“Eparaama kei Sera,” iTalanoa eso mai na Veiyalayalati Makawa (2021)
“Eparaama kei Sera,” iTalanoa eso mai na Veiyalayalati Makawa
Nai Vakatekivu 11–15; 17 Eparaama 1–2
Eparaama kei Sera
E dua na yalayala me vakalougatataki kina na matavuvale ni kawatamata
E a vakaitikotiko o Eparaama ena korolevu ko Uri. O ira na bete ca era a vinakata mera vakacabori koya ki na nodra kalou matakau. Sa masu ko Eparaama, ka a vakabulai koya na Turaga.
Sa qai vakaroti Eparaama kei na watina ko Sera na Turaga me rau biuti Uri ka lako ki na dua na vanua yawa. E yalataka o Koya ni na vakalougatataki rau ena nodrau ilakolako.
Nai Vakatekivu 12:1–3; Eparaama 2:2–4
Erau a vakabauta na Turaga o Eparaama kei Sera ka biuti Uri. Ia erau a rarawa baleta ni sega ni rawa me rau vakaluveni. Sa vakacegui rau na Turaga. A yalataka o koya ni na dua na luvedrau.
Nai Vakatekivu 11:30–31; 15:1–6; 17:2–16; Eparaama 2:6–9
E a masu o Eparaama vua na Turaga me vulica eso tale na ka me baleti Koya. A sikovi Eparaama na Turaga ka tukuna vua ni o Koya o Jiova. A cakava o Jiova e dua na veiyalayalati vata kei Eparaama. A yalataka o Koya ni na ciqoma o Eparaama na matabete. A yalataka talega ni na vakalougatataka na veimatavuvale kece ga e vuravura na matavuvale nei Eparaama.
Ni rau lako tiko o Eparaama kei Sera, erau gadreva me rau kune kakana. Erau tovolea me rau vakaitikotiko ena dua na vanua e vakatokai ko Kenani. Sa sega na kakana e kea, ka rau mani lako ki Ijipita. Ia e vakarerevaki vei rau na nodrau tiko mai Ijipita.
Nai Vakatekivu 12:10–20; Eparaama 2:21–25
Erau a biuti Ijipita o Eparaama kei Sera ka lesu me laki vakaitikotiko e Kenani. Erau kauta vata mai kei rau na kakana kei na manumanu mai Ijipita. O Kenani e tiki ni vanua a yalataka vei rau na Turaga.
Nai Vakatekivu 13:1–4, 12; Eparaama 2:19
E maroroya talega na Turaga na nona yalayala ni na ciqoma o Eparaama na matabete. Ena dua na siga erau a sotava o Eparaama kei Sera e dua na tui yalododonu ka yacana o Melikiseteki. O Eparaama e saumi ikatini vua.
Nai Vakatekivu 14:18–24; Alama 13:15
E a ciqoma o Eparaama na matabete mai vei Melikiseteki. Oqo na matabete vata ga erau a ciqoma na parofita o Atama kei Noa.
Vakadewa i Josefa Simici, Nai Vakatekivu 14:36–40; Eparaama 1:2–4; Vunau kei na Veiyalayalati 84:14
Erau a bula marau tiko mai Kenani o Eparaama kei Sera, ia rau se lomaleqa tikoga baleta ni sega ni dua na luvedrau. E dodonu me rau vakabauta na yalayala ni Turaga ni dua na siga ena tubu na nodrau matavuvale ka vakalougatataka na vuravura taucoko.