“Josefa e Ijipita,” iTalanoa eso mai na Veiyalayalati Makawa (2022)
“Josefa e Ijipita,” iTalanoa eso mai na Veiyalayalati Makawa
Josefa e Ijipita
Sa yaco me iliuliu e dua na bobula
A volitaki vakabobula o Josefa vua e dua na turaga ka yacana o Potifa. A cakacaka tiko o Potifa vei Fero, na tui kei Ijipita. Sa rawa vei Potifa me kila ni a vukei Josefa tiko na Turaga. A vakabauti Josefa ka biuti koya me lewa na nona vale kei na veika kece e taukena.
E a taleitaki Josefa na wati Potifa. A vinakata vei Josefa me rau voroka vata na ivakaro ni Turaga. O Josefa a kaya vua, sega.
A sega ni via vakarorogo na wati Potifa, sa mani dro tani kina o Josefa. A cudruvi Josefa sara o koya.
A vakaraitaka vei Potifa e dua na tiki ni isulu nei Josefa. A lasutaki Potifa baleti Josefa. Sa biuti Josefa ki vale ni veivesu o Potifa.
E a sa veitawasei tu kei na nona matavuvale o Josefa. A yaco me dua na bobula, ia oqo sa mai dua na kaivesu. Ia na Turaga a se vukei Josefa tikoga. A sega ni soro o Josefa. Sa vakalougatataka na Turaga na ivakatawa ni vale ni veivesu me raica na ka vinaka e tiko vei Josefa. Sa tekivu me vakabauti koya na ivakatawa, ka mani biuti Josefa sara me lewai ira na kaivesu tale eso.
A sotavi rau e rua na kaivesu o Josefa, e dua na dau vavavi kei na dua na dau caka gunu, ka rau a cakacaka voli vei Fero. Rau a tadra na tadra matalia. Ena kaukauwa ni Turaga, a vakamacalataka rawa kina o Josefa na ibalebale ni nodrau tadra. Na tadra nei dau caka gunu e kena ibalebale ni na sereki. Ni oti e tolu na siga, a galala tale o koya me cakacaka vei Fero.
Nai Vakatekivu 39:22–23; 40:1–21
Ena dua na siga e a lomabibi o Fero ena vuku ni nona tadra. E sega ni dua e rawa ni tukuna vua na ibalebale ni nona tadra.
Qai nanuma na dau caka mena na tui ni o Josefa e rawa ni vakamacalataka na tadra.
A kau tani mai valeniveivesu o Josefa me vakamacalataka na tadra nei Fero. E kaya o Josefa ni tadra e kena ibalebale ni vitu na yabaki ena levu sara kina na kakana e Ijipita ka tarava mai e vitu na yabaki ni dausiga ena lailai sara kina na kakana. A kaya o Josefa vei Fero ni dodonu me kumuna vata o Ijipita na kakana kecega ena veiyabaki vinaka.
Sa kila tu o Fero ni dina na veika a tukuna o Josefa me baleta na nona tadra. A sereki Josefa mai na vale ni veivesu ka buli Josefa me dua na iliuliu cecere e Ijipita. Ena vitu na yabaki, a vukei Ijipita o Josefa me kumuni vata na kakana kecega.
A qai yaco mai na dausiga. Ena gauna oqo, e sega ni dua e rawa ni tea e dua na kakana. Era lako na tamata ki Ijipita me volia na kakana sa maroroya oti tu o Josefa. Ena vukui Josefa, era a maroroya na kai Ijipita na kakana e veirauti me vukei ira kei na so tale me ra vakabulai mai na dausiga.