Vahe 19
Ko e Malanga he Moʻungá
ʻI ha ʻaho ʻe taha, naʻe akoʻi ʻe Sīsū ʻa e ongoongoleleí ki Heʻene kau ākongá ʻi ha tafaʻaki moʻunga ʻi he veʻe Tahi Kālelí.
Naʻá Ne fakahā ange kiate kinautolu ʻa e anga ʻo e moʻuí koeʻuhí ke nau lava ʻo fiefia mo toe nofo fakataha mo e Tamai Hēvaní. Te tau lava foki ʻo fiefia mo kitautolu ʻi he ngaahi meʻa naʻá Ne akoʻi kiate kinautolú.
Naʻe pehē ʻe Sīsū ʻoku totonu ke tau angamalū, faʻa kātaki mo loto fiemālie ke talangofua ki he Tamai Hēvaní.
ʻOku totonu ke tau feinga mālohi ʻaupito ke moʻui angatonu.
ʻOku totonu ke tau fakamolemoleʻi ʻa e kakai ʻoku nau fakamamahiʻi kitautolu mo fakalaveaʻi hotau lotó. Kapau te tau fakamolemoleʻi kinautolu, ʻe fakamolemoleʻi kitautolu ʻe he Tamai Hēvaní.
ʻOku totonu ke tau faʻa fakalelei, ʻofa ki he kakai kehé, pea tokoniʻi e tokotaha kotoa ke nau feʻofaʻaki.
ʻOku totonu ke ʻoua te tau manavahē ke fakahā ki he kakaí ʻa e ongoongoleleí pe fakahā kiate kinautolu ʻoku tau ʻofa ʻi he Tamai Hēvaní. ʻI he mamata mai ʻa e kakaí ʻoku tau fai leleí, ʻe tokoni ia kiate kinautolu ke nau tui foki ki he ʻOtuá.
ʻOku totonu ke tau tauhi ʻetau ngaahi palōmesí.
Pea kapau ʻoku tau loto ke angaʻofa mai e niʻihi kehé kiate kitautolu, ʻoku totonu ke tau angaʻofa kiate kinautolu.
Naʻe pehē ʻe Sīsū kapau te tau fai e ngaahi meʻá ni, te tau fiefia, ʻe tāpuakiʻi kitautolu ʻe he Tamai Hēvaní pea te tau toe nofo fakataha mo Ia.