“Sa Vosa na Turaga vei Ilaija,” iTalanoa eso mai na Veiyalayalati Makawa (2022)
“Sa Vosa na Turaga vei Ilaija,” iTalanoa eso mai na Veiyalayalati Makawa
Sa Vosa na Turaga vei Ilaija
Vakarorogo ki na domo ni Turaga
A tukuna na Tui o Eapi vei Ranadi Jesepeli ni Turaga a vakadrukai ira na bete i Peali. A cudru kina o Jesepeli ka kaya ni na vakamatei Ilaija na parofita.
Me taqomaki tiko, a biubiu kina o Ilaija mai na vanua o Isireli. A lako tiko me 40 na siga ka 40 na bogi, ka lolo voli ni lako tiko. Sa qai lako mai ki na Ulunivanua o Saineai ka kunea e dua na qara vatu me vuni kina. A kaya na Turaga vei Ilaija me gole ki na dela ni ulunivanua me rawa ni vosa kina vei Ilaija o Koya.
A liwa mai e dua na cagi kaukauwa ka vorolaka vakamatailalai na vatu e wavokita na qaravatu. Ni oti o ya, e a kuretaka na qele e dua na uneune. Sa qai tekivu me waqa mai e dua na buka. A rogoca o Ilaija na rorogo levu ni cagi, uneune, kei na bukawaqa. Ia na domo ni Turaga a sega ni tiko ena veirorogo levu o ya.
A qai rogoca o Ilaija e dua na domo malumu, malua, ka lailai. Sa kila sara o koya ni Turaga. A tarogi Ilaija na Turaga se na cava e cakava tiko e kea.
A kaya o Ilaija ni a vuni tiko me taqomaki koya kina. Era sa vakamatei kece na parofita, ka ra sa cata na Turaga na tamata.
A vakacegui Ilaija na Turaga ka tukuna vua ni levu na Isireli era se sokalou tiko ga vua na Turaga. A kerei Ilaija na Turaga me lesu ki vale me laki lumuta e dua tale na parofita. Na yaca ni parofita vou oqo ko Ilaisa.