1 Akkasumas kun erga ta’ee booddee, Almaan biyya isa kan Giidewooniin gara kibbaatiin gara biyya Maantiitti utuu adeemaa jiruu, kunoo, ajaa’ibsiifamuu isaatiin, inni ilmaan Mozaayyaa utuu isaan gara biyya Zarahemlaatti adeemaa jiranii isaanii wajjin wal in arge.

2 Amma yeroo jalqabaaf ergamaan isatti yommuu mul’atetti ilmaan Mozaayyaa kunneen Almaa wajjin turan, kanaafuu Almaan obboloota isaa arguu isaatti baay’ee in gammade, akkasumas isaan ammayyuu Gooftaadhaan obboloota ta’uun isaanii gammachuu isaa dabalee ture, eeyyee, akkasumas isaan dhugaa beekuutti warra jabaatan turan; sababni isaas isaan namoota hubannoo gaarii qabaniifi dubbii Waaqayyoos beekuudhaaf warra caaffata qulqullaa’oo itti dhimmuudhaan qoratan turan.

3 Garuu kana qofas miti; isaan kadhannaa baay’eedhaaf, akkasumas soomaaf of kennanii turan; kanaafuu isaan hafuura raajii fi hafuura mul’ataa qabu turan, akkasumas isaan yeroo barsiisanitti humnaa fi aangoo Waaqayyootiin barsiisu turan.

4 Akkasumas, isaan turtii waggoota kudha afuriif warra Laamaan gidduutti dubbii Waaqayyoo barsiisaa turan, gara beekumsa dhugaattis namoota baay’ee fiduudhaan milkaa’ina guddaa argataniiru; eeyyee, humna dubbii isaaniitiin namoonni baay’een maqaa isaa waamuu fi cubbuu isaanii isa duratti amanuu gara iddoo aarsaa Waaqayyoo duratti dhiyaatanii turan.

5 Amma adeemsa isaanii keessatti waantoonni isaan mudatekanneeniidha, isaan qormaata baay’ee keessa waan turaniif karaa qaamaanis ta’e sammuudhaan, kanneen akka beelaan, dheebuu fi dadhabbiidhaan, akkasumas immoo qormaata hafuuraa baay’eedhaan dhiphatanii turan.

6 Amma adeemsi isaanii kana ture: Abboonni firdii mo’anii waggaa isa jalqabaatti, mootummaa abbaan isaanii isaaniif kennuu barbaadee ture, akkasumas immoo yaada sabichaa kan ture, erga didanii booddee abbaa isaanii, Mozaayyaatti, nagaa itti dhaamanii in adeeman.

7 Haa ta’u malee, isaan biyya Zarahemlaa keessaa ba’anii in adeeman, akkasumas billaa isaanii, akkasumas eeboo isaanii, akkasumas iddaa isaanii, akkasumas xiyya isaanii, akkasumas furrisa isaanii in fudhatan; akkasumas isaan kana kan godhaniif yeroo lafa onaa keessa jiranitti nyaata ofii isaaniif akka dhiyeeffataniif ture.

8 Akkasumas, isaan namoota lakkoobsaan warra filatan wajjin gara biyya isa kan Nefiitti ol ba’uuf, dubbii Waaqayyoos warra Laamaaniitti lallabuudhaaf akkasitti gara lafa onaatti in adeeman.

9 Akkasumas kun erga ta’ee booddee, isaan guyyoota baay’eedhaaf lafa onaa keessa in adeeman, akkasumas isaan wajjiin akka adeemuuf Waaqayyo Hafuura isaa irraa hamma ta’e akka isaanii kennuu fi akka isaanii wajjin ta’uufis, obboloota isaanii, warra Laamaanii gara beekumsa isa dhugaatti fiduun yoo danda’ameef jal’ina aadaa abbootii isaaniis isa sirrii hin taane akka isaan beekaniif, harka Waaqayyoo keessatti meeshaa akka ta’aniif isaan baay’ee in kadhatan, akkasumas in sooman.

10 Akkasumas kun erga ta’ee booddee, Gooftaan Hafuura isaatiin isaan in daawwate, akkasumas akkas isaaniin in jedhe: Jajjabaadhaa. Akkasumas, isaanis jajjabaatanii turan.

11 Akkasumas, Gooftaan itti dabalee akkas isaaniin in jedhe: Gara obboloota keessan warra Laamaanii gidduutti adeemaa, akkasumas dubbii koo hund eessaa; haa ta’u malee isin ana keessatti isaanitti fakkeenya gaarii akka argisiiftaniif, gadadoo keessan keessattii fi dhiphina keessatti obsa in qabaattu, akkasumas ani fayyina lubbuuwwan baay’eetiif harka koo keessatti meeshaa isin nan godha.

12 Akkasumas kun erga ta’ee booddee, garaan ilmaan Mozaayyaa fi warra isaanii wajjin turanii gara warra Laamaanii deemanii dubbii Waaqayyoo isaanitti labsuuf ija-jabina in argatan.

13 Akkasumas kun erga ta’ee booddee, isaan daangaa biyya warra Laamaanii kan hojiin isaan hojjechuudhaaf of irratti fudhatanis guddaa akka ta’etti tilmaamuun yeroo waqtiin haamaa isaanii dhumatutti deebi’anii akka wal-argan Gooftaatti amanuudhaan ofii isaaniin adda foo’amanii fi gargar in ba’an.

14 Akkasumas, saba hammeeyyii, akkasumas saba garaa isaanii jabeessanii fi sodaachisoo ta’anitti lallabuuf ofii isaanii irratti fudhataniiru; sabni kunis warra Nefii ajjeesuuf, akkasumas isaan saamuu fi qabeenya isaanii humnaan duraa fudhachuutti gammadanitti; akkasumas garaan isaaniis irra yookiin warqee fi meetii irra, akkasumas dhagoota gati-jabeeyyii irra kaa’atanii turanitti dubbii Waaqayyoo lallabuuf ba’uun isaanii shakkii tokko malee guddaa ture; haa ta’u malee isaan waantota kana harka ofii isaaniitiin osoo hin hojjetin isaan ajjeechaa fi saamichaan fudhachuu in barbaadu.

15 Isaan akkasitti namoota baay’ee dhibaa’oo turan, baay’een isaanii warra waaqa tolfamaa waaqeffatan turan, akkasumas abaarsi Waaqayyoo sababa aadaa abbootii isaaniitiif isaan irratti bu’ee ture; kun yoo ta’e iyyuu hamma isaan yaada garaa geeddaratanitti waadaan Gooftaa isaaniif dhiyaateera.

16 Kanaafuu, ilmaan Mozaayyaa hojii kana kan isaan ofii isaanii irratti fudhataniif sababa kanaaf ture, tarii akka isaan gara yaada garaa geeddarannaatti akka isaan fidaniif, tarii isaaniin gara karoora fayyinaa beekuutti akka fidaniifiidha.

17 Kanaafuu, isaan walii isaanii irraa addaan in ba’an, akkasumas isaan gidduudhaa, namni hundi qofaa isaa, akkaataa dubbii fi humna Waaqayyo isaaf kennameetti ba’ee in adeeme.

18 Amma Amoon isaan irratti geggeessaa olaanaa ta’uudhaan yookiin inni isaan in gargaare, akkasumas akkaataa waamicha isaanitiin isaan eebbisee fi dubbii Waaqayyoo isaan hubachiisee, yookiin isaan irraa adda ba’uu isaatiin dura isaaniin erga gargaaree booda isaan irraa adda in ba’e, akkasumas kunoo imala baay’ee isaanii adda addaas guutummaa biyyichaa keessatti in godhan.

19 Akkasumas, Amoon gara biyya isa kan Ishmaa’eel kan maqaa ilmaan Ismaa’eel kan warra isa warra Laamaan ta’aniin waamamtuu in dhaqe.

20 Akkasumas, Amoon biyya Ishmaa’eelitti yommuu seenetti, akkuma warri Laamaan warra Nefii warra harka isaaniitti kufan hidhanii gara mootii dhiyeessuun mootichi akka fedhii fi jaalala isaatti yoo barbaade ajjeesuu yookiin garbummaa keessatti hambisuu yookiin hidhaatti isaan darbuu yookiin biyya isaa keessaa baasee gatuu aadaa godhatanitti isas qabanii in hidhan.

21 Akkasumas, akkasitti Amoon mootii isa biyya Ishmaa’el irratti mo’e maqaan isaa Laamoonii jedhamu fuul-duratti in geeffame; akkasumas inni sanyii Ishmaa’eel ture.

22 Akkasumas, yoo fedhiin isaa ta’e biyyicha keessa warra Laamaanii wajjin jiraachuu yookiin saba isaa gidduu jiraachuu akka ta’e inni maal akka barbaadu mootichi Amooniin in gaafate.

23 Akkasumas, Amoonis akkas isaan in jedhe: Eeyyee, ani yeroodhaaf saba kana gidduu jiraachuun barbaada, eeyyee, akkasumas tarii hamma guyyaa gaafa ani du’uuttis in ta’a.

24 Akkasumas kun erga ta’ee booddee, mootichi Laamooniin Amoonitti baay’ee in gammade, kanaafuu hidhaawwan isaa akka isa irraa hiikaman in godhe; akkasumas inni Amoon durboota isaa keessaa tokko akka haadha manaa godhatus in barbaade.

25 Garuu Amoon akkas isaan in jedhe: lakki, ani garuu hojjetaa kee nan ta’a. Kanaafuu, Amoon hojjetaa mooticha Laamooniin in ta’e. Akkasumas kun erga ta’ee booddee, innis akka aadaa warra Laamaanittis hoolotaa Laamoonii akka eeguuf hojjettoota kan biroo wajjin itti gaafatamummaan itti kennamee ture.

26 Akkasumas, inni guyyaa sadiif mooticha erga tajaajilee booda, akkuma inni hojjettoota warra Laamaanii wajjin hoolotaa isaanii wajjin gara iddoo bishaan Seebus jedhamee waamamaa tureetti, bishaan obaasuuf in adeeme, akkasumas warri Laamaan hundinuu akka bishaan argataniif hoolotaa isaanii gara iddoo kanaatti oofanii turan—

27 Kanaafuu, Amoonii fi hojjettoonni mootichaa hoolotaa isaanii gara iddoo bishaan kanaatti yommuu ofanitti, kunoo, warra Laamaan lakkoobsaan muraasa ta’an kan hoolota isaanii wajjin gara iddoo bishaanichaa dhufanii turan dhaabbatanii hoolotaa fi re‘oota Amoonii fi hojjettoota mootichaa addaan in bittinneessan, akkasumas isaan hamma isaan karaa baay’eedhaan baqatanitti addaan in facaasan.

28 Amma hojjettoonni mootichaa akkas jechuudhaan, gungumuu in jalqaban: Amma mootichi, sababa hammeenya namoota kanaatiin hoolonnii fi re’oonni isaanii waan addaan facaafamaniif inni akkuma obboloota keenya irratti godhee ture nus in ajjeesa. Akkasumas, isaan akkas jechuudhaan garmalee boo’uu in jalqaban: Kunoo, hoolonnii fi re’oonni keenya silaa addaan nu jalaa bittinaa’aniiru.

29 Amma isaan sodaa ajjeefamuu irraa kan ka’e in boo’an. Amma Amoon yeroo kana argetti garaan isaa gammachuudhaan in guutame; sababni isaas, innis akkas jedhe, ani hoolota kana gara mootichaatti deebisuudhaan garaa hojjettoota hiriyoota kootii akkan mo’adhuuf ani dubbiiwwan kootti akka isaan amanamaniif akkan isaan geggeessuuf humna koo kana hojjettoota warra na wajjinii hiriyoota koo kanatti yookiin humna isa ana keessa jiru kana isaanitti nan argisiisa.

30 Akkasumas ammas, inni dhiphinoota warra obboloota koo jedhee waamee ture sanaa yeroo argetti, isaan kunneen yaadota Amoon turan.

31 Akkasumas kun erga ta’ee booddee, inni dubbiiwwan isaatiin akkas jechuun, isaan in gowwomse: Obboloota koo, jajjabina kan qabdan ta’aa, akkasumas mee hoolotaa fi re’oota sana barbaacha haa deemnu, akkasumas isaaniin walitti qabnee gara iddoo bishaanichaatti haa deebifnu; akkasumas akkasittiin hoolota sanas mootichaaf ni eegna, akkasumas innis nu hin ajjeesu.

32 Akkasumas kun erga ta’ee booddee, isaan hoolota sana barbaachas in deeman, akkasumas isaan Amooniin duukaa in bu’an, akkasumas isaan baay’ee ariitiidhaan fiiganii akkasumas hoolotaa fi re‘oota mootichaas in deebisan, akkasumas gara iddoo bishaanichaatti deebisanii walitti isaan in qaban.

33 Akkasumas, namoonni sun ammas hoolotaa fi re‘oota isaanii addaan bittinneesuuf in dhaabbatan; Amoon garuu obboloota isaatiin akkas in jedhe: Akka isaan hin baqanneef isin hoolota sanatti marsaatii gidduutti galchaa; akkasumas ani nan deema, akkasumas namoota warra hoolotaa keenya nu jalaa facaasan sanaan dhaqee wal nan lola.

34 Kanaafuu, isaanis akkuma Amoon isaan abboome in godhan, akkasumas innis deemee warra bishaan Sebusiin bira dhaabbatan wajjin wal-loluuf in dhaabbate; akkasumas isaan lakkoobsaan baay’ee turan.

35 Kanaafuu, isaan Amooniin hin sodaanne, sababni isaa loltoota isaanii keessaa inni tokko akka fedhii isaaniitti isa in ajjeesa jedhanii waan tilmaamaniifiidha, sababni isaa isaan akka Gooftaan ilmaan isaa harka isaanii keessaa baasu Mozaayyaadhaaf abdii akka kenne hin beekan turan; waa’ee Gooftaa ilaalchisaniis homaa hin beekan turan; kanaafuu isaan baduu obboloota isaaniitti in gammadan; akkasumas sababa kanaaf hoolotaa fi re‘oota mootichaa addaan facaasuuf in dhaabbatan.

36 Amoon garuu ol ka’ee furrisa isaatiin dhagaa isaanitti darbachuu in jalqabe; eeyyee, inni humna guddaadhaan gidduu isaaniitti furrisa isaatiin dhagaa in darbate; akkasumas inni akkasittiin hamma isaan humna isaatiin ajaa’ibsiifamuu jalqabanitti lakkoobsa isaanii kan murtaa’e in ajjeese; haa ta’u iyyuu malee isaan sababa ajjeefamuu obboloota isaaniitiin aaranii, akkasumas isaan akka inni moo‘atamu murteessanii turan; kanaafuu, dhagaa isaaniitiin isa rukutuu akka hin dandeenye waan arganiif, isaan isa ajjeesuuf ulee isaanii qabatanii in dhufan.

37 Garuu kunoo, namni Amooniin rukutuuf ulee isaa ol fuudhe kamiyyuu inni billaa isaatiin harkoota isaanii isaan irraa in mure; sababiin isaa hamma isaan ajaa’ibsiifachuu jalqabanitti, rukuttaa isaanii dandamatee billaa isaatiin harka isaanii irra isaan in rukute, akkasumas isaan fuula isaa duraas baqachuu in jalqaban; eeyyee, akkasumas isaan lakkoobsaan muraasa hin turre; akkasumas inni humna harka isaatiinis akka isaan baqatan in godhe.

38 Amma ja’an isaanii furrisa sanaan in kufan, inni garuu billaa isaatiin geggeessaa isaanii irraa kan hafe nama tokko illee hin ajjeefne; warra isa irratti ka’an baay’ee isaanii harka isaanii rukutee irraa in kute, akkasumas isaan muraasa hin turre.

39 Akkasumas, inni yommuu fageessee isaan ari’eetti, inni in deebi’e, akkasumas isaan hoolotaa fi re’ootaa isaanii bishaan in obaasan, akkasumas gara dheedicha mootichaattis in deebisan, akkasumas isaan harka warra Amooniin ajjeesuu barbaadanii, warra billaa isaatiin rukutamanii irraa muramee baatanii, isa boodas gara mootichaatti in deebi’an; isaanis waanta raawwatanii turan sanaaf dhugaa ba’uuf gara mootichaatti in geeffaman.