Na Lako Yani 19–20; 24; 31–34; Nai Vakarua 4–7

Mosese ena Ulunivanua ko Saineai

Vukei ira na tamata me ra nanuma na Turaga

Ulunivanua ko Saineai

Era lako curuma na lekutu o Mosese kei ira na Isireli. Era a yacova yani e dua na ulunivanua ka vakatokai na Ulunivanua ko Saineai.

Na Lako Yani 19:1

Masu tiko ko Mosese

A cabeta na ulunivanua ko Mosese me vosa vua na Turaga. A kaya na Turaga vei Mosese ni vinakata me vosa o Koya vei ira na Isireli e matanavotu.

Na Lako Yani 19:3, 9–11

wavolita na ulunivanua na o

Era a lako mai na Isireli ki na ruku ni Ulunivanua ko Saineai, ka vakavuna na Turaga e dua na o kubou me wavolita na ulunivanua. A tiko e loma ni o na Turaga. A vosa vei ira na Isireli ka solia vei ira na ivakaro. A sakure na ulunivanua ni vosa tiko o Koya.

Na Lako Yani 19:16–19; 20:1–17; Nai Vakarua 4:12–13, 33; 5:4–5

Era rere na Isireli

Era a rere na Isireli. Era a kerei Mosese me vosa vua na Turaga me rawa kina vei Mosese me tukuna vei ira na ka e vinakata na Turaga.

Na Lako Yani 20:18–19

O ira na qase ni Isireli ena ulunivanua

A kauti Eroni kei na 70 na qase ni Isireli o Mosese ki na ulunivanua me ciqoma e levu tale na ivakavuvuli ni Turaga. E a rairai vei ira na Turaga.

Na Lako Yani 24:1, 9–11

volavola na Turaga ena peleti raraba me baleti Mosese

Sa qai tukuna na Turaga vei Mosese me biuti ira na qase ka cabe cake yani ki na ulunivanua. A talairawarawa o Mosese. A vakayagataka na Turaga na Nona iqaqalo me vola na Nona lawa kei na ivakaro ena peleti vatu. Ena loma ni 40 na siga, a vakavulici Mosese na Turaga ena vuqa sara na ka.

Na Lako Yani 24:12–18; 31:18

Era buli luve ni bulumakau koula na Isireli

Ena gauna a tiko kina o Mosese ena Ulunivanua ko Saineai, era a oca na waraki koya na Isireli. Era tukuna vei Eroni me cakava na matakau me ra sokalou kina me vaka mai Ijipita. A kumuna vata kece na nodra koula o Eroni ka cakava e dua na ivakatakarakara ni bulumakau gone.

Na Lako Yani 32:1–4

Era sokalou ki na luve ni bulumakau koula na Isireli

Era sokalou na Isireli ki na luve ni bulumakau koula ka vakacabo isoro. Era a kaya ni luve ni bulumakau koula, ka sega ni Turaga, a sereki ira tani mai Ijipita.

Na Lako Yani 32:4–6, 21–24

Siro sobu mai na ulunivanua ko Mosese

A kila tu na Turaga ni o ira na Isireli era sa sokalou tiko ki na dua na matakau ka sa guilecavi Koya. A vakaroti Mosese o Koya me lesu tale ka tukuna vei ira na tamata me ra veivutuni.

Na Lako Yani 32:7–10

Vosa vei ira na Isireli o Mosese, vakarusai na luve ni bulumakau koula

A lako sobu mai na Ulunivanua ko Saineai o Mosese ka raici ira na Isireli ni ra sokalou tiko ki na luve ni bulumakau koula. E a cudru sara vakalevu. Era a se sega ni vakarau na tamata me ra talairawarawa ki na lawa kei na ivakaro a vola na Turaga. A vorolaka o Mosese na peleti raraba ka vakarusa na luve ni bulumakau koula. A vukei ira na Isireli me ra veivutuni ka nanuma na nodra Kalou dina.

Na Lako Yani 32:15–20, 25–29

Masu tiko ko Mosese

A kerea o Mosese vua na Turaga me vosoti ira na Isireli ka veiyalayalati tale vata kei ira. Sa yalataka o Mosese ni na liutaki ira ka vakavulici ira.

Na Lako Yani 32:30–34

O Mosese kei na peleti raraba ni iVakaro e Tini

A kerei Mosese na Turaga me cakava tale e rua na peleti raraba ka lesu tale ki na Ulunivanua ko Saineai. A cakava na Turaga e dua na yalayala vou vei ira na Isireli ka solia vei ira na Nona iVunau e Tini.

Na Lako Yani 20:2–17; 34:1–17, 28; Nai Vakarua 6:24–25; 7:12–13