“Jona na Parofita,” iTalanoa eso mai na Veiyalayalati Makawa (2022)
“Jona na Parofita,” iTalanoa eso mai na Veiyalayalati Makawa
Jona 1–4
Jona na Parofita
Vulica mo vakararavi ki na nona loloma veivueti na Turaga
O Jona e dua na parofita. E a kaya vua na Turaga me vakasalataki ira na tamata e Ninive ni na vakarusai na nodra koro kevaka era sega ni veivutuni.
Ia ko ira na kai Ninive era sa veimecaki kei ira na Isireli. E a sega ni vinakata o Jona me vunau vei ira. E a qai vodo o koya ki na dua na waqa me dro tani vakayawa mai Ninive.
Ena gauna e a tiko kina ena waqa o Jona, e a yaco e dua na cagilaba levu. Era a taqaya na tamata ena loma ni waqa ena vuku ni nodra bula. Era a kerei Jona me masu vua na Turaga me vakabulai ira.
A kila tu o Jona ni a tala mai na Turaga na cava baleta ni a dro tiko mai na veika a kerea vua na Turaga me cakava. E vinakata o Jona me vakabulai ira na tamata ena waqa. E kaya o koya kevaka era viritaki koya ki waitui, ena mudu na cava.
Era sega ni vinakata na tamata me ra viritaki Jona ki wai. Era tovolea mera vocetaka na waqa ki vanua, ia sa rui voravora na cava. Kena itinitini, era sa qai kolotaki Jona ki wai.
Sa ruru na cava. Ia a qai tilomi Jona e dua na ika levu.
E a tiko o Jona ena kete ni ika me tolu na siga ka tolu na bogi. Ena gauna o ya, e a masu ka veivutuni o Jona. A vinakata me cakava na ka dodonu ka vakarorogo vua na Turaga. Sa rogoca na masu nei Jona na Turaga ka kitaka me luaraki Jona na ika ki na vanua mamaca.
E a kaya tale na Turaga vei Jona me vunau vei ira na tamata e Ninive. Ena gauna oqo a talairawarawa o Jona. E a lako ki Ninive ka tukuna vei ira na tamata me ra veivutuni de na qai vakarusa na nodra korolevu na Turaga. Sa veivutuni na tui kei ira na nona tamata. Na Turaga e a vosoti ira ka sega ni vakarusai Ninive.
Ia a rarawa o Jona ni ra a sega ni vakarusai na tamata. E nanuma o koya ni sega ni ganita me ra vosoti.
Me vakavulici Jona ena dua na lesoni, e a vakatubura na Turaga e dua na kau me vakarurugi Jona mai na matanisiga. Sa qai mate na kau, ka sa rarawa ko Jona ena vuku ni kau.
E a vakavulica tiko na Turaga vei Jona e dua na lesoni me baleti ira na Luvena. E a vulica o Jona ni dodonu me rarawa ena gauna era sega ni veivutuni kina na tamata ka dodonu me marau ni ra veivutuni.