Vahe 54
Kuo Toetuʻu ʻa Sīsū
Naʻe ʻalu ʻa Mele Makitaline, ko e fefine naʻe fakamoʻui ʻe Sīsū, ki he fonualotó. Naʻá ne ʻohovale heʻene sio kuo tekaʻi ʻa e maká. Naʻe pulia e sino ʻo Sisuú mei he fonualotó.
Naʻá ne lele ʻo fakahā kia Pita mo Sione kuo ʻave ʻa e sino ʻo Sīsuú. Naʻe ʻikai te ne ʻiloʻi pe naʻe ʻi fē.
Ne lele ʻa Pita mo Sione ki he fonualotó. Naʻá na ʻilo e tupenu ʻo Sīsū naʻe telio ʻakí, ka naʻe pulia e sino ia ʻo Sīsuú. Naʻe ʻikai ke ʻilo ʻe Pita mo Sione ʻa e meʻa ke faí. Naʻá na foki ki ʻapi.
Naʻe nofo pē ʻa Mele Makitaline ʻi he fonualotó ʻo tangi. ʻI heʻene toe vakai ki he fonualotó, naʻá ne mamata ki ha ongo ʻāngelo.
Naʻá na fehuʻi ange kia Mele Makitaline pe ko e hā ʻoku tangi aí. Naʻá ne tala ange kuo ʻave ʻa e sino ʻo Sīsuú. Naʻe ʻikai te ne ʻilo pe ʻoku ʻi fē.
Naʻá ne tafoki ʻo sio ki ha tokotaha. Naʻá ne fakakaukau ko e tauhi ngoué ia. Naʻá ne fehuʻi ange pe ko e hā ʻoku tangi aí. Naʻá ne ʻeke ange kiate Ia pe ʻokú Ne ʻilo nai ʻoku ʻi fē ʻa e sino ʻo Sīsuú.
Naʻe pehē mai ʻa e tangatá, “Mele,” pea naʻá ne ʻilo ko Sīsū Ia. Naʻá Ne kole ange ke ne tala ki he Kau ʻAposetoló kuó Ne toetuʻu.
Naʻe fakahā ʻe Mele Makitaline mo ha kau fafine ki he Kau ʻaposetoló kuo toetuʻu ʻa Sīsū. Naʻe ʻikai ke tui ki ai ʻa e Kau ʻAposetoló ʻi he ʻuluaki taimí.
Kimui ange aí, ne haʻu ʻa Sīsū ki he lokí lolotonga e fepōtalanoaʻaki ʻa e Kau ʻAposetoló. Naʻe manavahē ʻa e Kau ʻAposetoló. Naʻa nau kei fakakaukau kuó Ne mate.
Naʻe tala ange ʻe he Fakamoʻuí ke nau ala mai ki Hono ongo nimá mo Hongo ongo vaʻé. Kuó Ne toetuʻu— kuo toe fakataha Hono sinó mo Hono laumālié.
Naʻe fiefia e Kau ʻAposetoló he mamata kiate Iá. Naʻá Ne kole ange ha meʻakai. Naʻa nau ʻoange kiate Ia ʻa e ika mo ha ngeʻesi honi. Naʻá Ne kai ia.
Ko Sīsū Kalaisi ʻa e fuofua tokotaha ke toetuʻú. Hili iá, ne toetuʻu mo ha niʻihi kehe pea ne mamata kiate kinautolu e kakai nofo ʻi Selusalemá. Kuo pehē ʻe Sīsū, “Ko au ko e toetuʻu, mo e moʻui.” Koeʻuhí kuó Ne ikunaʻi ʻa e maté, te tau toetuʻu kotoa pē ʻi ha ʻaho.