« មេរៀនទី ២ ឯកសាររៀបចំសម្រាប់ថ្នាក់ ៖ ការពង្រឹងទីបន្ទាល់របស់យើងអំពីព្រះគ្រីស្ទដ៏មានព្រះជន្មរស់ » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់ ( ឆ្នាំ ២០២៣ )
« មេរៀនទី ២ ឯកសាររៀបចំសម្រាប់ថ្នាក់ » ឯកសារគ្រូបង្រៀនអំពីព្រះយេស៊ូវគ្រីស្ទ និងដំណឹងល្អដ៏អស់កល្បអស់កាលជានិច្ចរបស់ទ្រង់
មេរៀនទី ២ ឯកសាររៀបចំសម្រាប់ថ្នាក់
ការពង្រឹងទីបន្ទាល់របស់យើងអំពីព្រះគ្រីស្ទដ៏មានព្រះជន្មរស់
សូមគិតស្រមៃអំពីទុក្ខព្រួយ និងការឈឺចាប់ដែលអ្នកដើរតាមព្រះយេស៊ូវគ្រីស្ទបានមាន នៅពេលពួកគេឃើញទ្រង់រងទុក្ខ ហើយសុគតនៅលើឈើឆ្កាង ។ ដោយមិនយល់ពីបេសកកម្មរបស់ទ្រង់ឲ្យបានពេញលេញ ពួកគេហាក់ដូចជាមានអារម្មណ៍ច្របូកច្របល់ និងឯកោ នៅពេលពួកគេដាក់ព្រះសពទ្រង់ក្នុងផ្នូរ ។ អ្នកអាចគិតស្រមៃអំពីសេចក្តីអំណរ និងការភ្ញាក់ផ្អើលរបស់ពួកគេ នៅពេលពួកគេបានឃើញទ្រង់មានព្រះជន្មរស់ឡើងវិញប៉ុន្មានថ្ងៃក្រោយមក ។ ឥឡូវនេះ ពួកគេអាចថ្លែងទីបន្ទាល់ថា ទ្រង់គឺជាព្រះគ្រីស្ទដ៏មានព្រះជន្មរស់ ! នៅពេលអ្នកសិក្សាឯកសារនេះ សូមគិតអំពីទីបន្ទាល់ផ្ទាល់ខ្លួនរបស់អ្នកអំពីព្រះគ្រីស្ទដ៏មានព្រះជន្មរស់ និងថាតើទ្រង់មានន័យយ៉ាងណាចំពោះអ្នក ។
ផ្នែកទី ១
តើអ្វីដែលសំខាន់អំពីការនិយាយថា « ព្រះយេស៊ូវគឺជាព្រះគ្រីស្ទ » ?
នៅពេលចាប់ផ្ដើមការបម្រើក្នុងជីវិតលើផែនដីរបស់ទ្រង់ សិស្សពីរនាក់របស់យ៉ូហាន បាទីស្ទបានឮយ៉ូហាននិយាយអំពីព្រះយេស៊ូវថា « នុះន៍ កូនចៀមនៃព្រះ ! » ( យ៉ូហាន ១:៣៦ ) ។ នៅពេលពួកគេបានឮដូច្នេះ ពួកគេក៏ដើរតាមព្រះយេស៊ូវទៅ ។ អនទ្រេជាម្នាក់ក្នុងចំណោមពួកគេបានរកបងប្រុសរបស់គាត់ ស៊ីម៉ូន-ពេត្រុស ហើយប្រកាសថា « យើងបានឃើញ … ព្រះគ្រីស្ទហើយ » (យ៉ូហាន ១:៤១). ។
ការប្រកាសរបស់អនទ្រេថាព្រះយេស៊ូវគឺជាព្រះគ្រីស្ទគឺសំខាន់ណាស់ ។ ពាក្យក្រិកសម្រាប់ ព្រះគ្រីស្ទ មានន័យថា « បានចាក់ប្រេងតាំង » ហើយស្មើនឹងពាក្យហេព្រើរសម្រាប់ ព្រះមែស៊ី ។ « ដោយប្រើជាងារនៃតំណែងមួយ [ព្រះគ្រីស្ទ ឬ ព្រះមែស៊ី] តំណាងឲ្យស្ដេច និងអ្នករំដោះ ដែលពួកសាសន៍យូដាទន្ទឹងចាំយ៉ាងអន្ទះអន្ទែងឲ្យយាងមក » ( Bible Dictionary « Messiah » ) ។
ក្រោយមកក្នុងការងារបម្រើរបស់ទ្រង់ ព្រះយេស៊ូវបានសួរពួកសិស្សរបស់ទ្រង់ថា តើបណ្តាជនគិតថាទ្រង់ជានរណា ។ ពួកគេបានឆ្លើយតបនូវឈ្មោះព្យាការីមួយចំនួន ។ បន្ទាប់មកព្រះយេស៊ូវ បានមានបន្ទូលសួរថា « ចុះឯអ្នករាល់គ្នាវិញ តើថាខ្ញុំជាអ្នកណា ? » ( ម៉ាថាយ ១៦:១៥ ) ។
សិក្សានៅក្នុងការរៀបចំសម្រាប់ថ្នាក់
សូមអាន ម៉ាថាយ ១៦:១៦–១៧ ឬមើល « Thou Art the Christ » ចាប់តាំងពីដើមរហូតដល់កូដម៉ោង ០:៥២ ដើម្បីរៀនអំពីចម្លើយរបស់ពេត្រុសចំពោះសំណួររបស់ព្រះអម្ចាស់ ។
ក្នុងនាមជាព្រះគ្រីស្ទ ព្រះយេស៊ូវត្រូវបាន « ចាក់ប្រេងតាំងពីព្រះវរបិតាឲ្យធ្វើជាតំណាងផ្ទាល់ខ្លួនរបស់ទ្រង់ក្នុងគ្រប់ការណ៍ទាំងអស់ដែលទាក់ទងនឹងសេចក្ដីសង្គ្រោះនៃមនុស្សលោក » ( Bible Dictionary « Anointed One » ) ។ ដោយសារព្រះយេស៊ូវគឺជាព្រះគ្រីស្ទ នោះទ្រង់គឺជាផ្លូវតែមួយគត់ ហើយទ្រង់គឺជាព្រះនាមតែមួយគត់ ដែលយើងអាចត្រូវបានរំដោះចេញពីលទ្ធផលនៃអំពើបាប និងសេចក្តីស្លាប់ ( សូមមើល កិច្ចការ ៤:១២; ម៉ូសាយ ៣:១៧ ) ។
កត់ត្រាគំនិតរបស់អ្នក
សូមចំណាយពេលពីរបីនាទីដើម្បីអានចំណងជើង « ព្រះយេស៊ូវគ្រីស្ទ » នៅក្នុង Topical Guide ឬ សេចក្ដីណែនាំដល់បទគម្ពីរទាំងឡាយ ( ដែលមាននៅលើគេហទំព័រ ChurchofJesusChrist.org ) ហើយសូមរកមើលព្រះនាម ព្រះបរមងារ និងតួនាទីផ្សេងៗដែលបានផ្តល់ដល់ព្រះយេស៊ូវគ្រីស្ទ ។ សូមកត់ត្រាការយល់ដឹងរបស់អ្នក ហើយត្រៀមខ្លួនដើម្បីចែកចាយវាជាមួយថ្នាក់របស់អ្នក ។
អ្នកអាចអាន ឬស្ដាប់បទ « This Is the Christ » ជាចម្រៀងដែលបាននិពន្ធឡើងដោយប្រធាន ជែមស៍ អ៊ី ហ្វោស្ត ដែលលោកបានបម្រើនៅក្នុងគណៈប្រធានទីមួយ ។ សូមពិចារណាអំពីអ្វីដែលអ្នកអាចចែកចាយនៅក្នុងថ្នាក់អំពីអ្វីដែលអ្នកបានគិត និងមានអារម្មណ៍អំពីបទចម្រៀង ។
« This Is the Christ » ដោយជែមស៍ អ៊ី ហ្វោស្ត, ជេន ភីងបូរ៉ាស និងម៉ៃខល ហ្វីនលីនសិន មូឌី ច្រៀងដោយក្រុមចម្រៀងរោងឧបោសថ នៅឯវិសាលដ្ឋាននៃព្រះវិហារបរិសុទ្ធ អំឡុងសន្និសីទទូទៅ ខែ តុលា ឆ្នាំ ២០១៨
ផ្នែកទី ២
តើសាវករបស់ព្រះអម្ចាស់អាចមានឥទ្ធិពលលើទីបន្ទាល់របស់ខ្ញុំថា ព្រះយេស៊ូវគឺជាព្រះគ្រីស្ទដោយរបៀបណា ?
នៅក្នុងផ្នែកជាច្រើននៃពិភពលោក ជំនឿលើទេវភាពរបស់ព្រះយេស៊ូវគ្រីស្ទកំពុងធ្លាក់ចុះ ( សូមមើលអែលឌើរ នែល អិល អាន់ឌើរសិន « We Talk of Christ » Liahona ខែ វិច្ឆិកា ឆ្នាំ ២០២០ ទំព័រ ៨៨ ) ។ ប្រហែលជាអ្នកបានឃើញការចុះខ្សោយនៃសេចក្ដីជំនឿនៅកន្លែងដែលអ្នករស់នៅ បានឃើញមនុស្សណាម្នាក់ដែលអ្នកស្រឡាញ់ដើរចេញពីព្រះអង្គសង្គ្រោះនិងសាសនាចក្ររបស់ទ្រង់ ឬបានជួបប្រទះសង្គ្រាមនៃការឥតជំនឿរបស់អ្នកផ្ទាល់ ។
ការខ្វះជំនឿលើព្រះយេស៊ូវគ្រីស្ទគឺមិនមែនជាការចម្លែកសម្រាប់សម័យយើងនោះទេ ។ ឧទាហរណ៍ ៖ សូម្បីតែបន្ទាប់ពីពួកសាសន៍លេមិន និងសាសន៍នីហ្វៃបានឃើញ « ទីសម្គាល់ និងការអស្ចារ្យ » នៃការប្រសូតរបស់ព្រះអង្គសង្គ្រោះ ភ្លាមៗនោះ ប្រជាជនបានក្លាយទៅជា « មានសេចក្ដីអស្ចារ្យកាន់តែតិចទៅៗ … ហើយបានចាប់ផ្ដើមមិនជឿអ្វីៗទាំងអស់ ដែលពួកគេបានឃើញហើយបានឮ » ( នីហ្វៃទី ៣ ២:១ ) ។
ដើម្បីជួយយើងម្នាក់ៗឲ្យមានសេចក្ដីជំនឿលើទ្រង់ ព្រះអម្ចាស់បានត្រាស់ហៅសាវកឲ្យធ្វើជាសាក្សីពិសេសអំពីទ្រង់ដល់មនុស្សទាំងអស់ ( សូមមើល ម៉ាថាយ ២៨:១៩–២០; នីហ្វៃទី ៣ ១២:១; គោលលទ្ធិ និងសេចក្តីសញ្ញា ១០៧:២៣ ) ។
ប្រធាន ហ្គរដុន ប៊ី. ហ៊ិងគ្លី បានបង្រៀន ៖
ការហៅរបស់ពួកលោក គឺជាការហៅដ៏ពិសេសមួយ ។ ពួកលោកគឺជាសាវករបស់ព្រះអម្ចាស់យេស៊ូវគ្រីស្ទ ដែលទ្រង់បានជ្រើសរើស និងប្រទានសិទ្ធិអំណាចឲ្យ ។ ពួកលោកត្រូវបានបញ្ជាឲ្យធ្វើជាសាក្សីអំពីការពិតនៃការមានព្រះជន្មរបស់ទ្រង់ ដោយអំណាច និងសិទ្ធិអំណាចនៃភាពជាសាវកដ៏បរិសុទ្ធ ។ ( « Special Witnesses of Christ » Ensign ខែ មេសា ឆ្នាំ ២០០១ ទំព័រ ៤ )
សញ្ជឹងគិតនៅក្នុងការរៀបចំសម្រាប់ថ្នាក់
សូមគិតត្រឡប់ទៅគ្រាដែលអ្នកបានឮសាវករបស់ព្រះអម្ចាស់ចែកចាយទីបន្ទាល់របស់ពួកលោកអំពីព្រះអង្គសង្គ្រោះ ។ តើទីបន្ទាល់របស់ពួកលោកបានមានឥទ្ធិពលលើទីបន្ទាល់ផ្ទាល់ខ្លួនរបស់អ្នកអំពីទ្រង់យ៉ាងដូចម្ដេច ? អ្នកអាចមើលទីបន្ទាល់មួយ ឬច្រើនរបស់សាវករបស់ព្រះអម្ចាស់ដែលមានជីវិតរស់នៅពីស៊េរីវីដេអូ « Special Witnesses of Christ » ( ដែលមាននៅលើគេហទំព័រ ChurchofJesusChrist.org ) ។
ផ្នែកទី ៣
តើជីវិតរបស់ខ្ញុំអាចផ្លាស់ប្តូរដោយសារការសិក្សា « ព្រះគ្រីស្ទដ៏មានព្រះជន្មរស់»ដោយរបៀបណា ?
នៅថ្ងៃទី ១ ខែ មករា ឆ្នាំ ២០០០ គណៈប្រធានទីមួយ និងកូរ៉ុមនៃពួកសាវកដប់ពីរនាក់បានបោះពុម្ពផ្សាយទីបន្ទាល់របស់ពួកលោកអំពីព្រះអង្គសង្គ្រោះនៅក្នុងឯកសារមួយដែលមានចំណងជើងថា « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ( ដែលមាននៅលើគេហទំព័រ ChurchofJesusChrist.org ) ។
អែលឌើ រ៉ូបឺត ឌី ហែល ក្នុងកូរ៉ុមនៃពួកសាវកដប់ពីរនាក់បានមានប្រសាសន៍អំពីឯកសារប្រវត្តិសាស្ត្រនេះថា ៖
« ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » ត្រូវបានរៀបចំជាមុនសម្រាប់ពេលដែលយើងត្រូវការបំផុត ។ ( « General Conference: Strengthening Faith and Testimony » Liahona ខែ វិច្ឆិកា ឆ្នាំ ២០១៣ ទំព័រ ៧ )
ប្រធាន រ័សុលអិម ណិលសុន បានសង្កេតឃើញផងដែរថា ៖
សមាជិកជាច្រើនបានទន្ទេញសេចក្ដីពិតនោះ ។ អ្នកខ្លះទៀតសឹងតែមិនដែលឮពីវា ។ នៅពេលអ្នកព្យាយាមរៀនបន្ថែមទៀតអំពីព្រះយេស៊ូវគ្រីស្ទ ខ្ញុំជំរុញឲ្យបងប្អូនសិក្សា « ព្រះគ្រីស្ទដ៏មានព្រះជន្មរស់ » ។ ( « Drawing the Power of Jesus Christ into Our Lives » Liahona ខែ ឧសភា ឆ្នាំ ២០១៧ ទំព័រ ៤០ )
សិក្សានៅក្នុងការរៀបចំសម្រាប់ថ្នាក់
សូមអាន « ព្រះគ្រីស្ទដ៏មានព្រះជន្មរស់ » ដោយប្រុងប្រយ័ត្ន ហើយពិចារណាកត់សម្គាល់ផ្នែកដែលលេចធ្លោសម្រាប់អ្នក ។ សូមពិចារណាអំពីការអធិស្ឋាន មុនពេលអ្នកចាប់ផ្តើម ដើម្បីឲ្យព្រះវិញ្ញាណអាចជួយអ្នកទទួលអារម្មណ៍នៃសេចក្ដីពិត និងសារៈសំខាន់នៃអ្វីដែលអ្នកកំពុងសិក្សា ។
សូមធ្វើសកម្មភាព
ការទន្នេញចាំ « ព្រះគ្រីស្ទដ៏មានព្រះជន្មរស់ » អាចបំពេញតម្រូវការ នៃការវាយតម្លៃការរៀនសូត្រសម្រាប់វគ្គសិក្សានេះ ។ សូមពិចារណាអំពីការកំណត់គោលដៅមួយដើម្បីទន្ទេញទាំងអស់ ឬផ្នែកខ្លះនៃឯកសារនេះ នៅពេលអ្នកខិតខំពង្រឹងទីបន្ទាល់របស់អ្នកអំពីព្រះគ្រីស្ទដ៏មានព្រះជន្មរស់ ។