“Tepora na Parofita Yalewa,” iTalanoa eso mai na Veiyalayalati Makawa (2022)
“Tepora na Parofita Yalewa,” iTalanoa eso mai na Veiyalayalati Makawa
Tepora na Parofita Yalewa
E dua na iliuliu a vukei ira na Isireli me ra vakararavi vua na Turaga
O Tepora a dua na parofita yalewa, e dua na iliuliu yalodina ni Isireli ka a vakauqeti mai vua na Turaga. Era sa mudu ni muria na ivunau ni Turaga na nona tamata, ka ra sa lewai mai vei ira na kai Kenani. Ni oti e ruasagavulu na yabaki, era sa tekivu masuta na veivuke ni Turaga na Isireli.
A rogoca na Turaga na nodra masu. A tukuna vei Tepora me vakasoqona vata e dua na mataivalu ni Isireli me valuti ira na kai Kenani.
Era a lewe levu na sotia kei na qiqi ni ivalu ni nodra mataivalu na kai Kenani. Oqo a vakavuna me ra rere na mataivalu ni Isireli, ia o Tepora a sega ni rere. Sa kila o koya ni na vukei ira na Turaga.
O Peraki na iliuliu ni mataivalu ni Isireli. A sega ni vinakata me laki valu. Ia a nanuma o koya ni kevaka me lako vata kei na mataivalu o Tepora, ena taqomaki ira na Turaga. Sa vakadonuya o Tepora me lako. A parofisaitaka ni dua na marama ena vakadrukai Sisira, na iliuliu ni mataivalu ni Kenani.
Era a soqoni vata na mataivalu ni Isireli ena dua na ulunivanua, ka ra soqoni na kai Kenani ena buca. A kaya o Tepora vei Peraki me siro sobu mai na ulunivanua. A yalataka ni na tiko vata kei ira na Turaga.
Sa vakatauca na uca na Turaga, ka ra sa kuitaki ena wai na qiqi ni valu ni kai Kenani. E vuqa na kai Kenani era a luvu ena uciwai, ia o Sisira e a dro.
Na Dauveilewai 4:15, 17; 5:4–5, 19–22
E dua na marama na yacana o Jaeli a vakaitikotiko ena dua na valelaca voleka. A raici Sisira ni drotaki bula tiko ka tukuna vua me vuni e loma ni nona valelaca. E kila o Jaeli ni o koya e dua na iliuliu ena nodra mataivalu na kai Kenani ka vakamatei koya me kakua kina ni vakamavoataki ira tale na tamata eso.
Sa yaco me vakayacori na parofisai nei Tepora. A vakadrukai o Sisira mai vua e dua na yalewa yaloqaqa. E lagata o Tepora e dua na sere me vukei ira na Isireli me ra nanuma na sala a vakabulai ira kina na Turaga. Era a talairawarawa na Isireli ki na ivunau ka bula sautu me 40 na yabaki.