Vahe 47
Ko e Kau Taupoʻou ʻe Toko Hongofulú
Naʻe ulo e ngaahi maama lolo ʻa e kau fefine ʻe toko hongofulú. Naʻe poto ʻa e kau fefine ʻe toko nima. Naʻe ʻi ai ʻenau lolo lahi ange.
Naʻe vale e kau fefine ʻe toko nima ko eé. Ko e lolo pē naʻa nau maʻú ʻa ē naʻe ʻi heʻenau ngaahi māmá.
Ne fuoloa mo e ʻikai ke haʻu ʻa e tangata taʻané. Ne maha e lolo he ngaahi māmá. Naʻe ʻi ai pē e lolo ʻa e kau fefine potó ke ʻutu ʻi heʻenau ngaahi māmá. Naʻe pau ke toe ʻalu e kau fefine valé ʻo fakatau mai ha toe lolo.
Lolotonga ʻenau ʻalú, naʻe haʻu ʻa e tangata taʻané. Naʻá ne fakahū ʻa e kau fefine poto ʻe toko nimá ki he taʻané.
ʻI he foki mai ʻa e kau fefine vale ʻe toko nimá, kuo tāpuni e matapaá. Naʻe ʻikai ke nau lava ʻo hū ki he taʻané.
ʻOku hangē pē ʻa Sīsuú ko e tangata taʻane ʻi he talanoa ko ʻení. ʻOku hangē ʻa e kāingalotú ko e kau fefine ʻe toko hongofulú. ʻI he taimi ʻe toe hāʻele mai ai ʻa Sīsuú, ʻe mateuteu e kāingalotu ʻe niʻihi. Ne nau talangofua ki he ngaahi fekau ʻa e ʻOtuá. He ʻikai mateuteu ʻa e toengá. ʻE ʻikai te nau lava ʻo nofo mo e Fakamoʻuí ʻi he taimi te Ne toe hāʻele mai aí.
Mātiu 25:13; Tokāteline mo e Ngaahi Fuakava 45:56–57; 88:86, 92; Jesus the Christ, 576–80