1 Kay nahitabo human sa akong tinguha nga mahibalo sa mga butang nga nakita sa akong amahan, ug nagatuo nga ang Ginoo makapahibalo niini ngari kanako, samtang ako naglingkod nga namalandong sa akong kasingkasing gidala ako sa Espiritu sa Ginoo, oo, ngadto sa hilabihan ka taas nga bukid, nga wala pa nako sukad makita, ug wala pa nako sukad matunob sa akong tiil.

2 Ug ang Espiritu miingon ngari kanako: Tan-awa, unsay imong gitinguha?

3 Ug ako miingon: Nagtinguha ako nga makakita sa mga butang nga nakita sa akong amahan.

4 Ug ang Espiritu misulti kanako: Motuo ka ba nga ang imong amahan nakakita sa kahoy nga iyang gipamulong?

5 Ug ako miingon: Oo, ikaw nahibalo nga ako mituo sa tanan nga pulong sa akong amahan.

6 Ug dihang nakapamulong ako niini nga mga pulong, ang Espiritu mituaw sa kusog nga tingog, nga nag-ingon: Hosanna ngadto sa Ginoo, ang labing halangdon nga Dios; kay siya ang Dios sa tibuok yuta, oo, gani ang labaw sa tanan. Ug bulahan ikaw, Nephi, tungod kay ikaw mituo sa Anak sa labing halangdon nga Dios; mao nga, ikaw makakita sa mga butang nga imong gitinguha.

7 Ug tan-awa kini nga butang ihatag diha kanimo isip timailhan, nga human nga imong makita ang adunay bunga nga kahoy nga natilawan sa imong amahan, makita usab nimo ang usa ka tawo nga mokunsad gikan sa langit, ug kaniya ikaw mosaksi; ug human nga ikaw makasaksi kaniya ikaw mopamatuod nga kini ang Anak sa Dios.

8 Ug nahitabo nga ang Espiritu miingon kanako: Tan-awa! Ug ako mitan-aw ug nakakita og kahoy; ug sama kini niadtong kahoy nga nakita sa akong amahan; ug ang katahom niini dili hilabwan, oo, labaw pa sa tanang matahom; ug ang kaputi niini labaw sa kaputi sa gipadpad nga niyebe.

9 Ug nahitabo nga human nga ako nakakita sa kahoy, miingon ako sa Espiritu: Nahibalo ako nga ikaw mipakita ngari kanako sa kahoy nga bililhon labaw sa tanan.

10 Ug miingon siya kanako: Unsay imong gitinguha?

11 Ug miingon ako ngadto kaniya: Gusto ko nga mahibalo sa kahulogan niini—kay nakigsulti ako kaniya sama sa tawo nga nakigsulti og laing tawo; kay akong nakita nga ang iyang pamayhon sama sa tawo; bisan pa niana, nahibalo ko nga kadto mao ang Espiritu sa Ginoo; ug nakigsulti siya kanako sama sa tawo nga nakigsulti ngadto sa lain.

12 Ug nahitabo nga miingon siya ngari kanako: Tan-awa! Ug ako mitan-aw aron makita siya, ug wala na ako makakita kaniya; kay siya nawala na sa akong atubangan.

13 Ug nahitabo nga ako mitan-aw ug nakita ang dakong siyudad sa Jerusalem, ug usab ang uban pang mga siyudad. Ug nakakita ako sa siyudad sa Nazaret; ug diha sa siyudad sa Nazaret nakakita ako og usa ka birhen, ug siya hilabihan kaanyag ug kaputi.

14 Ug nahitabo nga nakakita ako nga miabli ang kalangitan; ug usa ka anghel ang nanaog ug mibarog sa akong atubangan; ug miingon siya kanako: Nephi, unsay imong nakita?

15 Ug miingon ako kaniya: Usa ka birhen, labing matahom ug maanyag labaw pa sa ubang mga birhen.

16 Ug misulti siya kanako: Nahibalo ka ba sa pagpaubos sa Dios ngadto sa tawo?

17 Ug miingon ako kaniya: Nahibalo ako nga siya nahigugma sa iyang mga anak; bisan pa niana, ako wala mahibalo sa kahulogan sa tanan nga butang.

18 Ug miingon siya ngari kanako: Tan-awa, ang birhen nga imong nakita mao ang inahan sa Anak sa Dios, sumala sa kahimtang sa unod.

19 Ug nahitabo nga nakakita ako nga gidala siya sa Espiritu; ug human siya gidala sa Espiritu sulod sa usa ka panahon nga ang anghel namulong kanako, nga nag-ingon: Tan-awa!

20 Ug ako mitan-aw ug nakakita na usab sa birhen, nga nagsapnay og bata sa iyang mga bukton.

21 Ug ang anghel miingon ngari kanako: Tan-awa ang Kordero sa Dios, oo, gani ang Anak sa Mahangtoron nga Amahan! Nahibalo ka ba sa kahulogan sa kahoy nga nakita sa imong amahan?

22 Ug ako mitubag kaniya, nga nag-ingon: Oo, kini ang gugma sa Dios, nga mokaylap sa tibuok kalibotan diha sa mga kasingkasing sa mga anak sa mga tawo; mao nga, kini ang labing madanihon labaw sa tanang butang.

23 Ug siya namulong ngari kanako, nga nag-ingon: Oo, ug makalipay kaayo sa kalag.

24 Ug human siya makasulti niini nga mga pulong, miingon siya ngari kanako: Tan-awa! Ug ako mitan-aw, ug nakakita ako sa Anak sa Dios nga miadto taliwala sa mga anak sa mga tawo; ug nakakita ako og daghan nga miyukbo sa iyang tiilan ug misimba kaniya.

25 Ug nahitabo nga nakakita ako nga ang gunitanan nga puthaw, nga nakita sa akong amahan, mao ang pulong sa Dios, nga nagpadulong ngadto sa tubod sa buhi nga katubigan, o ngadto sa kahoy sa kinabuhi; diin nga katubigan nagsimbolo sa gugma sa Dios; ug ako nakakita usab nga ang kahoy sa kinabuhi nagsimbolo sa gugma sa Dios.

26 Ug ang anghel miingon na usab ngari kanako: Tan-awa ug sud-onga ang pagpaubos sa Dios ngadto sa tawo!

27 Ug ako mitan-aw ug nakakita sa Manunubos sa kalibotan, kinsa gipamulong sa akong amahan; ug nakakita usab ako sa propeta kinsa magaandam sa agianan sa dili pa siya moabot. Ug ang Kordero sa Dios miadto ug gibunyagan niya; ug human nga siya gibunyagan, akong nakita nga miabli ang kalangitan, ug ang Espiritu Santo nanaog gikan sa langit ug mikunsad diha kaniya sama sa usa ka salampati.

28 Ug akong nakita nga siya miadto ug nangalagad sa katawhan, pinaagi sa gahom ug dakong himaya; ug ang dakong pundok sa katawhan nagkatigom aron maminaw kaniya; ug akong nakita nga sila misalikway kaniya.

29 Ug ako usab nakakita og lain pa nga napulog duha nga nagsunod kaniya. Ug nahitabo nga sila gidala sa Espiritu gikan sa akong atubangan, ug ako wala na makakita kanila.

30 Ug nahitabo nga ang anghel namulong ngari kanako pag-usab, nga nag-ingon: Tan-awa! Ug ako mitan-aw, ug nakakita ako nga ang kalangitan naabli pag-usab, ug ako nakakita og mga anghel nga mikunsad nganha sa mga anak sa mga tawo; ug sila nangalagad ngadto kanila.

31 Ug siya namulong ngari kanako pag-usab, nga nag-ingon: Tan-awa! Ug mitan-aw ako, ug nakakita ako sa Kordero sa Dios nga miadto taliwala sa mga anak sa mga tawo. Ug nakakita ako og daghan nga pundok sa katawhan nga masakiton, ug gitakboyan sa tanan nga matang sa sakit, ug adunay mga yawa ug hugaw nga mga espiritu; ug ang anghel namulong ug mipakita niining tanan nga butang ngari kanako. Ug sila nangaayo pinaagi sa gahom sa Kordero sa Dios; ug ang mga yawa ug mahugaw nga mga espiritu gipapahawa.

32 Ug nahitabo nga ang anghel namulong ngari kanako pag-usab, nga nag-ingon: Tan-awa! Ug ako mitan-aw ug nakakita sa Kordero sa Dios, nga siya gidakop sa katawhan; oo, ang Anak sa walay kataposan nga Dios gihukman sa kalibotan; ug ako nakakita ug nagpamatuod.

33 Ug ako, si Nephi, nakakita nga gituboy siya ngadto sa krus ug gipatay tungod sa mga sala sa kalibotan.

34 Ug human siya gipatay ako nakakita sa dakong pundok sa katawhan sa yuta, nga nagkapundok sila sa pagpakigbatok sa apostoles sa Kordero; kay mao kana ang gihingalan sa anghel sa Ginoo ngadto sa napulog duha.

35 Ug ang pundok sa katawhan sa yuta nagkatigom; ug nakakita ako nga sila diha sa dako ug lapad nga gambalay, sama sa gambalay nga nakita sa akong amahan. Ug ang anghel sa Ginoo namulong ngari kanako pag-usab, nga nag-ingon: Tan-awa ang kalibotan ug ang kaalam niini; oo, tan-awa ang balay ni Israel nagkatigom sa pagpakigbatok sa napulog duha ka apostoles sa Kordero.

36 Ug nahitabo nga ako nakakita ug mopamatuod, nga ang dako ug lapad nga gambalay mao ang garbo sa kalibotan; ug nahugno kini, ug ang pagkahugno niini hilabihan ka kusog. Ug ang anghel sa Ginoo namulong ngari kanako pag-usab, nga nag-ingon: Ingon niana ang pagkalaglag sa tanan nga kanasoran, kaliwatan, mga pinulongan, ug katawhan, nga makigbatok sa napulog duha ka apostoles sa Kordero.