« មេរៀនទី ២៧ ឯកសាររៀបចំសម្រាប់ថ្នាក់ ៖ការស្វែងរកក្ដីសង្ឃឹមក្នុងពន្លឺ និងជីវិតនៃពិភពលោក » ព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់ ( ឆ្នាំ ២០២៣ )
« មេរៀនទី ២៧ ឯកសាររៀបចំសម្រាប់ថ្នាក់ » ព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់
មេរៀនទី ២៧ ឯកសាររៀបចំសម្រាប់ថ្នាក់
ការស្វែងរកក្ដីសង្ឃឹមក្នុងពន្លឺ និងជីវិតនៃពិភពលោក
ទោះជាយើងចង់ឲ្យជីវិតរបស់យើងសប្បាយរីករាយក៏ដោយ ក៏ អារម្មណ៍នៃភាពងងឹត និងភាពអស់សង្ឃឹមកើតមានម្តងម្កាលគឺជារឿងធម្មតាសម្រាប់យើងទាំងអស់គ្នា ។ អារម្មណ៍ទាំងនេះអាចមកពីអំពើបាប ការភ័យខ្លាច ការសង្ស័យ ឬការបាត់បង់ ។ វាគ្រាន់តែជាផ្នែកមួយនៃបទពិសោធន៍ជីវិតរមែងស្លាប់របស់យើងប៉ុណ្ណោះ ។ កាលអ្នកសិក្សា សូមពិចារណាពីរបៀបដែលអ្នកអាចស្វែងរកកម្លាំងនៅក្នុងព្រះយេស៊ូវគ្រីស្ទ « គឺជាពន្លឺ ជាជីវិត ហើយជាសេចក្តីសង្ឃឹមនៃពិភពលោក » ( « ព្រះគ្រីស្ទ ដ៏មានព្រះជន្មរស់ ៖ ទីបន្ទាល់នៃពួកសាវក » នៅលើគេហទំព័រ ChurchofJesusChrist.org ) ។
ផ្នែកទី ១
តើពន្លឺ និងជីវិតព្រះយេស៊ូវគ្រីស្ទផ្តល់កម្លាំងដល់ខ្ញុំដោយរបៀបណា ?
អេសាយបានព្យាករណ៍ថា ព្រះមែស៊ីនឹងជាពន្លឺដល់ពិភពលោក ( សូមមើល អេសាយ ៤៩:៦; ៦០:១–៣ ) ។ ព្រះយេស៊ូវគ្រីស្ទបានបញ្ជាក់ថា ទ្រង់គឺជាព្រះមែស៊ីដែលបានព្យាករណ៍ នៅពេលទ្រង់ប្រកាសថា ៖ « ខ្ញុំជាពន្លឺលោកីយ៍ ៖ អ្នកណាដែលតាមខ្ញុំ នោះមិនដែលដើរក្នុងសេចក្តីងងឹតឡើយ គឺនឹងមានពន្លឺនៃជីវិតវិញ » ( យ៉ូហាន ៨:១២ ) ។
ប្រធាន ដាល្លិន អេក អូក ទីប្រឹក្សានៅក្នុងគណៈប្រធានទីមួយបានពន្យល់ថា ៖
ព្រះយេស៊ូវគ្រីស្ទគឺជា ពន្លឺ នៃពិភពលោក ពីព្រោះទ្រង់គឺជាប្រភពនៃពន្លឺដែលជួយពន្លឿនការយល់ដឹងរបស់យើង ពីព្រោះការបង្រៀនរបស់ទ្រង់ និងគំរូរបស់ទ្រង់បំភ្លឺផ្លូវរបស់យើង ហើយដោយសារព្រះចេស្តាទ្រង់បញ្ចុះបញ្ចូលយើងឲ្យធ្វើល្អ ។ ( « The Light and Life of the World » Ensign ខែ វិច្ឆិកា ឆ្នាំ ១៩៨៧ ទំព័រ ៦៤ )
នៅពេលព្រះយេស៊ូវបង្ហាញព្រះកាយដល់ពួកសាសន៍នីហ្វៃ និងលេមមិន ទ្រង់បានប្រកាសថា « ហើយមើលចុះ យើងជាពន្លឺ ហើយជា ជីវិត នៃពិភពលោក » ( នីហ្វៃទី ៣ ១១:១១ បានបន្ថែមការបញ្ជាក់ សូមមើលផងដែរ ម៉ូសាយ ១៦:៩ ) ។ ប្រធាន អូក បានមានប្រសាសន៍ពីតួនាទីរបស់ព្រះអង្គសង្រ្គោះដែលជាជីវិតនៃពិភពលោកនេះ ៖
ព្រះយេស៊ូវគ្រីស្ទគឺជា ពន្លឺ នៃពិភពលោក ដោយសារតែតួនាទីដ៏ពិសេសរបស់ទ្រង់ ដែលបទគម្ពីរហៅថា « ផែនការដ៏ធំ ហើយអស់កល្បជានិច្ច នៃការរំដោះពីសេចក្ដីស្លាប់ » ( នីហ្វៃទី ២ ១១:៥ ) ។ …
[ ទ្រង់ ] គឺជា ជីវិត នៃលោកិយ ដោយសារតែការមានព្រះជន្មរស់ឡើងវិញរបស់ទ្រង់ និងដង្វាយធួនរបស់ទ្រង់ដែលបានសង្គ្រោះយើងពីការស្លាប់ទាំងខាងរូបកាយ និងខាងវិញ្ញាណ ។ ( « The Light and Life of the World » Ensign ខែ វិច្ឆិកា ឆ្នាំ ១៩៨៧ ទំព័រ ៦៤, ៦៥ )
ស៊ីស្ទើរ សារ៉ុន អូប៊ែង ទីប្រឹក្សាទីមួយក្នុងគណៈប្រធានសមាគមសង្គ្រោះទូទៅបានចែកចាយបទពិសោធន៍មួយដែលបង្ហាញពីសារៈសំខាន់របស់ព្រះយេស៊ូវគ្រីស្ទក្នុងការធ្វើជាពន្លឺ និងជាជីវិតរបស់យើង ៖
ការិយាល័យរបស់ខ្ញុំនៅក្នុងអគារសមាគមសង្គ្រោះមើលឃើញព្រះវិហារបរិសុទ្ធសលត៍ លេកបានយ៉ាងឥតខ្ចោះ ។ ជារៀងរាល់យប់ ដូចជាសព្វដង ពន្លឺភ្លើងខាងក្រៅព្រះវិហារបរិសុទ្ធបានបំភ្លឺនៅពេលព្រលប់ ។ ព្រះវិហារបរិសុទ្ធគឺជាពន្លឺបំភ្លឺយ៉ាងខ្ជាប់ខ្ជួននៅក្រៅបង្អួចរបស់ខ្ញុំ ។
នៅយប់មួយកាលពីខែកុម្ភៈកន្លងទៅនេះ ពេលព្រះអាទិត្យលិច ក៏នោះការិយាល័យរបស់ខ្ញុំងងឹតខុសពីធម្មតា ។ ពេលខ្ញុំក្រឡេកមើលទៅក្រៅបង្អួច ព្រះវិហារបរិសុទ្ធងងឹតឈឹង ។ ពន្លឺពុំបានបំភ្លឺឡើងទេ ។ ខ្ញុំបានមានអារម្មណ៍ស្រងូតស្រងាត់ភ្លាម ។ ខ្ញុំពុំអាចមើលឃើញកំពូលព្រះវិហារបរិសុទ្ធដែលខ្ញុំធ្លាប់បានមើលរាល់ល្ងាចអស់ជាច្រើនឆ្នាំទៀតឡើយ ។
ដោយមើលឃើញភាពងងឹតនៅកន្លែងដែលខ្ញុំបានរំពឹងទុកថានឹងមានពន្លឺ វាបានរំឭកខ្ញុំថា សេចក្ដីត្រូវការដ៏សំខាន់មួយដែលយើងមានដើម្បីរីកចម្រើនគឺការបន្តតភ្ជាប់នឹងប្រភពនៃពន្លឺរបស់យើងគឺ—ព្រះយេស៊ូវគ្រីស្ទ ។ ទ្រង់គឺជាប្រភពនៃថាមពលរបស់យើង ជាពន្លឺ និងជីវិតនៃពិភពលោក ។ បើគ្មានការភ្ជាប់ដ៏រឹងមាំទៅនឹងទ្រង់ទេ នោះយើងចាប់ផ្ដើមស្លាប់ខាងវិញ្ញាណហើយ ។ សូមដឹងថា សាតាំងព្យាយាមប្រើប្រាស់សម្ពាធលោកិយដែលយើងទាំងអស់គ្នាប្រឈមមុខ ។ វាខំធ្វើឲ្យពន្លឺយើងស្រអាប់ ផ្ដាច់ទំនាក់ទំនងរបស់យើង កាត់ផ្ដាច់ការផ្គត់ផ្គង់ថាមពល ទុកឲ្យយើងនៅម្នាក់ឯងក្នុងទីងងឹត ។ ( « Christ: The Light That Shines in the Darkness » Liahona ខែ ឧសភា ឆ្នាំ ២០១៩ ទំព័រ ៧៣ )
សញ្ជឹងគិតនៅក្នុងការរៀបចំសម្រាប់ថ្នាក់
តើពរជ័យអ្វីខ្លះដែលអ្នកបានដកពិសោធន៍នៅក្នុងជីវិតរបស់អ្នក នៅពេលអ្នកបានខិតខំដើម្បីភ្ជាប់ទៅនឹងពន្លឺ និងជីវិតនៃពិភពលោកនេះ ? តើអ្នកអាចធ្វើអ្វីខ្លះដើម្បីធ្វើឲ្យតំណភ្ជាប់នោះកាន់តែរឹងមាំឡើង ?
ផ្នែកទី ២
តើការផ្តោតលើព្រះយេស៊ូវគ្រីស្ទអាចនាំក្តីសង្ឃឹមដល់ខ្ញុំដោយរបៀបណា ?
ការអនុវត្តសេចក្តីជំនឿលើព្រះយេស៊ូវគ្រីស្ទដែលជាពន្លឺ និងជាជីវិតនៃពិភពលោកនេះអាចផ្តល់ពរជ័យដល់ជីវិតរបស់ខ្ញុំតាមរបៀបជាច្រើន ។ របៀបមួយក្នុងចំណោមរបៀបទាំងនោះគឺតាមរយៈការផ្តល់ក្តីសង្ឃឹមដល់យើង ។
ប្រធាន ឌៀថើរ អេហ្វ អុជដូហ្វ ពេលនោះជាទីប្រឹក្សាទីពីរក្នុងគណៈប្រធានទីមួយបានពន្យល់ពីរបៀបដែលពន្លឺ និងជីវិតនៃព្រះយេស៊ូវគ្រីស្ទនាំមកនូវក្តីសង្ឃឹមថា ៖
ពន្លឺរបស់ព្រះគឺមានពិតមែន ។ ពន្លឺនេះមានសម្រាប់យើងទាំងអស់គ្នា ! ពន្លឺនេះផ្តល់ជីវិតដល់អ្វីៗទាំងអស់ [ សូមមើល គោលលទ្ធិ និងសេចក្តីសញ្ញា ៨៨:១១–១៣ ] ។ វាមានអំណាចដើម្បីបង្អន់ទ្រនិចឈឺចុកចាប់នៃដំបៅដ៏ជ្រៅ ។ វាអាចជាប្រេងលាបព្យាបាលរបួសដល់ភាពឯកោ និងជំងឺនៃដួងចិត្តរបស់យើង ។ នៅក្នុងស្នាមនៃការឈឺចាប់ វាអាចបណ្ដុះពូជនៃសេចក្ដីសង្ឃឹមដ៏ភ្លឺស្វាងមួយ ។ ( « ឌៀថើរ អេហ្វ អុជដូហ្វ « The Hope of God’s Light » Liahona ខែ ឧសភា ឆ្នាំ ២០១៣ ទំព័រ ៧៥ )
ចេញពីសេចក្តីយោងដល់បទគម្ពីរទាំងឡាយ យើងអានថា « នៅក្នុងភាសាប្រចាំថ្ងៃ ពាក្យ [ សង្ឃឹម ] ជាញឹកញាប់មានតម្រុយនៃភាពមិនច្បាស់លាស់ ។ ឧទាហរណ៍ យើងប្រហែលជានិយាយថា យើងសង្ឃឹមថាអាកាសធាតុនឹងផ្លាស់ប្តូរ ឬថាមិត្តភក្ដិម្នាក់នឹងមកសួរសុខទុក្ខ ។ ទោះជាយ៉ាងណាក៏ដោយ នៅក្នុងភាសាដំណឹងល្អ ពាក្យថា សេចក្ដីសង្ឃឹម មានភាពប្រាកដប្រជា មិនរេរា និងមានភាពសកម្ម ។ ព្យាការីទាំងឡាយមានប្រសាសន៍ពីការមាន ‹ សេចក្ដីសង្ឃឹមយ៉ាងមាំមួន › ( អាលម៉ា ៣៤:៤១ ) និង ‹ សេចក្ដីសង្ឃឹមដ៏រស់ › ( ពេត្រុស ទី១ ១:៣ ) » ( សេចក្តីណែនាំដល់បទគម្ពីរទាំងឡាយ « សង្ឃឹម, សេចក្ដីសង្ឃឹម » នៅលើគេហទំព័រ scriptures.ChurchofJesusChrist.org ) ។
នៅពេលអ្នកគិតអំពីឧបសគ្គដែលអ្នកជួបប្រទះ សូមចាំថា ព្យាការីមរមនបានរស់នៅក្នុងថ្ងៃមួយដែលភាពងងឹតខាងវិញ្ញាណគ្របដណ្ដប់លើជីវិតរបស់សាសន៍នីហ្វៃ ( សូមមើល មរមន ១–៦ ) ។ ក្នុងអំឡុងពេលដ៏លំបាកទាំងនេះ មរមនបានបង្រៀនពីរបៀបបង្កើនក្តីសង្ឃឹមរបស់យើង ។
សិក្សានៅក្នុងការរៀបចំសម្រាប់ថ្នាក់
សូមអាន មរ៉ូណៃ ៧:៤០–៤២ ហើយរកមើលទំនាក់ទំនងរវាងសេចក្តីជំនឿ សង្ឃឹម និងដង្វាយធួននៃព្រះយេស៊ូវគ្រីស្ទ ។
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានបង្រៀន ៖
សូមទុកចិត្ត និង មានជំនឿចិត្តលើព្រះគ្រីស្ទ ហើយត្រៀមខ្លួនពឹងផ្អែកលើគុណបុណ្យ សេចក្តីមេត្តាករុណ និង ព្រះគុណដែលដឹកនាំទៅរកសេចក្តីសង្ឃឹម តាមរយៈដង្វាយធួនរបស់ទ្រង់នៅក្នុងដំណើររស់ឡើងវិញ និង ជីវិតដ៏នៅអស់កល្បជានិច្ច ( សូមមើល មរ៉ូណៃ ៧:៤១ ) ។ សេចក្តីជំនឿ និង សេចក្តីសង្ឃឹមបែបនោះ អញ្ជើញភាពសុខសាន្តដ៏ផ្អែមល្ហែមនៃសតិសម្បជញ្ញៈមកក្នុងជីវិតយើង ដែលយើងគ្រប់គ្នាអន្ទះសារចង់បាន ។ ( « Therefore They Hushed Their Fears » Liahona ខែ ឧសភា ឆ្នាំ ២០១៥ ទំព័រ ៤៧ )
ដូចជាមរមន ព្យាការីអេធើរក៏បានរស់នៅក្នុងពេលដ៏លំបាកមួយដែរ ( សូមមើល អេធើរ ១១ ) ។ ហើយអេធើរក៏ដូចជាមរមនដែរបានបង្រៀនថា សូម្បីតែក្នុងគ្រាដ៏លំបាកបំផុតក្ដី យើងអាចនៅតែរកឃើញសេចក្ដីសង្ឃឹមលើព្រះយេស៊ូវគ្រីស្ទ ។
សិក្សានៅក្នុងការរៀបចំសម្រាប់ថ្នាក់
សូមអាន អេធើរ ១២:៤ ហើយរកមើលថាតើសេចក្ដីសង្ឃឹមលើព្រះគ្រីស្ទអាចមានឥទ្ធិពលយ៉ាងណាទៅលើជីវិតប្រចាំថ្ងៃរបស់យើង ។
ដើម្បីរៀនបន្ថែមទៀតអំពីអានុភាពនៃក្តីសង្ឃឹម សូមអានសេចក្ដីថ្លែងការណ៍ដូចខាងក្រោម ដោយប្រធាន អុជដូហ្វ ឬមើល « The Power of Hope » ( ២:១១ ) ៖
សេចក្តីសង្ឃឹមគឺជាអំណោយទាននៃព្រះវិញ្ញាណ [ សូមមើល មរ៉ូណៃ ៨:២៦ ] ។ …
[ វាគឺជា ] ការមានទំនុកចិត្តជានិច្ចថា ព្រះអម្ចាស់នឹងបំពេញតាមការសន្យារបស់ទ្រង់ចំពោះយើង ។ វាគឺជាទំនុកចិត្តថា បើយើងរស់នៅតាមច្បាប់របស់ព្រះ និងតាមពាក្យសម្ដីនៃពួកព្យាការីទ្រង់សព្វថ្ងៃនេះ នោះយើងនឹងទទួលបាននូវពរជ័យដែលគួរឲ្យប្រាថ្នានៅក្នុងពេលអនាគត ។ វាគឺជាការជឿ និងការរំពឹងទុកថា ការអធិស្ឋានរបស់យើងនឹងត្រូវឆ្លើយតប ។ វាបង្ហាញឲ្យឃើញដោយទំនុកចិត្ត សុទិដ្ឋិនិយម ភាពរីករាយ និងការតស៊ូអត់ធ្មត់ ។ …
មិនថាជំពូកជីវិតរបស់យើងមើលទៅក្រៀមក្រោះយ៉ាងណានៅសព្វថ្ងៃនេះ ដោយសារជីវិត និងការពលិកម្មរបស់ព្រះយេស៊ូវគ្រីស្ទ នោះយើងអាចមានសង្ឃឹម និងប្រាកដថាទីបញ្ចប់នៃសៀវភៅជីវិតរបស់យើងនឹងលើសពីការរំពឹងទុកដ៏ធំបំផុតរបស់យើង ។ ( « The Infinite Power of Hope » Liahona ខែ វិច្ឆិកា ឆ្នាំ ២០០៨ ទំព័រ ២១, ២២ )
សិក្សានៅក្នុងការរៀបចំសម្រាប់ថ្នាក់
សូមអានដំណើររឿងក្នុងព្រះគម្ពីរមួយ ឬច្រើនដូចខាងក្រោម ឬជ្រើសរើសដំណើររឿងមួយរបស់អ្នកផ្ទាល់ ។ សូមរកមើលភស្តុតាងដែលថាសេចក្តីជំនឿលើព្រះអម្ចាស់អាចនាំយើងឲ្យមានក្តីសង្ឃឹម ។ សូមត្រៀមខ្លួនដើម្បីចែកចាយនូវអ្វីដែលអ្នកបានរៀនជាមួយថ្នាក់របស់អ្នក ។
-
សាដ្រាក់, មែសាក់ និង អ័បេឌ-នេកោ ៖ ដានីយ៉ែល ៣:១, ៦, ៨, ១២–១៤, ១៦–២០, ២៣–២៥
-
ស្រ្តីដែលមានបញ្ហាធ្លាក់ឈាម ៖ ម៉ាកុស ៥:២៥–៣៤
-
ស្រ្តីដែលលាងជើងឲ្យព្រះអង្គសង្រ្គោះ ៖ លូកា ៧:៣៦–៥០
-
អាន់តៃ-នីហ្វៃ-លីហៃ ៖ អាលម៉ា ២៣:៤–៧; ២៤:១–២៧
-
ពួកសាសន៍នីហ្វៃ និងលេមមិនដែលជឿបានរំពឹងទុកពីការប្រសូតរបស់ព្រះយេស៊ូវគ្រីស្ទ ៖ នីហ្វៃទី ៣ ១:៤–១៥
សញ្ជឹងគិតនៅក្នុងការរៀបចំសម្រាប់ថ្នាក់
តើអ្នកបានរៀនអ្វីខ្លះអំពីសេចក្តីសង្ឃឹមចេញពីវគ្គបទគម្ពីរនេះ ឬសារលិខិតដែលអ្នកបានសិក្សា ? កាលអ្នកស្វែងរកអំណោយទានខាងវិញ្ញាណនៃក្តីសង្ឃឹម តើអ្នកអាចធ្វើអ្វីខ្លះ ដើម្បីអញ្ជើញអំណោយនេះមកក្នុងជីវិតរបស់អ្នក ?