Vahe 44
Ko e Hāʻele ʻa e Fakamoʻuí ki Selusalemá
Ne tala ʻe he kakai ʻe niʻihi ki he kau taulaʻeikí mo e kau Fālesí kuo toe fakamoʻui ʻe Sīsū ʻa Lasalosi. Naʻe fakakaukau ʻa e kau Fālesí ʻe faifai pea tui e taha kotoa pē kia Sīsū. Naʻa nau manavahē naʻa ʻikai toe fie fanongo ange ha taha kiate kinautolu.
Naʻe faʻufaʻu ʻe he kau Fālesí ha founga ke tamateʻi ai ʻa Sīsū. Naʻa nau tatali kae ʻoua ke Ne ʻalu ange ki Selusalema ki he kātoanga ʻo e Lakaatú.
Naʻe fononga ʻa Sīsū ki Selusalema. Naʻe fanongo ʻa e kakai tokolahi ki Heʻene hāʻele maí pea naʻa nau ʻalu atu ke fakafetaulaki kiate Ia. Naʻe hāʻele mai ʻa Sīsū ʻi ha ʻasi ki he koló. Kuo tohi ʻe ha palōfita ʻe fakahoko ʻeni ʻe he ʻAlo ʻo e ʻOtuá. Naʻe tui e kakai tokolahi ko Sīsuú ko e ʻAlo ia ʻo e ʻOtuá. Naʻa nau faliki paame ʻa e halá pea ko e niʻihi naʻa nau fola honau valá ke Ne hāʻele ai. Naʻa nau kaila hosana mo pehē ko honau tuʻí ʻa Sīsū.
Naʻe omi e kakai ʻi Selusalemá ke mamata ki he meʻa naʻe hokó. Naʻa nau fehuʻi pe ko hai ʻa Sīsū. Naʻe fakahā ange ʻe ha kakai ʻi he matangá ko e palōfita Ia mei Nāsaleti.
Naʻe ʻita ʻa e kau Fālesí. Naʻe ʻikai ke nau loto ke tui ʻa e kakaí ko Sīsū ʻa e Fakamoʻuí. Naʻe ʻafioʻi ʻe Sīsū ʻa e fie maʻu ʻe he kau Fālesí ke tāmateʻi Iá.
Naʻe fakahā ange ʻe Sīsū ki Heʻene kau ākongá ʻe vavé ni pē Haʻane pekia. Te Ne mamahi koeʻuhí ko e angahala ʻa e kakaí pea te Ne toki pekia he kolosí. Ko e Fakamoʻui Ia ʻo e māmaní. Ko hono ʻuhinga ʻeni naʻá Ne haʻu ai ki he māmaní.