Vahe 1
ʻIlisapeti mo Sakalia
Ko Sakalia mo hono mali ko ʻIlisapetí, ko e ongo Siu naʻá na nofo ofi pē ki Selusalema. Naʻá na talangofua ki he ngaahi fekau ʻa e ʻOtuá. Naʻá na lotu he ngaahi taʻu lahi ke maʻu haʻana pēpē. Naʻá na aʻu pē ʻo vaivai ʻoku teʻeki maʻu haʻana fānau.
Ko Sakaliá ko e taulaʻeiki ia he temipalé. ʻI he ʻaho ʻe taha naʻe haʻu ha ʻāngelo ko Kepaleli hono hingoá kiate ia. Naʻe pehē ʻe Kepaleli ʻe tali ʻe he ʻOtuá ʻa e ngaahi lotu ʻa Sakalia mo ʻIlisapetí. Te na maʻu ha pēpē. Naʻe pehē ʻe Kepaleli ʻoku totonu ke na fakahingoa ʻa e pēpeé ko Sione.
Naʻe pehē ʻe Kepaleli ʻe hoko ʻa Sione ko ha palōfita angatonu ʻa e ʻOtuá. Te ne akoʻi e kakaí ʻo kau kia Sīsū Kalaisi.
Naʻe ʻikai ke tui ʻa Sakalia ki he ʻāngeló. Naʻe fuʻu motuʻa ʻa ʻIlisapeti ke maʻu ha pēpē. Naʻe pehē ʻe Kepaleli koeʻuhí ko e ʻikai ke ne tui ki he meʻa kuo talaʻofa ange ʻe he ʻOtuá, te ne (Sakalia) noa kae ʻoua kuo fanauʻi mai ʻa Sione.