“Vakabulai Neamani o Ilaisa,” iTalanoa eso mai na Veiyalayalati Makawa (2022)
“Vakabulai Neamani o Ilaisa,” iTalanoa eso mai na Veiyalayalati Makawa
Vakabulai Neamani o Ilaisa
Na sala a yaco kina e dua na caka mana levu ena vuku ni vakabauta rawarawa
E a tiko vakayawa sara mai Siria e dua na turaga ka vakatokai ko Neamani. O koya a dua na turaganivalu levu ena mataivalu ni Siria. Ia a tauvi Neamani tiko e dua na mate ni kuli ni yago mosimosi ka vakatokai na vukavuka.
Na dauveiqaravi nei wati Neamani e dua na goneyalewa ni Isireli. E vakabauta na Turaga na goneyalewa oqo. A kaya ni kevaka e rawa ni sikovi Ilaisa na parofita o Neamani, ena vakabulai mai na nona tauvimate.
A lakova o Neamani e dua na sala balavu me laki raici Ilaisa. E a nanuma o Neamani ni na vakabulai ena dua na cakamana levu.
Eratou yaco ki na vale nei Ilaisa o Neamani kei ira na nona dauveiqaravi, na ose, kei na qiqi vakaturaga. O Ilaisa a talai koya na nona dauveiqaravi me solia vei Neamani na ivakaro ni Turaga. Ena vakabulai Neamani na Turaga ke na sili vakavitu ena Uciwai na Joritani.
A cudru o Neamani baleta ni a vinakata me lako mai vei koya na parofita ni Turaga ka vakabulai koya vakatotolo. A vosakudrukudru o Neamani baleta ni uciwai na Joritani e sega ni vinaka me vaka na veiuciwai lelevu mai Siria.
Ia era taroga na dauveiqaravi nei Neamani na vuna e sega ni via cakava kina o Neamani e dua na ka rawarawa sara. Kevaka mada ga e sega ni vakaibalebale vei Neamani, na parofita ni Turaga a kerei koya me cakava.
Sa biuta tani na nona dokadoka o Neamani ka rogoci ira na nona dauveiqaravi. A vakasilimi koya vakavitu ena Uciwai na Joritani. Sa qai vakabulai Neamani na Turaga, me vaka a tukuna o Ilaisa. Sa qai kila o Neamani ni o Ilaisa e dua na parofita ka sa bula dina tiko na Turaga.