“Jekope kei na Nona Matavuvale,” iTalanoa ni Veiyalayalati Makawa (2022)
“Jekope kei na Nona Matavuvale,” iTalanoa ena Veiyalayalati Makawa
Nai Vakatekivu 27–33
Jekope kei na Nona Matavuvale
Na Sala e rokova kina na Turaga na Nona yalayala
Sa biuta o Jekope na nona vale me drotaka kina na cudru nei tuakana o Iso. Ea vakalougatataki Jekope o tamana me kunea ka vakamautaka e dua na marama e lomana na Turaga ka muria tiko na Nona ivakaro.
Nai Vakatekivu 27:42–46; 28:1–5
Ni sa lako o Jekope, a sikovi koya na Turaga ena dua na raivotu. Ea yalataka o koya me dau tiko vata kei Jekope. Ea yalataka o Jekope me solia vua na Turaga e dua na ikatini ni veika kece e ciqoma.
Nai Vakatekivu 28:10–16, 20–22
E yalataka na Turaga vei Jekope ni na levu na luvena. Mai vei ira na luvei Jekope, era na vakalougatataki kina na veimatavuvale e vuravura me ra kila na iVakabula. Na nona matavuvale e muri o Jekope e vakatokai na mataqali i Isireli.
Nai Vakatekivu 28:3–4, 14; 1 Nifai 10:14
Ea lako o Jekope ki na dua na vanua ka vakatokai ko Karana. E kea ea laki domona e dua na marama yalododonu e yacana o Rejeli.
Ea vakadonuya o Jekope me cakacaka me vitu na yabaki vei tamai yalewa, o Lepani, kevaka me laivi koya o Lepani me vakamautaki Rejeli. Ea vakadonuya o Lepani. Ea cakacaka o Jekope me vitu na yabaki.
Ia ea vinakata o Lepani me vakamau eliu o Lia, na luvena yalewa qase duadua. Ena gauna ni vakamau, ea lawakitaki Jekope o Lepani ka sa vakamautaki Lia. Ia o Jekope e domoni Rejeli. Ea yalataka okoya ni na cakacaka me vitu tale na yabaki ke rawa ni vakamautaki koya talega. E vakadonuya o Lepani, ka tekivu me tubu na matavuvale nei Jekope.
Nai Vakatekivu 29:28–35; 30:3–13, 17–24; Jekope 2:27–30
E sega ni saumi Jekope vakadodonu o Lepani. Ia na Turaga ea vakalougatataki Jekope ena vuqa na manumanu ka tukuna vei Jekope me lesu tale ki vale.
Nai Vakatekivu 30:31, 43; 31:1–7, 17–18
Ena nona ilakolako ki vale, ea vulica o Jekope ni na mai sotavi koya na tuakana o Iso kei na 400 na tamata.
E nanuma o Jekope ni se cudruvi koya tiko o Iso. Ea rerevaka o Jekope na taqomaki ni nona matavuvale, ka kauti iratou ki na dua na vanua taqomaki ka masu.
Ea masu o Jekope ena bogi taucoko ka laki mataka cake. Ea sikovi Jekope na Turaga ka vakalougatataki koya. Ea tukuna vei Jekope na Turaga ni na dua na iliuliu cecere okoya vei ira e lewe vuqa. Sa veisautaka na Turaga na yaca i Jekope me ko Isireli.
Vakalailai ga sa kunei Jekope kei na nona matavuvale o Iso kei ira na nona tamata. Sa sega tale ni cudruvi Jekope tiko o Iso. Ea cici me tavaki Jekope ka mokoti koya. Sa marau dina okoya ni raici koya ka sotavi iratou na nona matavuvale. Ea marau talega o Jekope ni raici Iso tale.
Ea maroroya tu na Turaga na nona iyalayala vei Jekope ena nona bula taucoko. Ea yaco yani ki vale o Jekope kei na nona matavuvale ka laki vakaitikotiko kina. Mai na gauna o ya, e sa vakatokai kina o Jekope me ko Isireli, ka vakatokai na nona matavuvale na Isireli. Ea tomana tikoga na nona muria na ivakaro ka qarava na Turaga.