Na Dauveilewai 6–7

Na Mataivalu i Kitioni

Nuitaka na Turaga ena ivalu

Era butako kakana na kai Mitiani

Era a vakalougatataki na Isireli ena vuqa na yabaki. Ia era a qai digitaka me ra talaidredre vua na Turaga. Me vukei ira me ra nanumi Koya, na Turaga e a vakalaivi ira na kedra meca o ira na kai Mitiani me ra kauta na kedra kakana kei na manumanu. Era sa viakana na Isireli, ka ra sa qai nanuma na Turaga ka masu vei Koya me vukei ira.

Na Dauveilewai 6:1–7

vosa tiko vei Kitioni e dua na agilosi

O Kitioni e dua na tagane mai na dua na matavuvale dravudravua. A tala mai na Turaga e dua na agilosi me kacivi koya me sereki Isireli. A vakataroga o Kitioni na vuna a digitaki koya kina na Turaga.

Na Dauveilewai 6:11–15

era cudruvi Kitioni na tamata e yasa ni matakau ka sa vakarusai oti

A kaya na Turaga vei Kitioni me vakarusa na veivanua era dau sokalou kina na Isireli vei ira na kalou lasu. Ni talairawarawa o Kitioni, era a cudru na tamata.

Na Dauveilewai 6:25–27

taqomaki Kitioni o tamana mai vei ira na tamata cudrucudru

Era a vinakata na Isireli me ra vakamatei Kitioni. Ia a vakauqeti ira na tamai Kitioni me ra kakua ni vakamavoataki koya. Sa taqomaki o Kitioni.

Na Dauveilewai 6:28–32

Masu tiko o Kitioni

E sega ni vakabauta o Kitioni ni rawa ni sereki Isireli. E sivia ni 135,000 na sotia ena mataivalu ni Mitiani. Ia sa solia na Turaga vei Kitioni na vuku kei na kaukauwa.

Na Dauveilewai 6:13–16; 8:10

era biubiu na sotia mai na mataivalu

E vinakata na Turaga me ra kila na Isireli ni rawa ni ra qaqa ena Nona kaukauwa, ka sega ena nodra kaukauwa. E dina ga ni se qai 32,000 ga na sotia ni Isireli, a kerei Kitioni na Turaga me vakasukai ira na sotia era rere ki vale. Ni ra sa gole ki vale e lewe 22,000, sa qai vo vei ira na Isireli e 10,000 na sotia.

Na Dauveilewai 7:2–3

era gunu mai na wai na sotia

A kaya na Turaga ni 10,000 e se iwiliwili levu tikoga ni sotia. A tukuna vei Kitioni me kauti ira sobu na mataivalu ki wai. O ira era a gunu vakadodonu mai na wai ena gusudra era na vakau ki vale. O ira era a vakayagataka na ligadra me ra gunuva na wai era na tiko mai. Era sa qai vo ga e 300 na tagane.

Na Dauveilewai 7:4–7

Ira na sotia ni Isireli kei na davui kei na cina wavolita na keba ni kai Mitiani

Sa qai yaco, ni ra sa vakarau tu na Isireli me ra vala. A vakaraitaka vei Kitioni na Turaga na sala me vakadrukai ira kina na kai Mitiani. A tukuna o Kitioni vei ira na nona mataivalu me ra vakayagataka na davui kei na cina me vakarerei ira. Na rorogo kei na cina e vakavuna na veilecayaki vei ira na kai Mitiani ka sa tekivu me ra veivala vakataki ira. Era a qai qoqolou ka drotani yani.

Na Dauveilewai 7:16–22

Liutaki ira tiko na sotia o Kitioni

Baleta ni a nuitaka na Turaga o Kitioni, era a vakadrukai ira na mataivalu levu ni Mitiani o ira na Isireli mai vei ira e 300 ga na sotia. Na Turaga a sereki ira na Isireli.

Na Dauveilewai 7:23–25