“Ranadi o Esiteri,” iTalanoa ni Veiyalayalati Makawa (2022)
“Ranadi o Esiteri,” iTalanoa ni Veiyalayalati Makawa
Esiteri 2–5; 7–9
Ranadi o Esiteri
Yaloqaqa ena dua na gauna ni leqa rerevaki
Eso na Isireli era vakatokai me Jiu. O Esiteri e dua na Jiu ka bula voli mai Perisia. Rau sa mate na nona itubutubu, ka sa qaravi koya tiko na ganena o Moatekai. E sureti o koya ki na vale ni tui kei ira eso tale na goneyalewa ena matanitu. E vinakata na tui e dua na ranadi vou, ka digitaki Esiteri o koya.
Na tui e tiko e dua na nona italai ka yacana o Emani ka a toso cake ki na kaukauwa cecere. Ea vukea na tui ko Emani me lewa na vanua. Ea vakavuna na tui me ra cuva kecega na tamata vei Emani.
Ia o Moatekai ena sega ni via cuva vei Emani. E dau cuva ga o Moatekai vua na Turaga. Oqo ea cudru kina o Emani. Ea vinakata o koya me totogitaki Moatekai kei ira kece na Jiu.
Na Lako Yani 20:5;Esiteri 3:5–6, 8
Ea tukuna o Emani vua na tui ni o ira na Jiu era sega ni muria na lawa ni tui. A sa laiva na tui me bulia o Emani e dua na lawa vou: ena dua na siga, me ra na vakamatei kece na Jiu.
A kerei Esiteri o Moatekai me vosa vua na tui. Sa rawa vua na tui me veisautaka na lawa i Emani ka vakabulai ira na Jiu. Ia ea rere o Esiteri. Ena so na gauna ea vakamatei ira na tamata na tui ka ra mai vosa vua ka sega ni sureti.
Ea kerei Esiteri o Moatekai me vakasamataki ira na Jiu era na vakamatei. E kaya o Moatekai ni Turaga e rawa sara ga ni biuti Esiteri ena vale ni tui me vakabulai ira na Jiu.
E kila o Esiteri ni dodonu me vosa vua na tui, kevaka mada ga e kena ibalebale me na vakamatei. Ea kerei ira kece na Jiu kei ira na nona italai o Esiteri me ra lolo vata kei koya.
Ni oti na lolo me tolu na siga, a vakarautaki koya o Esiteri ka laki raica na tui.
Ni toro yani o koya vua na tui, sa dodoka mai na nona ititoko. Oqo e kena ibalebale ni marau na tui ni raici koya ka na sega ni biuti koya me mate. Ea tarogi koya se cava e vinakata. Ea tukuna o Esiteri vua na tui ni ra sa sotava na nona tamata na veika rerevaki. Ena vuku ni lawa nei Emani, ena vakamatei o koya kei ira kece na Jiu ena matanitu.
Sa cudruvi Emani na tui, ka vakavuna me vakamatei. Ea cakava na tui e dua na lawa vou ka taqomaki ira na Jiu. Ia oqo sa vakatarai me ra taqomaki ira kevaka e dua sa via vakacacani ira.
Na nona vakabauta na Turaga kei na nona yaloqaqa o Esiteri me vosa vua na tui sa vakabulai ira na nona tamata. Sa isosomi ni mate kei na rarawa, sa yaco e dua na kana magiti. Era sa mamarau na Jiu.