“Taniela kei na Tadra ni Tui,” iTalanoa ni Veiyalayalati Makawa (2022)
“Taniela kei na Tadra ni Tui,” iTalanoa ni Veiyalayalati Makawa
Taniela 2
Taniela kei na Tadra ni Tui
Na itukutuku vunitaki ni Kalou vua e dua na tui
A tadra na tui Papiloni ka a vakararawataki koya. A vakarota o koya me ra tukuna vua na nona bete kei na tamata vuku na ibalebale ni tadra.
Ea sega ni tukuna vei ira na tui na tadra. Ea kaya okoya kevaka e tu dina na nodra kaukauwa ni bete kei na tamata vuku, sa rawa ni ra tukuna vua na tadra kei na kena ibalebale.
Era a kaya na bete kei na tamata vuku vua na tui ni ra sega ni rawa ni vakadewataka na nona tadra ke sega ni tukuna vei ira na ka ea yaco. Era kaya ni sega ni dua na tamata me cakava rawa oya. Sa cudru kina na tui ka kaya ni na vakamatei ira kece na tamata vuku ena matanitu, oka kina o Taniela kei iratou na nona itokani.
Ni sa yaco mai na nona yadra na tui me kauti Taniela kei na nona itokani, a kerea o Taniela me soli na gauna me rawa ni tukuna kina vua na tui na ibalebale ni nona tadra. E kila o Taniela ni Kalou e kila ka raica na ka kecega, na tatadra sara mada ga. A kerei iratou na nona itokani o Taniela me ratou masu vata kei koya.
Ea vakaraitaka vei Taniela na Kalou na tadra ni tui ena dua na raivotu ka vakavulica vei Taniela na kena ibalebale. E vakavinavinakataka na Kalou o Taniela ena nona sauma na nona masu kei iratou na nona itokani kei na vakabulai ni nodra bula. Ka a qai lako me tukuna vua na tui na ibalebale ni tadra.
Ea kaya o Taniela ni tadra ni tui e baleta e dua na matakau ceuceu tuwawa ka a vakarusai ena dua na vatu sa tamusuki mai na ulunivanua. Na ivakatakarakara e matataka na veimatanitu e vuravura. Na vatu sa kavida mai na ulunivanua sa matataka na matanitu ni Kalou ka na roboti vuravura. E kila na tui ni a tukuna o Taniela na dina.