“Samuela na Parofita,” iTalanoa ni Veiyalayalati Makawa (2022)
“Samuela na Parofita,” iTalanoa ni Veiyalayalati Makawa
1 Samuela 2–3
Samuela na Parofita
Na gonetagane kacivi mai vua na Turaga.
Ena dua na gauna balavu, o ira na Isireli e sega na nodra parofita ni Turaga me ra liutaki ira. Ia, o ira na dauveilewai era liutaki ira na Isireli ena vuqa na yabaki. Ena gauna oqo, ea kauta mai kina o Ana na luvena tagane gone o Samuela me laki bula vata kei Ilai, na bete ka turaganilewa i Isireli. E vukei Ilai ena valetabu o Samuela.
Erau a veiqaravi talega ena valetabu na luvei Ilai e rua, ia e rau butakoca na isolisoli e yaga vua na Turaga. Eso na tamata era a kudruvaka vei Ilai, ia ea sega ni totogitaki rau o Ilai.
Ena dua na yakavi ea rogoca o Samuela e dua na domo ni sa kacivi koya. Ea nanuma okoya ni o Ilai, ea lako kina vua o Samuela. Ia ea sega ni kacivi koya o Ilai. Ea kaya o Ilai vei Samuela me laki moce tale.
Ea rogoca o Samuela na domo ka kacivi koya ena ikarua ni gauna. Ea lako vei Ilai ka taroga na ka e vinakata. Ia ea sega ni kacivi koya o Ilai. Ea tukuna vei Samuela o Ilai me laki moce.
Ea rogoca o Samuela na domo ka kacivi koya ena ikatolu ni gauna. Ea lako tale vei Ilai ka taroga na ka e vinakata. Ena gauna oqo, sa kila o Ilai ni sa Turaga ka vosa tiko vei Samuela. Ea kaya o Ilai vei Samuela me laki moce tale. Ea kaya o Ilai kevaka sa kaci tale na Turaga, sa dodonu me vakarorogo ko Samuela.
Ea rogoca o Samuela na domo ni kacivi koya tale. Ena gauna oqo a kerea na Turaga o Samuela me vosa ka kaya ni na vakarorogo. Ea tukuna vei Samuela na Turaga ni sa cala vei Ilai me laivi ira na luvena era caka ca mera veiqaravi ena valetabu. Ena sega ni vakatarai vei iratou na matavuvale nei Ilai me ra veiqaravi tale.
Ena siga ka tarava, ea tarogi Samuela o Ilai na ka e kaya na Turaga. E tukuna vua o Samuela. Sa kila o Ilai ni sa vosa tiko mai vei Samuela na Turaga.
Ea rogo na itukutuku oqo ena vanua taucoko o Isireli. Era kila na tamata ni sa digitaki Samuela na Turaga me nona parofita.