Vahe 18
Ko e Fili ʻe Sīsū ʻEne Kau ʻĀposetoló
Naʻe toutai ʻa Pita mo hono ngaahi kaungāmeʻá he poó kotoa mo e ʻikai pē maʻu ha ika. Hili e akonaki ʻa Sīsuú, naʻá Ne tala kia Pita ke maʻumaʻu atu e vaká ki he lolotó. Peá Ne toki talaange kia Pita mo hono ngaahi kaungāmeʻá ke ʻaʻau honau kupengá ki tahi.
Naʻa nau maʻu e ika lahi pea kamata mahae honau kupengá.
Ne ui ʻa Pita ki hono kaungātoutai ʻi ha vaka ʻe taha ke nau omi ʻo tokoni. Ne fakafonu ika fakatouʻosi e ongo vaká pea kamata ke ngoto hifo.
Naʻe ofo ʻa Pita mo hono ngaahi kaungāmeʻá. Naʻa nau ʻilo ne fakahoko ʻeni ʻe Sīsū Kalaisi.
Naʻe fakatōmapeʻe ʻa Pita ʻi he vaʻe ʻo e Fakamoʻuí. Naʻá ne pehē naʻe ʻikai ke ne taau ke ofi kia Sīsū. Naʻe fakahā ange ʻe Sīsū kia Pita ke ʻoua ʻe manavahē.
Ko e toko ua ʻo e ngaahi kaungāmeʻa ʻo Pitá, ko Sēmisi mo Sione, ko e ongo tautehina. Naʻe fakahā ange ʻe Sīsū kia Pita, Sēmisi, mo Sione ke muimui ʻiate Ia pea hoko ko e “kau toutai tangata.” Naʻe siʻaki ʻe he kau tangatá e meʻa kotoa pē naʻa nau maʻú pea muimui ʻia Sīsū. Naʻe kole foki ʻe he Fakamoʻuí mo ha kau tangata kehe ke muimui ʻiate Ia.
Naʻe fili ʻe Sīsū ʻa e Kau ʻAposetolo ʻe toko hongofulu mā ua ke tataki Hono Siasí. Naʻá Ne lotua he poó kotoa ke Ne lava ʻo fili ʻa e kau tangata totonú. ʻI he pongipongi hokó naʻá Ne fili mo fakanofo e kau tangata ʻe toko hongofulu mā ua, foaki ange kiate kinautolu ʻa e lakanga fakataulaʻeikí mo e mafai ke hoko ko e Kau ʻAposetoló.
Ne fononga e Kau ʻAposetoló ki ha ngaahi kolo lahi. Naʻa nau akoʻi e ongoongoleleí mo fakamoʻui e kakaí. Naʻa nau foki ke fakahā kia Sīsū e meʻa kuo nau faí.