Faitāpuekina e Kāingalotu Ko ʻEnau Tuí Lolotonga e Ngaahi Fakatamakí

Naʻe hanga ʻe he Kāingalotu ʻo e Siasí ʻi he ʻOtu Motu Haʻamoá, ʻa ia ne hoko ki ai ha maumau lahi ko e tupu mei ha mofuike pea hoko atu ai mo ha peau-kulá, ʻo tuku ki he tafaʻakí ʻenau ngaahi fie maʻu fakatāutaha mo fakafāmili naʻe natula fakatuʻasinó, kae lava ke nau feau ha ngaahi fie maʻu fakalaumālie lolotonga ʻa e konifelenisi lahí.

Naʻe tō mai ʻa e mofuike lahí ni ʻa ia ne aʻu hono mālohí ki he -8.0 ʻo fakafuofua ki ha maile ʻe 120 (kilomita ʻe 190) ʻi he fakatongahahake ʻo ʻApia ʻi Haʻamoá, ʻi he ʻaho 29 ʻo Sepitema 2009—ʻa ia ko ha ngaahi ʻaho siʻi pē ia ki muʻa ʻi he konifelenisi lahí. Ko e mofuiké ni pea mo e peau-kula naʻá ne fakatupú—ʻa ia ko ha foʻi peau ʻe fā naʻe meimei ke fute ʻe 15 (mita ʻe 5) hono māʻolungá —naʻá na toʻo ai ha moʻui ʻa ha kakai ʻe toko 180 tupu ʻi he Pasifikí, pea ko e tokolahi ʻo kinautolu ʻi he ʻOtu Motu Haʻamoá, tuku kehe pē ha toko 9 mei ai.

Neongo ʻa e fakatamaki naʻe mālōlō ai ha kāingalotu ʻe toko 26 pea pehē ki he ngaahi ngāue fakaakeake ne hoko atu aí, ka naʻe kei mohu tāpuekina pē ʻa e Kāingalotú ʻi heʻenau fakaʻatā honau taimí ke nau kau atu ki he konifelenisi lahí ʻi he letioó, televīsioné pe satelaité.

Ko ʻEni F. H. Faleomavaengá ko ha mēmipa ia ʻo e Siasí pea ʻokú ne hoko ko ha fakafofonga ki he Falealea ʻo e ʻIunaiteti Siteití mei he vahefonua ʻAmelika ʻi Haʻamoa ʻAmeliká, naʻá ne pehē naʻe maʻu ʻe he Kāingalotú ha ivi mei heʻenau kau atu ki he konifelenisí ʻi he lotolotonga ʻo e faingataʻá. Naʻá ne pehē, “Naʻe ʻi ai ha faʻahinga ongoʻi fiemālie naʻe maʻu mei he fanongo ki he palōfitá … lolotonga ha taimi ʻo e moʻuí pe ko e maté.”

Ko e malava ko ia ʻe he kāingalotú ke maʻu ʻa e fakalotolahi ko ia mei he kau palōfita ʻo onopōní ʻi heʻenau lea fakafonuá, ko e ola ia ʻo ha ngāue lahi fau ʻa e timi liliu-leá, neongo ne nau aʻusia ha ngaahi mole fakatāutaha lolotonga e fakatamakí.

ʻI he fuofua taimi ko ʻeni ne vahe ange ai ke nau fakahoko fakahangatonu ʻa e fakatonuleá mei he ʻotu motú kae ʻikai ko Sōleki Sití, naʻe pau ke fai ai ʻe he timi liliu-leá ha fili hili e tō mai ʻa e fakatamakí. ʻE lava ke ʻave ʻe he timí ke fakahoko ʻa e liliu-leá mei Sōleki Siti ʻi ha kiʻi vahaʻa taimi nounou mei ai ka nau tokangaʻi e ngaahi fie maʻu ʻa honau kaungāmeʻá mo e fāmili ne uesia ʻi he mofuiké pe ko haʻanau fakahoko honau fatongiá.

Naʻe pehē ʻAliitasi Talataina, ko e pule ʻo e liliu leá mo e kouʻōtineita fakatonuleá, naʻá ne ongoʻi naʻe tokolahi ha kakai te nau lava ʻo tokoni ki he ngaahi fie maʻu fakatuʻasino ʻa e kakaí pe tanu siʻi kau pekiá, ka “ko e meʻa ʻeni ʻoku finangalo ʻa e ʻEikí ke tau fai [maʻá e] kakai moʻuí mo e ngaahi toʻu tangata ka hoko maí.”

Koeʻuhí naʻe ʻi ai ha foʻi timi ke tokangaʻi e fakatamakí ne nau hū atu ʻo ngāue ʻaki e senitā tokoní, ʻa ia naʻe fokotuʻu ai ʻa e meʻangāue ki he fakatonuleá, naʻe pau ai ke kumi ʻe he timí ni ha fale naʻe maʻu ai ha uaea telefoni mo ha ngaahi fie maʻu fakatekinikale kehe pē ke fakahoko mei ai ʻa e liliu-lea ko ʻení.

Naʻe pehē ʻe Sisitā Talataina naʻe tatau e tui ʻa e timí pea mo Nīfai, he naʻa nau pehē, “Tatau ai pē kapau te tau fakahoko ia mei ha laloʻakau, te tau kei ʻalu pē ʻo fai ia” (vakai, 1 Nīfai 3:7).

Naʻe tokoni ʻa e ʻEikí ʻo nau maʻu ha feituʻu pea fetuku atu leva ʻo fokotuʻu ai ʻa e meʻangāue naʻe fie maʻú pea siviʻi ia ʻi ha ngaahi ʻaho siʻi ki muʻa pea toki fai e konifelenisí.

Naʻe pehē ʻe Sisitā Talataina, “Ne mau ongoʻi e toʻukupu ʻo e ʻEikí ʻi heʻemau fakahoko ʻa e meʻa naʻe fekau mai ke mau faí.”

Naʻe tupu mei he ngāue ko ʻeni ʻa e timí, ʻa e malava ke kiʻi taʻofi hifo ʻe he kāingalotú ʻenau ngāue ki hono fakamaʻa ʻo e koló ka nau kau atu ki he konifelenisí ʻi he taimi naʻe kamata aí, pea nau lava ʻo fanongo ai pea mahino kiate kinautolu e pōpoaki ʻa e ʻEikí maʻanautolú.