“Me Baleta na Veiyalayalati Makawa,” iTalanoa eso mai na Veiyalayalati Makawa (2022)
“Me Baleta na Veiyalayalati Makawa,” iTalanoa eso mai na Veiyalayalati Makawa
Me Baleta na Veiyalayalati Makawa
Na yalayala ni Tamada Vakalomalagi vei ira na Luvena ena dua na gauna balavu sa oti
Na imatai ni wasewase ni iVola Tabu sai koya na Veiyalayalati Makawa. Era a volai na ivolanikalou oqo ena dua na gauna balavu sa oti, ni se bera mada ga ni sucu o Jisu Karisito. E tiko kina na italanoa eso ka na vukei keda meda vakabauti Koya. E vakavulica vei keda ni o ira vakayadua na tamata e vuravura era lewe ni matavuvale nei Tamada Vakalomalagi ka lomani ira na Luvena o Koya.
Nai Vakarua 7:7–9; Aisea 45:10–12
Ena Veiyalayalati Makawa, ko Jisu Karisito e cavuti me o Jiova ka Turaga. E muria o koya na ivakasala ni Tamada Vakalomalagi. Mai na gauna nei Atama kei Ivi, na Tamada Vakalomalagi sa dau tala mai na Turaga o Jisu Karisito me vosa vei ira na Nona parofita. Na Tamada Vakalomalagi e tala mai na Yalo Tabu me vukei keda meda kila ni nona vosa e dua na parofita e ka dina.
Na Lako Yani 6:2–3; 2 Veigauna 20:20; Emosi 3:7; 2 Pita 1:21; Mosese 2:1
A yalataka na Turaga vua na parofita o Eparaama kei na watina o Sera ni nodrau matavuvale ena tubu ka na vakalougatataka na vuravura taucoko. O Jekope na makubudrau tagane a levu na lewe ni nona matavuvale ka qai yaco me dua na matanitu. Era a vakatokai me mataqali i Isireli, se o ira na Isireli. O ira na parofita era a vakavulici ira me ra nanamaki ki na gauna ena lako mai kina o Jisu Karisito.
Nai Vakatekivu 15:5–6; 17:1–8; Nai Vakarua 18:15; Aisea 7:14
E vuqa na italanoa ena Veiyalayalati Makawa e vakaraitaka na nona maroroya na Turaga na Nona yalayala vei ira na Isireli.
Nai Vakatekivu 9:13–17; Jeremaia 11:4–5; Iperiu 11:1–35
Ni ra vakarorogo na Isireli vei ira na parofita ka muria na ivakaro, e a vukei ira na Turaga. Ni ra talaidredre, a sega ni rawa ni vukei ira o Koya.
Nai Vakarua 11:26–28; Jope 36:11–12
O iko o lewe ni matavuvale nei Tamada Vakalomalagi. Na Tamada Vakalomalagi e dau yalololoma, ka lomani iko o Koya. E tiko na Nona ituvatuva me baleti iko. Ena vuku ni Turaga o Jisu Karisito, sa rawa ni o lesu tale mo laki bula vata tale kei na Tamada Vakalomalagi. Me vaka ga e a vakatavulici vei ira na Isireli, sa rawa ni o digitaka mo vakabauta na Turaga ka muria na Nona ivakaro.