ព្រះគ្រីស្ទដ៏មានព្រះជន្មរស់
ទីបន្ទាល់នៃពួកសាវក
នៅពេលយើងប្រារព្ធពិធីរំឭកចំពោះថ្ងៃប្រសូតរបស់ព្រះយេស៊ូវគ្រីស្ទ កាលពីពីរសហសវត្សកន្លងទៅ នោះពួកយើងសូមថ្វាយទីបន្ទាល់របស់ពួកយើងអំពីតថភាពពិតនៃព្រះជន្មដ៏ឥតប្រៀបផ្ទឹមរបស់ទ្រង់ និងគុណធម៌ដ៏និរន្ដនៃពលិកម្មធួនដ៏មហិមារបស់ទ្រង់ ។ ពុំមាននរណា ដែលមានឥទ្ធិពលដ៏ខ្លាំងមហិមាមកលើមនុស្សដែលបានរស់នៅ ហើយដែលនឹងរស់នៅលើផែនដីនេះដូចជាទ្រង់ឡើយ ។
ទ្រង់គឺជាព្រះយេហូវ៉ាដ៏មហិមានៅក្នុងគម្ពីរសញ្ញាចាស់ ហើយជាព្រះមែស៊ីនៅក្នុងគម្ពីរសញ្ញាថ្មី ។ នៅក្រោមការដឹកនាំរបស់ព្រះវរបិតាទ្រង់ នោះទ្រង់គឺជាអង្គបង្កបង្កើតនៃផែនដី ។ « គ្រប់របស់ទាំងអស់បានកើតមកដោយសារទ្រង់ ហើយក្នុងបណ្ដារបស់ដែលបានកើតមកទាំងប៉ុន្មាន នោះគ្មានអ្វីណាមួយកើតមកក្រៅពីទ្រង់ឡើយ » ( យ៉ូហាន ១:៣ )។ ទោះជាទ្រង់គ្មានបាបក្ដី ក៏ទ្រង់បានទទួលបុណ្យជ្រមុជទឹកដើម្បីបំពេញនូវគ្រប់អស់ទាំងសេចក្ដីសុចរិតដែរ ។ ទ្រង់ « បានយាងចុះឡើងធ្វើការល្អ » ( កិច្ចការ ១០:៣៨ ) ប៉ុន្តែត្រូវគេស្អប់ទៅវិញ ។ ដំណឹងល្អរបស់ទ្រង់គឺជាសារនៃសេចក្ដីសុខសាន្ដ និងសុជនភាព ។ ទ្រង់បានទទូចអង្វរមនុស្សគ្រប់រូបឲ្យធ្វើតាមគំរូទ្រង់ ។ ទ្រង់បានយាងតាមផ្លូវស្រុកភីលីស្ទីន ព្យាបាលអ្នកឈឺ ប្រោសអ្នកខ្វាក់ឲ្យមើលឃើញ និងប្រោសមនុស្សស្លាប់ឲ្យរស់ឡើងវិញ ។ ទ្រង់បានបង្រៀនសេចក្ដីពិតនៃភាពអស់កល្បជានិច្ច តថភាពពិតនៃជីវិតមុនជីវិតនៅលើផែនដីរបស់យើង គោលបំណងនៃជីវិតរបស់យើងនៅលើផែនដី និងសក្ដានុពលសម្រាប់បុត្រាបុត្រីនៃព្រះនៅក្នុងបរលោកនាយ ។
ទ្រង់បានតាំងពិធីសាក្រាម៉ង់ឡើង ទុកជាការរំឭកចាំដល់ពលិកម្មធួនដ៏មហិមារបស់ទ្រង់ ។ ទ្រង់ត្រូវគេចាប់ព្រះកាយ ហើយចោទប្រកាន់ដោយមិនត្រឹមត្រូវ ត្រូវគេថ្កោលទោសដើម្បីបំពេញចិត្តមនុស្ស ហើយកាត់ទោសឲ្យសុគតនៅលើឈើឆ្កាងត្រង់ភ្នំកាល់វ៉ារី ។ ទ្រង់បានលះបង់ព្រះជន្មរបស់ទ្រង់ ដើម្បីធ្វើឲ្យធួននឹងអំពើបាបនៃមនុស្សលោក ។ ព្រះជន្មរបស់ទ្រង់គឺជាអំណោយដ៏មហិមាជំនួសឲ្យមនុស្សទាំងអស់ដែលធ្លាប់រស់នៅលើផែនដី ។
ពួកយើងសូមថ្លែងទីបន្ទាល់ជាឧឡារិកថា ព្រះជន្មទ្រង់មានសារៈសំខាន់បំផុតនៅក្នុងប្រវត្តិសាស្ត្រនៃមនុស្ស ដែលវាពុំបានចាប់ផ្ដើមតែនៅក្នុងភូមិបេថ្លេហិម ហើយបញ្ចប់នៅត្រង់ភ្នំកាល់វ៉ារីនោះទេ ។ ទ្រង់គឺជាបុត្រាច្បងនៃព្រះវរបិតា ជាព្រះរាជបុត្រាបង្កើតតែមួយនៅក្នុងសាច់ឈាម ជាព្រះប្រោសលោះនៃពិភពលោក ។
ទ្រង់បានក្រោកចេញពីផ្នូរដោយមានព្រះជន្មរស់ឡើងវិញ ដើម្បីក្លាយជា « ផលដំបូងពីពួកអ្នកដែលបានដេកលក់ទៅហើយ » ( កូរិនថូស ទី ១ ១៥:២០ ) ។ នៅពេលព្រះអម្ចាស់បានមានព្រះជន្មរស់ឡើងវិញ ទ្រង់បានយាងទៅជួបពួកអ្នកដែលទ្រង់ស្រឡាញ់ កាលពីទ្រង់ពុំទាន់សុគតនោះ ។ ទ្រង់ក៏បានផ្ដល់ការងារបម្រើនៅក្នុងចំណោម « ចៀមឯទៀត » របស់ទ្រង់ ( យ៉ូហាន ១០:១៦ ) នៅទ្វីបអាមេរិកពីជំនាន់បុរាណ ។ នៅក្នុងពិភពលោកនៃជំនាន់ថ្មី ទ្រង់ និងព្រះវរបិតាទ្រង់បានយាងមកជួបនឹងយុវជន យ៉ូសែប ស្ម៊ីធ ដើម្បីនាំមកនូវ « ការកាន់កាប់ត្រួតត្រាក្នុងកាលដែលពេលពេញកំណត់បានមកដល់ » ដូចដែលបានសន្យាទុកជាយូរមកហើយនោះ ( អេភេសូរ ១:១០ ) ។
ព្យាការីយ៉ូសែប បានសរសេរអំពីព្រះគ្រីស្ទដ៏មានព្រះជន្មរស់ថា ៖ « ព្រះនេត្ររបស់ទ្រង់ដូចជាអណ្ដាតភ្លើង ព្រះកេសាររបស់ទ្រង់ស ដូចជាហិមៈសុទ្ធ ព្រះភ័ក្ត្ររបស់ទ្រង់ភ្លឺជាងពន្លឺថ្ងៃ ហើយសំឡេងរបស់ទ្រង់ដូចជាសូរនៃទឹកច្រើន គឺសំឡេងនៃព្រះយេហូវ៉ា ដោយមានព្រះបន្ទូលថា ៖
« យើងជាដើម ហើយជាចុង យើងជាព្រះអង្គដែលមានព្រះជន្មរស់នៅ យើងជាអង្គដែលត្រូវគេធ្វើគត យើងជាព្រះគាំទ្ររបស់អ្នកជាមួយព្រះវរបិតា » ( គ. និង ស. ១១០:៣-៤ ) ។
ព្យាការីរូបនេះក៏បានប្រកាសអំពីទ្រង់ផងដែរថា ៖ « ហើយឥឡូវនេះ បន្ទាប់ពីទីបន្ទាល់ជាច្រើនដែលបានថ្លែងអំពីទ្រង់ នេះគឺជាទីបន្ទាល់ចុងក្រោយបង្អស់ ដែលយើងខ្ញុំសូមថ្លែងអំពីទ្រង់ ៖ គឺថាទ្រង់មានព្រះជន្មរស់នៅ !
« ដ្បិតយើងខ្ញុំបានឃើញទ្រង់គង់នៅខាងស្ដាំព្រះហស្ដនៃព្រះ ហើយយើងខ្ញុំបានឮសំឡេង ដែលថ្លែងទីបន្ទាល់ថា ទ្រង់គឺជាបុត្រាបង្កើតតែមួយនៃព្រះវរបិតា—
« ថាដោយសារព្រះអង្គ និងតាមរយៈព្រះអង្គ ហើយពីព្រះអង្គ នោះពិភពលោកទាំងឡាយមានឡើង ហើយបានបង្កើតមក ហើយបណ្ដាជននៅទីនោះ គឺជាបុត្រាបុត្រីបង្កើតចំពោះព្រះ » ( គ. និង ស. ៧៦:២២-២៤ ) ។
ពួកយើងសូមប្រកាសជាឧឡារិកថា បព្វជិតភាពរបស់ទ្រង់ និងសាសនាចក្ររបស់ទ្រង់ ត្រូវបានស្ដារឡើងវិញនៅលើផែនដី— « ដែលបានស្អាងឡើងលើជើងជញ្ជាំងនៃ … ពួកសាវក និងពួកព្យាការី ហើយព្រះយេស៊ូវគ្រីស្ទនោះឯង ទ្រង់ជាថ្មជ្រុងយ៉ាងឯក » ( អេភេសូរ ២:២០ ) ។
ពួកយើងសូមធ្វើទីបន្ទាល់ថា ទ្រង់នឹងយាងមកផែនដីវិញនៅថ្ងៃណាមួយ ។ « នោះសិរីល្អនៃព្រះយេហូវ៉ានឹងសម្ដែងមក គ្រប់មនុស្សទាំងឡាយនឹងបានឃើញព្រមគ្នា » ( អេសាយ ៤០:៥ ) ។ ទ្រង់នឹងគ្រប់គ្រងជាស្ដេចលើអស់ទាំងស្ដេច ហើយសោយរាជ្យជាព្រះអម្ចាស់លើអស់ទាំងព្រះអម្ចាស់ ហើយគ្រប់ទាំងជង្គង់ត្រូវលុតចុះ ហើយគ្រប់ទាំងអណ្ដាតនឹងថ្លែងថ្វាយបង្គំទ្រង់ ។ យើងម្នាក់ៗនឹងត្រូវឈរទទួលការជំនុំជម្រះពីទ្រង់ ស្របតាមកិច្ចការ និងសេចក្ដីប៉ងប្រាថ្នាទាំងឡាយនៃដួងចិត្តរបស់យើង ។
ក្នុងនាមជាពួកសាវករបស់ទ្រង់ដែលបានតែងតាំងឡើងដោយត្រឹមត្រូវ ពួកយើងសូមថ្លែងទីបន្ទាល់ថា —ព្រះយេស៊ូវគឺជាព្រះគ្រីស្ទដ៏មានព្រះជន្មរស់ និងជាព្រះរាជបុត្រាអមតភាពរបស់ព្រះ ។ ទ្រង់គឺជាព្រះរាជាអេម៉ាញូអែលដ៏មហិមា ដែលសព្វថ្ងៃនេះគង់នៅខាងស្ដាំព្រះហស្ដនៃព្រះវរបិតារបស់ទ្រង់ ។ ទ្រង់គឺជាពន្លឺ ជាជីវិត ហើយជាសេចក្ដីសង្ឃឹមនៃពិភពលោក ។ មាគ៌ារបស់ទ្រង់គឺជាមាគ៌ាដែលនាំទៅរកសុភមង្គលនៅក្នុងជីវិតនេះ និងជីវិតដ៏នៅអស់កល្បជានិច្ចក្នុងបរលោកនាយ ។ សូមថ្វាយអំណរព្រះគុណចំពោះព្រះសម្រាប់ព្រះរាជបុត្រាដ៏ទេវភាពរបស់ទ្រង់ ដែលជាអំណោយដ៏ឥតប្រៀបផ្ទឹមបាន ៕ ៚
គណៈប្រធានទីមួយ
ថ្ងៃទី ១ ខែមករា ឆ្នាំ ២០០០
កូរ៉ុមនៃពួកដប់ពីរនាក់