1 Ug nahitabo nga ang mga Amalekita ug ang mga Amulonita ug ang mga Lamanita kinsa didto sa yuta sa Amulon, ug usab sa yuta sa Helam, ug didto sa yuta sa Jerusalem, ug sa kataposan, sa tibuok yuta nga naglibot niini, kinsa wala makabig ug wala modala diha kanila sa ngalan nga Anti-Nephi-Lehi, gihulhogan sa mga Amalekita ug sa mga Amulonita nga masuko batok sa ilang kaigsoonan.

2 Ug ang ilang pagdumot nahimong hilabihan nga kapintas batok kanila, gani hangtod nga sila misugod sa pagrebelde batok sa ilang hari, hangtod nga sila midumili nga siya ang mahimo nilang hari; busa, mialsa sila batok sa katawhan sa Anti-Nephi-Lehi.

3 Karon ang hari mitugyan sa gingharian ngadto sa iyang anak nga lalaki, ug gitawag niya ang iyang ngalan og Anti-Nephi-Lehi.

4 Ug ang hari namatay sa samang tuig nga gisugdan sa mga Lamanita ang pagpangandam sa pakiggubat batok sa katawhan sa Dios.

5 Karon sa dihang si Ammon ug ang iyang kaigsoonan ug ang tanan nga miuban kaniya nakakita sa mga pagpangandam sa mga Lamanita sa paglaglag sa ilang kaigsoonan, miadto sila sa yuta sa Midian, ug didto si Ammon nakigkita sa iyang tanang kaigsoonan; ug gikan didto miadto sila sa yuta sa Ishmael aron makahimo sila og pulong-pulong uban ni Lamoni ug usab sa iyang igsoon nga lalaki nga si Anti-Nephi-Lehi, sa unsay angay nilang buhaton aron sa pagpanalipod sa ilang kaugalingon batok sa mga Lamanita.

6 Karon walay bisan usa ka tawo didto sa tanang katawhan nga nakabig sa Ginoo ang mogamit sa hinagiban batok sa ilang kaigsoonan; wala, gani dili sila mohimo og bisan unsang mga pagpangandam alang sa gubat; oo, ug ang ilang hari usab misugo kanila nga dili gayod sila.

7 Karon, mao kini ang mga pulong nga iyang gisulti sa katawhan kabahin sa hinungdan: Magpasalamat ako sa akong Dios, sa akong hinigugma nga katawhan, nga ang atong gamhanan nga Dios sa kaayo mipadala niining atong kaigsoonan, nga mga Nephita, ngari kanato aron sa pagsangyaw kanato, ug sa pagpakita kanato sa mga tradisyon sa atong daotan nga mga amahan.

8 Ug tan-awa, magpasalamat ako sa akong gamhanan nga Dios nga siya mihatag kanato og usa ka bahin sa iyang Espiritu aron sa paglukmay sa atong mga kasingkasing, nga kita nakapasiugda og kauyonan niini nga kaigsoonan, ang mga Nephita.

9 Ug tan-awa, ako usab magpasalamat sa akong Dios, nga pinaagi sa pagpasiugda niini nga kauyonan kita nakombinser sa atong mga sala, ug sa daghang pagpatay nga atong nabuhat.

10 Ug magpasalamat usab ako sa akong Dios, oo, sa akong gamhanan nga Dios, nga siya mitugot kanato nga makahinulsol kita niining mga butanga, ug usab nga siya mipasaylo kanato sa atong daghang sala ug sa mga pagpatay nga atong nabuhat, ug mitangtang sa mga kasaypanan gikan sa atong kasingkasing, pinaagi sa matarong nga mga buhat sa iyang Anak.

11 Ug karon tan-awa, akong kaigsoonan, kay mao kini ang tanan nga atong mahimo (ingon nga kita mao ang labing nahisalaag sa tanang katawhan) nga maghinulsol sa tanan natong mga sala ug sa daghang pagpatay nga atong nabuhat, ug sa pag-awhag sa Dios sa pagtangtang niini gikan sa atong kasingkasing, kay mao kini ang tanan nga atong mahimo aron makahimo og igo nga paghinulsol sa atubangan sa Dios aron siya motangtang sa atong lama—

12 Karon, akong labing hinigugma nga kaigsoonan, tungod kay ang Dios mikuha sa atong mga lama, ug ang atong mga espada nahimong masinaw, busa dili na nato butangan og lama ang atong mga espada sa mga dugo sa atong kaigsoonan.

13 Tan-awa, sultihan ko kamo, Dili, atong ibilin ang atong mga espada nga dili kini malamaan sa dugo sa atong kaigsoonan; kay basin og, kon kita molama pag-usab sa atong mga espada dili na kini mahugasan aron mosinaw pinaagi sa dugo sa Anak sa atong gamhanan nga Dios, nga ipaagas alang sa pag-ula sa atong mga sala.

14 Ug ang gamhanan nga Dios adunay kaluoy kanato, ug mipahibalo niining mga butanga ngari kanato aron kita dili mamatay; oo, ug mipahibalo niining mga butanga ngari kanato sa sinugdanan, tungod kay gihigugma niya ang atong mga kalag ingon nga siya nahigugma sa atong mga anak; busa, pinaagi sa iyang kaluoy miduaw siya kanato pinaagi sa iyang mga anghel, aron ang plano sa kaluwasan mapahibalo ngari kanato ingon man usab sa umaabot nga kaliwatan.

15 O, pagkamaluluy-on sa atong Dios! Ug karon tan-awa, tungod kay kini lamang ang atong mahimo aron nga matangtang ang atong mga lama gikan kanato, ug ang atong mga espada mahimo nga sinaw, tagoan nato kini aron magpadayon ang kasinaw, ingon nga usa ka pagpamatuod ngadto sa atong Dios sa kataposan nga adlaw, o niana nga adlaw nga kita pagadad-on aron mobarog sa iyang atubangan aron pagahukman, nga wala nato butangi og lama ang atong mga espada sa mga dugo sa atong kaigsoonan sukad nga siya mihatag sa iyang pulong kanato ug mihimo kanato nga limpyo pinaagi niini.

16 Ug karon, akong kaigsoonan, kon ang atong kaigsoonan magtinguha sa paglaglag kanato, tan-awa, itago nato ang atong mga espada, oo, gani ilubong nato kini sa ilawom sa yuta, aron magpadayon ang kasinaw niini, isip usa ka pagpamatuod nga kita wala na gayod mogamit niini, sa kataposan nga adlaw; ug kon ang atong kaigsoonan molaglag kanato, tan-awa, kita moadto sa atong Dios ug maluwas.

17 Ug karon nahitabo nga sa dihang natapos na ang hari sa pagsulti niini nga mga panultihon, ug ang tanang katawhan nagkatigom, gikuha nila ang ilang mga espada, ug ang tanang hinagiban nga gigamit sa pagpaagas sa dugo sa tawo, ug gilubong nila kini sa ilawom sa yuta.

18 Ug gibuhat nila kini, tungod kay maoy ilang pagsabot nga usa ka pagpamatuod ngadto sa Dios, ug usab ngadto sa mga tawo, nga sila dili na gayod mogamit pag-usab og mga hinagiban sa pagpaagas sa dugo sa tawo; ug gibuhat nila kini, nga nagmatuod ug nagpakigsaad sa Dios, kay sa magpaagas sa dugo sa ilang kaigsoonan itugyan nila ang ilang kaugalingon nga mga kinabuhi; ug kay sa mokuha gikan sa usa ka igsoon nga lalaki sila mohatag kaniya; ug kay sa mogahin sa ilang mga adlaw sa katapolan sila motrabaho pag-ayo gamit ang ilang mga kamot.

19 Ug sa ingon niana nasabtan nato nga, sa dihang kini nga mga Lamanita nadala sa pagtuo ug sa pagkasayod sa kamatuoran, nahimo silang lig-on, ug gani mag-antos bisan hangtod sa kamatayon kay sa makahimo og sala; ug sa ingon niana nasabtan nato nga gilubong nila ang ilang mga hinagiban sa kalinaw, o gilubong nila ang mga hinagiban sa gubat, alang sa kalinaw.

20 Ug nahitabo nga ang ilang kaigsoonan, ang mga Lamanita, naghimo og mga pagpangandam alang sa gubat, ug misulong sa yuta sa Nephi sa katuyoan sa paglaglag sa hari, ug sa pagbutang og lain puli kaniya, ug usab sa paglaglag sa katawhan sa Anti-Nephi-Lehi gikan sa yuta.

21 Karon sa dihang ang katawhan nakakita nga sila nagpadulong na batok kanila nanggawas sila aron sa pagsugat kanila, ug mihapa sa ilang mga kaugalingon sa yuta diha sa ilang atubangan, ug nagsugod sa pagtawag sa ngalan sa Ginoo; ug sa ingon niana anaa sila niini nga pagkabutang sa dihang ang mga Lamanita nagsugod sa pag-ataki kanila, ug nagsugod sa pagpamatay kanila pinaagi sa espada.

22 Ug sa ingon niana nga walay gihimo nga bisan unsa nga pagsukol, nakapatay sila og usa ka libo ug lima kanila; ug nasayod kita nga sila bulahan, kay sila mipanaw na aron sa pagpuyo uban sa ilang Dios.

23 Karon sa dihang ang mga Lamanita nakakita nga ang ilang kaigsoonan dili managan gikan sa ilang mga espada, ni sila manglikay paingon sa tuo o sa wala, apan sila mihigda ug magpakamatay, ug midayeg sa Dios bisan sa akto gayod sa kamatayon pinaagi sa espada—

24 Karon sa dihang ang mga Lamanita nakakita niini mihunong sila sa pagpatay kanila; ug dihay daghan kansang mga kasingkasing naluoy tungod niadtong ilang kaigsoonan kinsa nangamatay pinaagi sa espada, kay sila naghinulsol sa mga butang nga ilang nabuhat.

25 Ug nahitabo nga gipanglabay nila ang ilang mga hinagiban sa gubat, ug dili na sila mogamit niini pag-usab, kay gisakitan sila sa mga pagpatay nga ilang nabuhat; ug nagpaubos sila sama sa ilang kaigsoonan, misalig sa mga kaluoy kansang mga bukton gibakyaw aron sa pagpatay kanila.

26 Ug nahitabo nga ang katawhan sa Dios nadugangan nianang adlawa og mas daghan pa kay niadtong gipamatay; ug kadtong gipamatay mga tawo nga matarong, busa kita walay katarongan nga magduhaduha nga sila naluwas.

27 Ug walay usa ka tawong daotan taliwala kanila ang gipatay; apan dihay labaw pa sa usa ka libo ang nadala sa kahibalo sa kamatuoran; sa ingon niana nasabtan nato nga ang Ginoo molihok sa daghan nga paagi alang sa kaluwasan sa iyang katawhan.

28 Karon ang labing daghan niadtong mga Lamanita nga mipatay sa daghan kaayo sa ilang kaigsoonan mga Amalekita ug mga Amulonita, ang labing daghan kanila mga sumusunod sa kapunongan sa mga Nehor.

29 Karon, kadtong mipasakop sa katawhan sa Ginoo, walay usa nga mga Amalekita o mga Amulonita, o mga sumusunod sa kapunongan sa mga Nehor, apan tinuod sila nga mga kaliwat ni Laman ug ni Lemuel.

30 Ug sa ingon niana yano natong masabtan, nga human ang usa ka katawhan malamdagi pinaagi sa Espiritu sa Dios, ug makaangkon og dakong kahibalo sa mga butang kalabot sa pagkamatarong, ug unya mahisalaag sa pagpakasala ug paglapas, mas molabaw pa sila ka tig-a, ug sa ingon niana ang ilang kahimtang mas labaw pa ka daotan kay sa wala pa sila masayod niining mga butanga.