“Na Lakosivia,” iTalanoa eso mai na Veiyalayalati Makawa (2022)
“Na Lakosivia,” iTalanoa eso mai na Veiyalayalati Makawa
Na Lako Sivia
Taqomaki mai Vua na Turaga
A sega ni sereki ira na Isireli o Fero, sa qai tukuna kina na Turaga vei Mosese ni na tala mai na iotioti ni mate ca levu. Ena mate na ulumatua kecega ni matavuvale ena vanua ko Ijipita, io na ulumatua talega ni nodra manumanu.
Sa yalataka na Turaga ni kevaka era muria na Isireli na Nona ivakasala, ena lako siviti ira na mate ca levu ka sega ni vakarusai ira.
A tukuna na Turaga ki na matavuvale yadua ni Isireli me ra vakacabora e dua na lami tagane uasivi sara ka boroya na matanikatuba ni nodra veivale ena dra ni lami.
A tukuna na Turaga vei ira na Isireli me ra vakasaqara ka kania vakatotolo na lami. Ni ra kana tiko, sa dodonu me ra vakaisulu ka vakarau tu me ra biuta na nodra veivale. E kaya na Turaga kevaka era vakayacora na veika oqo na Isireli, ena taqomaki na nodra ulumatua mai na mate ca levu.
Me vaka ga na veivakasalataki ni Turaga, sa yaco mai na mate ca levu. Era a mate kece na ulumatua mai Ijipita, oka kina na luvei Fero ulumatua. Ia na mate ca levu a lako sivita na veivale yadua ka boroi tu na kena matanikatuba ena dra ni lami. Era a vakabulai na ulumatua ni Isireli baleta ni ra a talairawarawa vua na Turaga.
Ni sa raica ko Fero ni sa mate na luvena tagane ena vuku ni mate ca levu oqo, a kaya vei Mosese kei Eroni me rau kauti ira kece na Isireli ka biuti Ijipita.
Era sa biubiu na Isireli, ia sa cudru sara ko Fero. A vakasoqoni ira vata na nona mataivalu kei na qiqi ni ivalu ka cicimuri ira na Isireli.
Era keba na Isireli ena Wasa Damudamu. Sega ni dede sa yacovi ira yani ko Fero kei na nona mataivalu. Ni ra sa raica na Isireli ni ra sa lako tiko mai na kai Ijipita, era sa rere. Ia a tukuna o Mosese vei ira na Isireli ni na taqomaki ira na Turaga.
Ni ra sa voleka mai na kai Ijipita, a tukuna na Turaga vei Mosese me laveta cake na nona titoko. A vakayacora o Mosese, ka sa tawasea na Turaga na wasawasa. Era sa takosova na Isireli na wasawasa ena qele mamaca. Era a dro tani mai vei Fero kei na nona mataivalu.
Era a cicimuri ira na Isireli na mataivalu ni Ijipita. Ni ra sa yaco bula taucoko na Isireli ki na tai kadua ni wasawasa, a sa vakasuka tale na wai na Turaga. Era a qai luvu na mataivalu nei Fero e wasawasa.
Era sa qai bula galala tu na Isireli. Era lagata na sere, meke ka vakavinavinaka vua na Turaga. Era dau vakananuma tu na Lakosivia me gauna ka vakabulai ira kina na Turaga, ka kauti ira tani mai Ijipita.