niya maangkon ang siyudad sa Nephihah, nga nakadala og daghang binilanggo, nga nakapakunhod sa hilabihan sa kasundalohan sa mga Lamanita, ug nakabawi sa daghang Nephita nga nabilanggo, nakapalig-on sa hilabihan sa kasundalohan ni Moroni; busa si Moroni miadto gikan sa yuta sa Nephihah ngadto sa yuta sa Lehi.

31 Ug nahitabo nga sa dihang ang mga Lamanita nakakita nga si Moroni misulong batok kanila, nahadlok na usab sila ug nanglayas gikan sa kasundalohan ni Moroni.

32 Ug nahitabo nga si Moroni ug ang iyang kasundalohan migukod kanila gikan sa usa ka siyudad ngadto sa lain nga siyudad, hangtod nga ilang nasugatan si Lehi ug si Teancum; ug ang mga Lamanita milayas gikan ni Lehi ug ni Teancum, gani hangtod sa ubos sa mga utlanan sa may baybayon, hangtod nga miabot sila sa yuta sa Moroni.

33 Ug ang kasundalohan sa mga Lamanita nagkapundok, mao nga nagkahiusa sila didto sa yuta sa Moroni. Karon si Ammoron, ang hari sa mga Lamanita, uban usab kanila.

34 Ug nahitabo nga si Moroni ug si Lehi ug si Teancum nagkampo uban sa ilang kasundalohan libot sa mga utlanan sa yuta sa Moroni, mao nga ang mga Lamanita naliyokan dapit sa mga utlanan sa may kamingawan sa habagatan, ug sa mga utlanan sa may kamingawan dapit sa silangan.

35 Ug sa ingon niana sila nagkampo nianang gabhiona. Kay tan-awa, ang mga Nephita ug ang mga Lamanita gipangkapoy usab tungod sa kalayo sa ilang pagmartsa; busa wala sila maghunahuna og bisan unsa nga taktika panahon sa kagabhion, gawas ni Teancum; kay nasuko siya sa hilabihan ni Ammoron, mao nga nagtuo siya nga si Ammoron, ug si Amalickiah nga iyang igsoon nga lalaki, maoy hinungdan niining dako ug taas nga gubat tali kanila ug sa mga Lamanita, nga mao ang hinungdan sa daghan nga gubat ug pagbanaw sa dugo, oo, ug daghan nga kagutom.

36 Ug nahitabo nga si Teancum sa iyang kasuko miadto sa kampo sa mga Lamanita, ug mipatighulog sa iyang kaugalingon luwak sa mga paril sa siyudad. Ug milakaw siya nga nagdala og pisi gikan sa usa ka dapit ngadto sa usa ka dapit, hangtod nga nakit-an niya ang hari; ug gitirahan niya og bangkaw nga mitaop gayod duol sa iyang kasingkasing. Apan tan-awa, napukaw pa sa hari ang iyang mga sulugoon sa wala pa siya mamatay, mao nga gigukod nila si Teancum, ug mipatay kaniya.

37 Karon nahitabo nga sa dihang si Lehi ug si Moroni nasayod nga si Teancum patay na naguol sila pag-ayo; kay tan-awa, usa siya ka tawo nga nakig-away nga maisogon alang sa iyang nasod, oo, usa ka tinuod nga higala sa kalingkawasan; ug nag-antos sa hilabihan ka daghan nga mapait nga kasakit. Apan tan-awa, siya patay na, ug gilubong na sa yuta.

38 Karon nahitabo nga si Moroni mimartsa pagkaugma, ug misulong sa mga Lamanita, hangtod nga sila mipatay og daghan kaayo kanila; ug ila silang naabog gikan sa yuta; ug nanglayas sila, gani sila wala na gayod mamalik niana nga panahon batok sa mga Nephita.

39 Ug sa ingon niana natapos ang ikakatloan ug usa nga tuig sa paghari sa mga maghuhukom sa katawhan ni Nephi; ug sa ingon niana nakahiagom sila og mga gubat, ug mga pagbanaw sa dugo, ug kagutom, ug kasakit, sulod sa daghang katuigan.

40 Ug dihay mga pagpamatay, ug mga panagbingkil, ug mga panagsumpaki, ug tanan nga matang sa pagkadaotan sa katawhan ni Nephi; bisan pa niana alang sa mga matarong, oo, tungod sa mga pag-ampo sa mga matarong, sila naluwas.

41 Apan tan-awa, tungod sa labihan ka taas nga gubat tali sa mga Nephita ug sa mga Lamanita daghan ang nagmagahi, tungod sa labihan ka taas sa gubat; ug daghan ang nahumok tungod sa ilang mga kasakit, nga sa ingon nagpaubos sila sa ilang mga kaugalingon atubangan sa Dios, gani sa hilabihan nga pagpaubos.

42 Ug nahitabo nga human malig-on ni Moroni kadtong mga bahin sa yuta nga labing bantang sa mga Lamanita, hangtod nga igo na ang ilang kalig-on, mibalik siya sa siyudad sa Zarahemla; ug si Helaman usab mibalik sa dapit sa iyang kabilin; ug sa makausa pa miugmad og kalinaw taliwala sa katawhan ni Nephi.

43 Ug gitugyan ni Moroni ang kamandoan sa iyang kasundalohan ngadto sa mga kamot sa iyang anak nga lalaki, kansang ngalan mao si Moronihah; ug mipahulay siya sa iyang kaugalingong balay aron mapahimuslan niya sa kalinaw ang nahibilin sa iyang mga adlaw.

44 Ug si Pahoran mibalik sa iyang hukmanan; ug gidawat na usab ni Helaman ang pagsangyaw ngadto sa katawhan sa pulong sa Dios; kay tungod sa daghang gubat ug panagbingkil gikinahanglan nga ang usa ka lagda himoon na usab sa simbahan.

45 Busa, si Helaman ug ang iyang kaigsuonan milakaw, ug mipadayag sa pulong sa Dios nga adunay dakong gahom ngadto sa pagkombinser sa daghang katawhan bahin sa ilang pagkadaotan, nga mao ang hinungdan nga sila naghinulsol sa ilang mga sala ug nabunyagan ngadto sa Ginoo nga ilang Dios.

46 Ug nahitabo nga gitukod na usab nila ang simbahan sa Dios, sa tibuok nga yuta.

47 Oo, ug gihimo ang mga lagda mahitungod sa balaod. Ug ang ilang mga maghuhukom, ug ang ilang labaw nga mga maghuhukom gipili.

48 Ug ang katawhan ni Nephi misugod na usab sa pag-uswag sa yuta, ug misugod sa pagdaghan ug nag-anam na usab ka hilabihan kalig-on dinhi sa yuta. Ug nagsugod sila sa hilabihan nga pagkaadunahan.

49 Apan bisan pa sa ilang kaadunahan, o sa ilang kalig-on, o sa ilang pag-uswag, wala sila mabayaw sa garbo sa ilang mga panan-aw; ni sila mihinay sa paghinumdom sa Ginoo nga ilang Dios; apan nagmapainubsanon sila sa ilang mga kaugalingon sa hilabihan diha sa iyang atubangan.

50 Oo, nahinumdom sila unsa ka dako ang mga butang nga nahimo sa Ginoo alang kanila, nga siya miluwas kanila gikan sa kamatayon, ug gikan sa pagkaulipon, ug gikan sa pagkabilanggo, ug gikan sa tanang matang sa mga kasakit, ug siya miluwas kanila gikan sa mga kamot sa ilang mga kaaway.

51 Ug nag-ampo sila sa Ginoo nga ilang Dios sa kanunay, nga sa ingon ang Ginoo mipanalangin kanila, sumala sa iyang pulong, mao nga nag-anam sila og kalig-on ug miuswag dinhi sa yuta.

52 Ug nahitabo nga kining tanan nga butang nahimo. Ug si Helaman namatay, sa ikakatloan ug lima nga tuig sa paghari sa mga maghuhukom sa katawhan ni Nephi.