មេរៀនទី ១២ ឯកសារគ្រូបង្រៀន ៖ ការស្វែងរកសេចក្តីពិតដ៏បរិសុទ្ធនៅក្នុងការបង្រៀនរបស់ព្រះយេស៊ូវគ្រីស្ទ

« មេរៀនទី ១២ ឯកសារគ្រូបង្រៀន ៖ ការស្វែងរកសេចក្តីពិតដ៏បរិសុទ្ធនៅក្នុងការបង្រៀនរបស់ព្រះយេស៊ូវគ្រីស្ទ » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់ ( ឆ្នាំ ២០២៣ )

« មេរៀនទី ១២ ឯកសារគ្រូបង្រៀន » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់

មេរៀនទី ១២ ឯកសារគ្រូបង្រៀន

ការស្វែងរកសេចក្តីពិតដ៏បរិសុទ្ធនៅក្នុងការបង្រៀនរបស់ព្រះយេស៊ូវគ្រីស្ទ

ប្រធាន រ័សុល អិម ណិលសុន បានមានប្រសាសន៍ ៖ « គោលលទ្ធិនៃព្រះគ្រីស្ទដ៏បរិសុទ្ធគឺមានអានុភាពណាស់ ។ វាផ្លាស់ប្តូរជីវិតមនុស្សគ្រប់គ្នាដែលយល់ពីគោលលទ្ធិនេះ ហើយស្វែងរកដើម្បីអនុវត្តតាមគោលលទ្ធិនេះនៅក្នុងជីវិតរបស់ពួកគេ » ( « Pure Truth, Pure Doctrine, and Pure Revelation » Liahona ខែ វិច្ឆិកា ឆ្នាំ ២០២១ ទំព័រ ៦ ) ។ នៅក្នុងមេរៀននេះ សិស្សនឹងមានឱកាសចែកចាយ ពីរបៀបដែលជីវិតរបស់ពួកគេបានទទួលឥទ្ធិពលដោយការបង្រៀនរបស់ព្រះយេស៊ូវគ្រីស្ទ ។ ពួកគេក៏នឹងពិភាក្សាអំពីអត្ថន័យនៃដំណឹងល្អ ហើយអញ្ជើញឲ្យពិចារណាអំពីអ្វីដែលពួកគេអាចធ្វើបាន ដើម្បីកាន់តែផ្តោតលើការរស់នៅតាមដំណឹងល្អ ។

យោបល់សម្រាប់ការបង្រៀន

ព្រះយេស៊ូវគ្រីស្ទបង្រៀនសេចក្តីពិតដែលផ្លាស់ប្តូរជីវិត ។

អ្នកអាចបង្ហាញរូបភាពដែលអមមកជាមួយ ឬរូបភាពផ្សេងទៀត ដែលអ្នកជ្រើសរើសចេញពីការបង្រៀនរបស់ព្រះយេស៊ូវគ្រីស្ទ ហើយអញ្ជើញសិស្សឲ្យចែកចាយពីហេតុផលដែលអាចមាន ថាហេតុអ្វី « [ ព្រះយេស៊ូវគ្រីស្ទគឺជា ] គ្រូបង្រៀនដ៏អស្ចារ្យបំផុតដែលមិនធ្លាប់មាន ឬមិនធ្លាប់រស់នៅ » ( ជែហ្វ្រី អ័រ ហូឡិន « Teaching, Preaching, Healing » Ensign ខែ មករា ឆ្នាំ ២០០៣ ទំព័រ ៣៣ ) ។

រូបភាព

ការបង្រៀនរបស់ព្រះអង្គសង្គ្រោះអំពីភាពជាសិស្ស ដោយចាស្ទីន ខូនស្ស

ដើម្បីលើកទឹកចិត្តឲ្យមានការពិភាក្សាប្រកបដោយអត្ថន័យ អ្នកអាចសួរសំណួរមួយចំនួនដូចខាងក្រោម ៖

តើការបង្រៀនរបស់ព្រះអង្គសង្គ្រោះមានឥទ្ធិពលអ្វីខ្លះទៅលើអ្នកដែលបានឮទ្រង់បង្រៀន ? ( អ្នកក៏អាចចង់រំឭកឧទាហរណ៍ដែលមាននៅក្នុង ផ្នែកទី ១ នៃឯកសាររៀបចំ នេះផងដែរ ) ។ តើការបង្រៀនរបស់ទ្រង់មានឥទ្ធិពលអ្វីខ្លះនៅក្នុងជីវិតរបស់អ្នក ?
តើយើងត្រូវធ្វើអ្វីខ្លះ ប្រសិនបើយើងចង់ឲ្យការបង្រៀនរបស់ព្រះយេស៊ូវគ្រីស្ទមានឥទ្ធិពលយ៉ាងជ្រាលជ្រៅ និងស្ថិតស្ថេរនៅក្នុងជីវិតរបស់យើង ? ( អ្នកអាចមើល យ៉ូហាន ៣:២១; ៧:១៧; ១៣:១៧ និង សេចក្តីថ្លែងការណ៍ដោយអែលឌើរ ហូឡិន នៅក្នុងផ្នែកទី ១ នៃឯកសាររៀបចំនេះ ។ បន្ទាប់មកអ្នកអាចអញ្ជើញសិស្សឲ្យស្វែងរកគោលការណ៍មួយដែលស្រដៀងគ្នាដូចខាងក្រោមនេះ ៖ កាលដែលយើងធ្វើតាមការបង្រៀនរបស់ព្រះអម្ចាស់ យើងអាចដឹងពីភាពពេញលេញរបស់សេចក្តីពិតនោះ កាន់តែមានពន្លឺ និងដកពិសោធន៍សុភមង្គល ) ។

សូមរំឭកសិស្សថានៅក្នុង ផ្នែកទី ១ នៃឯកសាររៀបចំនេះ ពួកគេត្រូវបានអញ្ជើញឲ្យជ្រើសរើសការបង្រៀនរបស់ព្រះអង្គសង្រ្គោះដែលបានជះឥទ្ធិពលនៅក្នុងជីវិតរបស់ពួកគេ ។ ពួកគេក៏អាចរកមើលការបង្រៀនដែលពួកគេគិតថាអាចទាក់ទងនឹងជីវិតរបស់ពួកគេផងដែរ ។ សូមផ្ដល់ពេលពីរបីនាទីឲ្យសិស្សរំឭកបទគម្ពីររបស់ពួកគេ ហើយនឹង សំណួរដែលទាក់ទងចំនួនបី នៅក្នុងផ្នែកទី ១ នៃឯកសាររៀបចំនេះ ។ សូមលើកទឹកចិត្តសិស្សដែលមិនទាន់បានធ្វើសកម្មភាពនៅឡើយ ឲ្យស្វែងរកការបង្រៀនរបស់ព្រះអង្គសង្គ្រោះដែលពួកគេអាចចែកចាយ ។

សូមអញ្ជើញសិស្សឲ្យចែកចាយការបង្រៀនរបស់ព្រះយេស៊ូវគ្រីស្ទដែលពួកគេបានជ្រើសរើស និងចម្លើយរបស់ពួកគេចំពោះសំណួរយ៉ាងហោចណាស់មួយក្នុងចំណោមសំណួរទាំងបីពីឯកសាររៀបចំនេះ ។ អ្នកអាចធ្វើសកម្មភាពនេះជាថ្នាក់ ឬបែងចែកសិស្សជាក្រុមតូចៗ ហើយស្នើសុំឲ្យពួកគេប្ដូរវេនគ្នាចែកចាយ ។

ព្រះយេស៊ូវគ្រីស្ទបង្រៀនពួកសាសន៍នីហ្វៃពីអត្ថន័យនៃដំណឹងល្អរបស់ទ្រង់ ។

សូមអានសាច់រឿងខាងក្រោមជាមួយគ្នា ។

អាមីលៀបានត្រឡប់មកសកម្មភាពនៅសាសនាចក្រវិញថ្មីៗនេះ បន្ទាប់ពីបានឃ្លាតឆ្ងាយអស់ជាច្រើនឆ្នាំមក ។ ខណៈដែលមនុស្សមានចិត្តល្អចំពោះនាង ជារឿយៗនាងមានអារម្មណ៍វង្វេង និងបាក់ទឹកចិត្តក្នុងអំឡុងពេលសុន្ទរកថា និងមេរៀន ។ ដោយការខកចិត្ត ថ្ងៃមួយនាងនិយាយទៅកាន់អ្នកថា « នៅថ្ងៃមួយ ខ្ញុំបានឮគេនិយាយថា ដំណឹងល្អមានន័យថា ‹ សេចក្តីដែលដឹងថាល្អ › ។ វាប្រាកដណាស់ថាខ្ញុំមិនមានអារម្មណ៍បែបហ្នឹងទេ ។ ដំណឹងល្អហាក់ដូចជាពិបាកយល់ណាស់ ហើយក៏មានការរំពឹងទុកជាច្រើនដែរ ។ វាមានអារម្មណ៍ថាជាបន្ទុកជាជាងពរជ័យ » ។

តើមានអ្វីអាចកើតឡើងក្នុងអំឡុងពេលនៃសុន្ទរកថា មេរៀន ឬការពិភាក្សាអំពីដំណឹងល្អដែលអាចធ្វើឲ្យនរណាម្នាក់មានអារម្មណ៍ដូចអាមីលៀ ?
តើអាមីលៀអាចយល់ខុសអ្វីខ្លះអំពីអត្ថន័យ និងគោលបំណងនៃដំណឹងល្អនេះ ?

ការអភិវឌ្ឍការបង្រៀន និងការរៀនសូត្ររបស់យើង

រៀនជាមួយសិស្ស ។ បន្ទាប់ពីការឆ្លងកាត់ផលអាក្រក់នៃបព្វជិត នោះសមាជិកសាសនាចក្រក្នុងជំនាន់របស់អាលម៉ា ដែលនៅតែស្មោះត្រង់គឺ « ឈរយ៉ាងខ្ជាប់ខ្ជួន » ( អាលម៉ា ១:២៥ ) នៅក្នុងសេចក្តីជំនឿ និងដឹងថា « ពួកសង្ឃមិនរាប់ថាខ្លួនខ្ពស់ជាងពួកអ្នកស្ដាប់ឡើយ ដ្បិតអ្នកផ្សាយសាសនាមិនប្រសើរជាងអ្នកស្ដាប់ទេ ឯគ្រូបង្រៀនក៏មិនប្រសើរជាងអ្នករៀនដែរ ម្ល៉ោះហើយ ពួកគេស្មើគ្នាទាំងអស់ » ( អាលម៉ា ១:២៦ ) ។ នៅពេលអ្នកចាត់ទុកសិស្សស្មើនឹងអ្នក នោះអ្នកនឹងបើកចិត្តជាងមុនដើម្បីរៀនជាមួយពួកគេ និងរៀនពីពួកគេ ។ សូមសញ្ជឹងគិតពីរបៀបដែលសិស្សរបស់អ្នកអាចមានអារម្មណ៍ នៅពេលអ្នកបង្ហាញចំណាប់អារម្មណ៍ពិតប្រាកដចំពោះអ្វីដែលពួកគេគិត និងមានអារម្មណ៍ ។

សូមអញ្ជើញសិស្សឲ្យរំឭក នីហ្វៃទី ៣ ២៧:១៣–១៤, ១៩–២១ ហើយរកមើលធាតុសំខាន់ៗនៃដំណឹងល្អដូចដែលបានបង្រៀនដោយព្រះអង្គសង្រ្គោះ ។

ដើម្បីជំរុញឲ្យមានការពិភាក្សាប្រកបដោយអត្ថន័យ បន្ទាប់មកអ្នកអាចសួរសំណួរស្រដៀងនឹងសំណួរដូចខាងក្រោម ៖

យោងតាមព្រះអង្គសង្គ្រោះ តើអ្វីជាធាតុគ្រឹះ និងពរជ័យដ៏ធំនៃការរស់នៅតាមដំណឹងល្អរបស់ទ្រង់ ? ( សូមជួយសិស្សស្វែងរកសេចក្តីពិតដូចខាងក្រោម ៖ នៅពេលយើងអនុវត្តសេចក្តីជំនឿលើព្រះយេស៊ូវគ្រីស្ទ ប្រែចិត្ត ទទួលបុណ្យជ្រមុជទឹក ទទួលព្រះវិញ្ញាណបរិសុទ្ធ ហើយស៊ូទ្រាំដល់ចុងបំផុត នោះយើងអាចឈរដោយស្អាតស្អំនៅចំពោះព្រះនៅថ្ងៃចុងក្រោយ ) ។
តើការដាក់ព្រះយេស៊ូវគ្រីស្ទនៅចំណុចសំខាន់នៃដំណឹងល្អ អាចផ្លាស់ប្តូររបៀបដែលអាមីលៀមានទស្សនៈ និងអារម្មណ៍អំពីដំណឹងល្អដោយរបៀបណា ? តើការផ្ដោតលើព្រះអង្គសង្គ្រោះមានឥទ្ធិពលលើរបៀបដែលអ្នកគិត និងរស់នៅតាមដំណឹងល្អយ៉ាងដូចម្ដេច ?
តើបញ្ហាអ្វីខ្លះដែលយើងអាចជួបប្រទះ នៅពេលយើងបាត់បង់ការផ្តោតលើព្រះយេស៊ូវគ្រីស្ទ និងធាតុសំខាន់នៃដំណឹងល្អរបស់ទ្រង់ ? ( អ្នកអាចចង់ពិនិត្យឡើងវិញ សេចក្ដីថ្លែងការណ៍ដោយបងប្រុសដានីយ៉ែល ខេ ជឺដ នៅក្នុងផ្នែកទី ២ នៃឯកសាររៀបចំនេះ ) ។ តើមានរឿងអ្វីខ្លះ ដែលបណ្តាលឲ្យអ្នកបាត់បង់ការផ្តោតលើមូលដ្ឋានគ្រឹះនៃដំណឹងល្អ ? តើអ្វីដែលបានជួយអ្នកច្រើនបំផុតឲ្យផ្ដោតលើមូលដ្ឋានគ្រឹះនោះ ?

សូមអញ្ជើញសិស្សឲ្យមើល សេចក្តីថ្លែងការណ៍ដោយប្រធានឌៀរថើរ អេហ្វ អុជដូហ្វ នៅក្នុងផ្នែកទី ២ នៃឯកសាររៀបចំនេះ និងកត់ត្រាអ្វីដែលពួកគេអាចធ្វើដើម្បីផ្តោតអារម្មណ៍ប្រសើរជាងអំពីគោលការណ៍គ្រឹះ និងការអនុវត្តតាមដំណឹងល្អនេះ ។

អ្នកក៏អាចសួរក្រែងសិស្សខ្លះនឹងមានឆន្ទៈក្នុងការចែកចាយអ្វីដែលពួកគេអាចនឹងធ្វើដើម្បីផ្ដោតលើអ្វីដែលសំខាន់បំផុត នៅពេលពួកគេខិតខំរស់នៅតាមដំណឹងល្អ ។

ដើម្បីបញ្ចប់ អ្នក ឬសិស្សអាចថ្លែងទីបន្ទាល់អំពីភាពស្រស់ស្អាត និងអានុភាពនៃការរស់នៅតាមដំណឹងល្អដ៏អស់កល្បអស់កាលជានិច្ចរបស់ព្រះយេស៊ូវគ្រីស្ទ ។

សម្រាប់ពេលក្រោយ

សូមពិចារណាការផ្ញើសារដូចខាងក្រោមទៅកាន់សិស្សនៅអំឡុងសប្តាហ៍ ៖ សូមមើល « Be a Minister: Become Part of Someone’s Life » ( ០:៣៤ ) និងគិតអំពីអ្វីដែលអ្នកអាចរៀនអំពីការងារបម្រើចេញពី ឯកសាររៀបចំសម្រាប់មេរៀនទី ១៣ ។