“Na Tui o Tevita,” iTalanoa ni Veiyalayalati Makawa (2022)
“Na Tui o Tevita,” iTalanoa ni Veiyalayalati Makawa
1 Samuela 18–19; 31; 2 Samuela 1; 5; 11–12
Tui ko Tevita
Na dredre ni dua na tui
Na Tui o Saula, na tui Isireli, ea vakayavalati ena qaqa nei Tevita vei Koliaci. Sa buli Tevita o Saula me iliuliu ni nona mataivalu.
E lomana na Turaga o Tevita ka dau vinakata tu ga me cakava na ka dodonu. Era a lomani Tevita na tamata e Isireli.
Sa tubu na vuvu nei Saula ka tovolea me vakamatei Tevita. Ia ea muria ga na Turaga o Tevita, ka sa taqomaki koya na Turaga mai vei Saula.
Era a vala na Isireli ena vuqa na ivalu. Ena dua na siga ea mate o Saula kei iratou na luvena tagane ena ivalu. E lomani ratou o Tevita ka rarawa sara vakalevu me kila na nodrau mate. Oqo o ira na Isireli era gadreva me dua na tui vou. Ea digitaki Tevita na Turaga me tui. Era a marau na tamata.
1 Samuela 31:2–6; 2 Samuela 1:11–12; 5:1–5
Sa vakalougatataki Tevita na Tui na Turaga ka tuberi koya. Ena veivuke ni Turaga, era a rawati ira na nodra meca na mataivalu nei Tevita.
Ena dua na siga ni a dodonu me lako ki vala o Tevita, ea tiko ga e vale. Ea raica e dua na marama totoka. Na yacana o Pacisepa, ka vinakata o Tevita me vakamautaki koya. Ia sa vakamau oti tu vei Uraia, e dua na sotia ena mataivalu nei Tevita.
Ea vinakata o Tevita me watina o Pacisepa, ka sa mani talai Uraia ki na dua na ivalu rerevaki me rawa ni mate kina o Uraia.
Sega ni dede sa kila o Tevita ni sa mate ena ivalu o Uraia. Ea talai ira na nona italai o Tevita me ra laki kauti Pacisepa mai ki nona vale, ka vakamautaki koya.
Ia ea sega ni marautaka na Turaga na veika ea cakava o Tevita. Ea talai Necani, e dua na parofita, na Turaga, me tukuna vei Tevita na bibi ni nona ivalavala ca. Ea rarawa sara vakalevu o Tevita ena ka a cakava vei Uraia kei Pacisepa. Ea masulaka ka lolovaka me vosoti mai vua na Turaga.