“Faaeeina i le Mana,” mataupu 46 o le Au Paia: O Le Tala o le Ekalesia a Iesu Keriso i Aso e Gata Ai, Voluma 1, O Le Tagavai o le Upumoni, 1815–1846 (2018)
Mataupu 46: “Faaeeina i le Mana”
Mataupu 46
Faaeeina i le Mana
I le tautoulu o le 1844, na auina atu ai e le Korama a le Toasefululua se tusi i Au Paia uma lava i soo se mea. “O le malumalu,” na latou faasilasila atu ai, “o loo manaomia lava lo tatou faamuamua ma le taulai atu silisili.” Sa latou uunaia le Au Paia e auina atu tupe, sapalai, ma tagata galulue ina ia faanatinati ai le aluga o le galuega. O se faaeega o le mana o loo faatalitali ia i latou. Pau le mea latou te manaomia o se nofoaga ina ia maua ai na faaeega.1
Na faasoa atu e le Au Paia le faanatinati a aposetolo. I le faaiuga o Setema, na tusi atu ai Pita Maughan ia Uiliata Risati e uiga i le maina koale fou a le Au Paia e selau maila i luga o le Vaitafe o le Misisipi. Faatoa uma lava ona faatau atu e Pita ma Maria lo la fale i Navu, ma faaaoga le tupe e faatau ai le maina mo le ekalesia, ma siitia atu lo latou aiga i se tamai fale laau i tafatafa o le tulaga o le galuega. Ae ua naunau lava Pita e toe foi i Navu ma tipi maa mo le maota o le Alii.
“Pau le mea o loo i lou mafaufau,” na ia tau atu ai ia Uiliata, “o le malumalu o loo fausia agai i luga ae ou te le o i ai e fesoasoani.”2
Faatasi ai ma puipui o le malumalu ua faasolo agai i luga, na naunau lava Polika e faaauau le galuega na amata e Iosefa. I le mulimuli ai i le faataitaiga a le perofeta, na ia tatalo soo faatasi ma le Au Paia ua maua faaeega paia ma ole atu i le Alii ina ia faasaoina ma ia lotogatasi le ekalesia. O papatisoga mo e ua oti, ia na taofia ina ua maliu Iosefa, na toe amataina i le pito i lalo o le malumalu. Na faateleina le fuainumera o faifeautalai ma fitugafulu na toe foi atu i le misiona.3
Ae peitai na i ai pea lava luitau. Ia Setema, na iloa ai e Polika ma le Toasefululua faapea o Sini Rikitone na faia ni taupulega faalilolilo e faasaga ia i latou ma faaleagaina Iosefa faapea o se perofeta pau. Na latou molia o ia i le liliuese, ma na tapeina e Epikopo Uitini ma le au fautua maualuga lona igoa. Na tuua vave lava e Sini Navu mulimuli ane, ma vavalo atu faapea o le a le faaumaina lava e le Au Paia le malumalu.4
Na popole pea mo le manuia o lona aiga, na musu ai foi Ema Samita e tuuina atu lana lagolago atoatoa i aposetolo. Na ia galue faatasi ma e na vaaia meatotino na latou tofia e faatulaga meatotino a Iosefa, ae o feeseeseaiga i pepa a Iosefa ma isi meatotino na le fiafia ai o ia. Na afaina foi o ia faapea o loo faaauau pea e aposetolo ona aoao atu ma faatino faalilolilo le autaunonofo.5
O tamaitai na faamau ia Iosefa o ni autaunonofo e lei finauina mai ni vaega i ana meatotino. Ina ua mavae lona maliu, o nisi o i latou na toe foi atu i o latou aiga. O isi na faaipoipo i sui o le Toasefululua, ia na osi feagaiga e vaaia ma tausia i latou pe a leai Iosefa. Na filemu lava ona faaauau e aposetolo ona faailoa atu ia autaunonofo i isi Au Paia, faaipoipo atu i ni autaunonofo fou, ma amataina ni aiga faatasi ma i latou.6
I le amataga o le 1845, o luitau silisili lava o le Au Paia na sau mai fafo o le ekalesia. Na molia Tomasi Sharp ma isi alii e toavalu i le fasiotia o Iosefa ma Ailama, ae e leai se tasi o le Au Paia na mautinoa o le a molia i latou. O lesitara o le Setete, i le taimi lea, na saili ia faavaivai le malosi faalemalo o tagata o le ekalesia e ala i le faaleaogaina o le pepa tulafono a le aai o Navu. Na lagolagoina a latou taumafaiga e Kovana Ford, ma e oo atu i le faaiuga o Ianuari 1845, ua aveese e le palemene le aia tatau a le Au Paia na nonofo i Navu e faia ma faamalosia tulafono ma faataapeina le Au a Navu faapea foi ma le au a leoleo o le lotoifale.7
E aunoa ma nei puipuiga, na fefe Polika, o le a faigofie ona osofai le Au Paia e o latou fili. Ae e lei taitai lava ona maea le malumalu, ma afai e sosola ese le Au Paia mai le aai, o le a faigata ona mafai ona latou faamoemoe e maua o latou faaeega paia. Sa latou manaomia le taimi e faauma ai le galuega na tuuina mai e le Alii ia i latou. Ae o le nonofo i Navu, pe afai na o se isi lava tausaga, o le a mafai ai ona lamatia ola o tagata uma.
Na tootuli ma tatalo Polika ia iloa le mea e tatau ona fai e le Au Paia. Na aumai e le Alii se tali faigofie lava: nonofo ma faauma le malumalu.8
I le taeao o le aso 1 o Mati, na avea ai Leuisi Dana e tolu-sefulu-valu-tausaga ma Initia Amerika muamua lava e auai i le Aufono a le Toalimagafulu. Ina ua mavae le maliu o Iosefa, na taofia loa fonotaga a le aufono, ae ina ua faaleaoga le pepa o tulafono a Navu ma iloa ai e le Au Paia ua itiiti o latou aso i Navu, na valaau loa e le Toasefululua le aufono faatasi e fesoasoani e pulea le aai ma fuafua le tuua o le aai.
O se tasi o le nuu o Oneida [Initia] o Leuisi na papatiso ma lona aiga i le 1840. Na ia auauna atu i ni nai misiona, e aofia ai se tasi i le teritori o Initia i sisifo o le Iunaite Setete, ma na oo atu lava i se mamao e pei o Mauga o le Vavau. I le iloaina na i ai ni uo ma aiga o Leuisi i totonu o nuu Initia i sisifo, na valaaulia ai o ia e Polika ia auai i le aufono ma faasoa mai mea na ia iloa e uiga i tagata ma laueleele iina.
“I le suafa o le Alii,” na tau atu ai e Leuisi i le aufono, “Ua ou naunau e faia mea uma ou te mafaia.”9
I le tele o tausaga, na faateteleina le le fiafia o le Au Paia i taitai o lo latou nuu mo le mumusu e fesoasoani ia i latou. Ua filifili nei taitai o le ekalesia e tuua le nuu ma faataunuu le fuafuaga a Iosefa ina ia faatulaga se nofoaga fou mo le faapotopotoina e mafai ai ona latou sisiina ae se tagavai i atunuu, e pei ona valoia e le perofeta o Isaia, ma ola ai i tulafono a le Atua i le filemu. E pei o Iosefa, na manao Polika i se nofoaga fou e faapotopoto ai i Sisifo, i tagata Initia, ia na ia faamoemoe e faapotopoto faatasi o se paranesi o Isaraelu faataapeapeina.
Na lauga atu i le aufono, ma fautua atu Polika e auina atu Leuisi ma ni nai tagata o le aufono i sisifo i se malaga suesue ia feiloai ma Initia mai ni nai nuu ma faamatala i ai le faamoemoe o le Au Paia mo le siitia atu i sisifo. O le a latou faailoa mai foi ni nofoaga lelei mo le faapotopotoina.10
Na malie Heber Kimball i le fuafuaga. “Ao sailia e nei alii lena nofoaga,” na ia fai atu ai, “o le a faaumaina le malumalu ma maua ai e le Au Paia o latou faaeega paia.”11
Na malilie le aufono i le malaga suesue, ma na ioe Leuisi e taitaia le malaga. Mo le vaega o totoe o Mati ma Aperila, na ia auai i fonotaga a le aufono ma fautuaina alii o le aufono i le ala sili e saunia ai le malaga suesue ma ausia ai ona faamoemoega.12 E oo atu i le faaiuga o Aperila, ua tofia e le aufono ni alii e toafa e faatasi atu ma Leuisi i le malaga, e aofia ai le uso o Polika o Fineaso ma se tagata liliu mai e igoa ia Solomona Tindall, o se Initia Moekana lea na vaetamaina e Initia Telauea.13
Na vave lava ona tuua Navu e le malaga suesue mulimuli ane, ma malaga loa i saute sisifo e ala atu i Misuri agai i le teritori i tua atu.14
I le atumotu o Tubuai i le Pasefika i Saute, na fuafua ai e Atisone Palate ua toeitiiti atoa le lua tausaga talu ona ia tuua lona toalua ma le fanau i Navu. E ui lava e aunoa ma se masalosalo na tusi atu Luisa ia te ia, e pei ona ia tusi atu ai i le aiga i avanoa uma lava, na te lei mauaina lava se tusi mai lona aiga.
Ae sa ia faafetai pea, i tagata o Tubuai, o e na ia maua ai le lagona e pei o lona lava aiga. O le tamai motu na i ai pe a ma le lua selau tagata, ma na galue malosi Atisone, aoao la latou gagana, ma faia ni uo se tele. I le mavae ai o se tausaga i luga o le motu, na ia papatisoina ai tagata e toa onosefulu, e aofia ai Repa, le afafine matua o le tupu o le lotoifale. Na ia papatisoina foi se ulugalii e igoa ia Napota ma Telii, ia na faasoa atu mea uma na la maua ia te ia ma faia o ia e pei o se aiga. Mo Atisone, o se ‘aiga fiafia faaleagaga le faalogo atu o tatalo Napota ma Telii mo le Au Paia i Navu ma faafetai i le Alii mo le auina mai o Atisone i se misiona.15
E ui lava o le mafaufau ia Luisa ma ona afafine na naunau ai Atisone mo le aiga, ae na tuuina atu ai ia te ia se avanoa e mafaufau ai i le mafuaaga mo la latou osigataulaga. Ua ia i ai i luga o Tubuai ona o lona alofa mo Iesu Keriso ma lona naunau mo le faaolataga o fanau a le Atua. Ao ia fesopoai i le motu e asiasi atu i le Au Paia o Tubuai, na masani ona lagona e Atisone se mafanafana ma le alofa lea na maligi ai ona loimata ma i latou foi na siomia o ia.
“Ua ia te au ni uo e leai se isi mea ae na o sootaga o le talalelei faavavau e mafai ona fatuina,” na ia tusia ai i lana api talaaga.16
E tolu masina mulimuli ane, ia Iulai i le 1845, na iloa ai e Atisone le maliu o Iosefa ma Ailama i se tusi mai ia Noa Rogers, sona uso a faifeautalai, lea na talai e mamao atu i Tahiti. Ao faitau Atisone e uiga i le fasiotiga, na foliga mai ua malulu ona alatoto.17
Pe a ma se vaiaso mulimuli ane na toe tusi atu ai Noa ia Atisone. O le galuega faafaifeautalai i Tahiti ma isi motu lata ane na itiiti le faamanuiaina nai lo Atisone o loo i Tubuai, ma o le tala fou mai Navu na le mautonu ai Noa. Na i ai lona toalua ma se fanau e toaiva i le aiga ma na ia popole mo lo latou saogalemu. Na latou puapuagatia tele lava i faigata i Misuri, ma e lei manao o ia ia i latou ia onosaia nisi faigata e aunoa ma ia. Na ia fuafua e malaga i se vaa na sosoo ai i le fale.18
Na i ai ia Atisone mafuaaga uma e tatau ai ona mulimuli ia Noa. O lea ua leai Iosefa, na ia fefe foi mo lona aiga ma le ekalesia. “Po o a lava taunuuga o le a i ai,” na ia tusi ai i lana api talaaga, “ua na o le Atua e silafia.”19
Na malaga ese atu Noa i se vaa i ni nai aso mulimuli ane, ae o Atisone na filifili e nonofo faatasi ma le Au Paia Tubuai. O le aso Sa na sosoo ai, na ia faia ai ni lauga se tolu i le gagana o le lotoifale ma le tasi i le Igilisi.20
I Ilinoi, na asiasi atu ai Luisa Palate i ana uo o Erasitusi ma Ruama Derby i le Vai Pea, o se tamai nuu i saute o Navu.21 Ao i ai o ia iina, na susunuina e le au faatupu faalavelave se nuu o le Au Paia tuaoi. Na vave lava ona tuua vave e Erasitusi ina ia puipuia le nuu, ma tuua ai fafine e toalua e leoleo le fale nei osofaia foi le Vai Pea e ni au faatupu faalavelave.
O lena po, na fefe tele Ruama e moe ma finau atu e tu ma leoleo ao moe Luisa. Ina ua ia ala ae i le taeao, na maua e Luisa lana uo ua vaivai lava ae o loo mataala pea. Na pasi atu le aso popole e aunoa ma se faafitauli, ae ina ua toe oo mai le po, na taumafai Luisa e tauanau Ruama ia tuu mai ia te ia e tu e leoleo i lena po. O le taimi muamua, na foliga mai e fefe tele Ruama e talitonuina o ia, ae na iu lava ina faaoleole e Luisa o ia e moe.
E oo atu i le taimi na toe foi mai ai Erasitusi i ni nai aso mulimuli ane, na matuai vaivai lava nei fafine e toalua ae na le afaina. Na tau atu e Erasitusi ia i laua faapea o le Au Paia i le nuu tuaoi na nonofo i ni faleie ma taavale solofanua, ma na timuia ma maluluina i le po.22 Ina ua oo atu le tala fou ia Polika, na ia valaaulia le Au Paia o loo nonofo i fafo o Navu ia faapotopoto i se nofoaga saogalemu o le aai. I le faamoemoe ina ia faaitiitia le malosi o le au faatupu faalavelave ma ia maua ai se taimi e faataunuu ai le poloaiga a le Alii e faauma le malumalu, na ia folafola ai ia Kovana Ford o le a tuua e le Au Paia le eria i le tautotogo.23
Ina ua iloa e Luisa lenei mea, na ia le iloa le mea e fai. O Atisone o loo i le isi itu o le kelope, na te le o lagonaina na i ai sona mafaia po o ni punaoa e siitia ese atu ai lona aiga na o ia. O le tele ona mafaufau o ia e uiga i le tuua o Navu, o le faateleina foi lena o lona popole.24
I le mavae ai o se vaiaso o le timu, na manino ai le lagi i le taimi mo le konafesi a le ekalesia ia Oketopa i le 1845. Na le masani ai le mafanafana o le aso ao agai atu i luga o le matie le Au Paia mai itu uma o le aai i le malumalu ma sue se nofoa i lona potu tele faatoa fausia i le fogafale muamua e faapotopoto ai. Ao tele lava ina lei uma le isi vaega o totonu, ua maea puipui i fafo ma le taualuga ma tu susulu mai i le la le fale logo faaofuofu.25
Ao matamata atu Polika i le Au Paia o ulufale mai i totonu o le potu tele e faapotopoto ai, na ia lagonaina le lotomomoia. E lei manao o ia e tuua le malumalu po o Navu, ae o osofaiga talu ai a le au faatupu faalavelave ua na o se faataitaiga o le mea e tupu pe a toe nonofo umi le Au Paia i le aai.26 O lena tautotogo, na faasaoloto ai foi tamaloloa ia na tuuaia i le tagatavaleina o Iosefa ma Ailama, ma tuuina atu ai nisi faamaoniga i le Au Paia faapea o a latou aia tatau ma saolotoga o le a le faamamaluina i Ilinoi.27
O ripoti mai ia Leuisi Dana i le malaga suesue i Initia na lelei, ma i ni nai vaiaso talu ai, na finau ai aposetolo ma le Aufono a le Toalimagafulu i ni nofoaga talafeagai mo se nofoaga fou o le faapotopotoina. Na fiafia taitai o le ekalesia i le vanu Tele o Sate Leki, i le itu mamao o Mauga o le Vavau. O faamatalaga o le Vanu o Sate Leki na foliga lelei, ma na talitonu Polika o le a mafai ona nonofo le Au Paia latalata iina, ma iu lava ina faasolo atu ma nonofo i le Talafatai o le Pasefika.28
Ae na afe faselau maila le mamao ese o le vanu i le isi itu o se togavao tele, ma e le masani ai ma ni nai auala ma toeitiiti lava leai ni faleoloa e mafai ai ona latou faatauina ni meaai ma sapalai. Ua iloa lava e le Au Paia ua tatau ona latou tuua Navu, ae pe mata o le a mafai ona latou faia sea malaga umi ma e mautinoa lava le pagatia?
Faatasi ai ma le fesoasoani a le Atua, na mautinoa e Polika latou te mafaia, ma na ia fuafua loa e faaaoga le konafesi e uunaia ai ma faamautinoa ai tagata o le ekalesia. Na saunoa muamua Pale Palate i le sauniga o le aoauli, e faatatau i fuafuaga a le ekalesia ia siitia atu i sisifo. “Ua fuafua le Alii e taitai i tatou i se laufanua e lautele atu o le faatinoga, lea o le a tele atu ai le avanoa mo le Au Paia e tuputupu ae ai ma faateleina,” na ia folafola atu ai, “ma se nofoaga e mafai ai ona tatou olioli i mataupu faavae mama o le saolotoga ma aia tatau.”
George A. Na tulai Siaosi A. Samita i le pulelaa e sosoo ai ma saunoa atu i le sauaina na feagai ma le Au Paia i Misuri. Na faafefeina e se faatonuga o le faaumatiaga, ma latou o ese ai mai le setete faatasi, ma osi feagaiga e le tuua lava se tasi e nofo. Na manao Siaosi i le Au Paia ia faia lena lava mea i le taimi nei, ia tuuina atu a latou mea uma e fesoasoani ai ia i latou e le mafai ona faia le malaga na o i latou lava.
Ina ua maea Siaosi, na tuuina atu loa e Polika ia latou osi feagaiga le tasi ma le isi ma le Alii ia aua lava nei tuua se tasi e nofo, i latou na mananao e malaga i sisifo. Na valaau atu Heber Kimball mo se palota e lagolago ai, ma na sii e le Au Paia o latou lima o se faailoga o lo latou naunau e faataunuu la latou tautinoga.
“Afai o le a outou faamaoni i la outou feagaiga,” na folafola atu ai Polika, “O le a ou vavalo au nei faapea o le a sasaa mai e le Atua i lalo mea uma i lenei nuu ia faataunuuina ai mea ua poloaiina ai i latou.”29
I masina talu ona uma le konafesi, na faaaoga ai e le Au Paia ili uma, samala, poloka e tu’i ai uamea, ma nila suisui e fausia ai ma faalelei taavale solofanua mo le malaga tele i sisifo. O tagata galulue foi na toe faaluaina a latou taumafaiga i le malumalu ina ia mafai ona latou faaumaina le vaega e mafai ai e le Au Paia ona maua sauniga iina ae latou te lei tuua le aai.30
Ao saunia e le aufaigaluega le falealuga o le malumalu mo faaeega paia ma faamauga, na faaauau ona faia papatisoga mo e ua maliliu i le falealalo. I lalo o le taitaiga a le Alii, na faatonuina ai e Polika ia alii o le a le toe papatisoina mo tamaitai e faapea foi tamaitai mo alii.31
“E lei maua uma e Iosefa i lona olaga mea uma e faatatau i le aoaoga faavae o le faaolataga,” na aoao atu ai Polika i le Au Paia i le amataga o lena tausaga, “ae na ia tuuina le ki ia i latou o e malamalama i le ala e maua ai ma aoao atu i lenei nuu tele mea uma e manaomia mo lo latou faaolataga ma le faaeega i le malo selesitila o lo tatou Atua.”
O le suiga i le sauniga na faaalia ai le ala e faaauau ai e le Alii ona faaali mai Lona finagalo i Lona nuu. “Sa taitaiina lava e le Alii lenei nuu i le taimi atoa lava i lenei ala,” na folafola atu ai Polika, “e ala i le tuuina atu ia i latou o sina mea itiiti iinei ma sina mea itiiti iina. Ona Ia faateleina ai lea o lo latou atamai, ma o ia e mauaina sina mea itiiti ma faafetai mo lena mea o le a maua atili ai pea lava pea.”32
E oo atu ia Tesema ua uma le falealuga o le malumalu, ma na saunia ai loa e aposetolo mo faaeega paia. Faatasi ai ma le fesoasoani a le Au Paia, na latou tautau ai ni pupuni mamafa e vavae ai le potu tele i ni nai tamai potu e teuteuina i laau toto ma ni ata tusi. I le itu i sasae o le falealuga, na latou vavae ese ai se avanoa tele mo le potu selesitila, le nofoaga e sili ona paia i le malumalu, ma teuina i faaata, ata vali ma faafanua, ma se uati maamora matagofie.33
Ona valaaulia lea e aposetolo le Au Paia e ulufale i le malumalu ina ia maua o latou faamanuiaga. O alii ma tamaitai ua uma ona maua o latou faaeega paia ua auauai nei e faia isi matafaioi i le sauniga. Na taitai atu le Au Paia i potu o le malumalu, na latou aoaoina atili i latou i le fuafuaga a le Atua mo Lana fanau ma tuuina i latou i lalo o nisi feagaiga ina ia ola i le talalelei ma faapaiaina i latou lava i le fausia o Lona malo.34
Na faatinoina e Vilate Kimball ma Ana Uitini sauniga o le mulumuluga ma le faauuga i tamaitai. Ona taitaiina atu lea e Ilaisa Sinou tamaitai e ala atu i sauniga o totoe, ma na fesoasoani i ai isi tamaitai ua uma ona maua faaeega paia. Na valaaulia e Polika ia Mesi Thompson e see atu i le malumalu e galue i le taimi atoa e fesoasoani i le galuega iina.35
Ina ua mavae le amataga o le tausaga, na amata loa e aposetolo ona faamauina ulugalii faatasi mo le taimi nei ma le faavavau. Na vave lava, ae silia ma le afe ni ulugalii na mauaina le feagaiga fou ma tumau-faavavau o le faaipoipoga. Na i ai i le vaega lena Sali ma Viliamu Phelps, Lusi ma Isaako Moli, Ana ma Filo Dibble, Karoline ma Ionatana Crosby, Litia ma Neueli Knight, Turusila ma Iakopo Hendricks, ma isi tamaitai ma alii na mulimuli atu i le ekalesia mai i lea nofoaga i lea nofoaga, ma faapaiaina o latou ola i Siona.
Na faamau foi e aposetolo tamaiti i matua ma alii ma tamaitai i taitoalua o e ua maliliu. O Iosefa Knight Le Matua, lea na olioli ma Iosefa i le taeao na ia aumaia ai papatusi auro i le fale, na faamauina i lona toalua, o Poli, le Au Paia muamua lava na tanumia i le Itumalo o Siakisone, Misuri. O nisi Au Paia na auai foi i ni faamauga faapitoa o le vaetamaina lea na sosoo atu ai i latou i ni aiga faavavau o ni uo mamae.36
Faatasi ai ma sauniga taitasi, o le fuafuaga a le Alii o e filifili ia sosoo faatasi o le Au Paia ma o latou aiga, na faamauina ia te Ia ma le tasi i le isi e ala i le perisitua, na avea ma se mea moni.37
O lena taumalulu, na le fifilemu ai fili o le ekalesia, na masalosalo i le tausia e le Au Paia o la latou folafolaga e tuua le aai i le tautotogo. Na molia pepelo Polika ma isi aposetolo i ni agasala, lea na faamalosia ai i latou ia aua nei onoono mai ma o nisi taimi na oo lava ina lalafi i totonu o le malumalu.38 Na feaveai tala e faapea o le malo o le I.S. na fesiligia le faamaoni o le Au Paia ma mananao e auina atu autau e taofia i latou mai le tuua o le nuu ma ia ogatusa ma pule mai fafo na e puleaina laueleele i sisifo.39
Na lagonaina le manaomia tele ona latou tuua, ma na filifili ai aposetolo faapea o taitai o le ekalesia, o latou aiga, ma isi ia na faasaga i ai sauaga e tatau ona o loa i le vave e mafai ai. Na latou talitonu o le kolosiina o le Vaitafe o le Misisipi e agai atu i totonu o Aioua atonu e taofia ese ai o latou fili mo sina taimi ma taofia ai nisi vevesi.
I le amataga o Ianuari i le 1846, na faia ai e aposetolo le faaiuga o a latou fuafuaga mo le malaga tele faatasi ma le Aufono a le Toalimagafulu. Ae lei tuua, na latou tofia ni ofisa e puleaina fanua na latou tuua ma faatau atu mea na latou mafaia e fesoasoani ai i e na matitiva ina ia mafaia le malaga. Na latou mananao foi i ni alii ia nonofo e faauma ma faapaia le malumalu.
Ua naunau nei Polika ma le Toasefululua ia faapotopoto le Au Paia i le vanu Tele o Sate Leki. I le mavae ai o le anapogi ma le tatalo i aso uma i le malumalu, na vaaia ai e Polika se faaaliga o Iosefa o loo tusi atu i se tumutumumauga faatasi ma se fua o loo lealea i luga e pei o se tagavai. Na tau atu e Iosefa ia te ia ina ia fausia se aai i lalo o le ataata o lena mauga.
Na talitonu Polika o le a toalaiti tagata o le a mananao i le vanu, lea na itiiti le lafulemu nai lo fanua laugatasi i sasae o mauga. Na ia faamoemoe o le a puipuia i latou mai fili e mauga ma maua ai se tau (climate) talafeagai. O le taimi lava latou te nofoia ai le vanu, na ia faamoemoe ai, o le a mafai ai ona latou faatuina ni uafu i le Talafatai o le Pasefika e taliaina ai tagata malaga mai Egelani ma mai le Iunaite Setete i sasae.40
Na toe faapotopoto le aufono i le lua aso mulimuli ane, ma na toe faamanatu atu e Polika le manao o Iosefa e faataunuu le valoaga a Isaia ma sisi ae se tagavai i nuu uma. “O upu a perofeta o le a le faamaonia,” na tau atu ai e Polika i le aufono, “sei vagana ua faatuina le maota o le Alii i tumutumu o mauga ma o le a talotalo atu le fua maoae o le saolotoga i luga o vanu i totonu o mauga.”
“Ou te iloa le mea o loo i ai le tulaga,” na ia folafola atu ai, “ma ou te iloa fai le fua.”41
I le aso 2 o Fepuari, ina ua maea ona maua e le faitau afe o le Au Paia sauniga o le malumalu, na folafola atu loa e aposetolo o le a latou taofia galuega i totonu o le malumalu ae nai lo lena ia saunia ni vaa e ave atu ai taavale solofanua i le isi itu o le Vaitafe aisa o le Misisipi. Na auina atu e Polika avefeau i kapeteni o vaega o taavale solofanua, ma faatonuina i latou ia saunia e tuua i totonu o le fa itula. Ona ia faaauau lea ona faia faaeega paia i le Au Paia seia oo i le leva o le afiafi, ma taofia ai failautusi o le malumalu iina seia uma ona faamaumauina lelei sauniga taitasi.42
Ina ua alafa’i mai Polika i le aso na sosoo ai, na faafeiloaiina o ia e se vaega o le Au Paia i fafo o le malumalu, na naunau mo o latou faaeega paia. Na tau atu e Polika ia i latou e le o se mea atamai le faatuai o lo latou malaga ese. Afai latou te nonofo e faia nisi faaeega paia, e mafai ona faaletonu lo latou ala i fafo o le aai pe taofia foi. Na ia folafola atu ia i latou o le a latou fausia isi malumalu ma maua isi avanoa e maua ai o latou faamanuiaga i sisifo.
Ona savali ese lea o Polika, ma le faamoemoe ia taape le Au Paia, ae nai lo lena na latou feaei atu i faasitepu o le malumalu ma faatumuina ona potu tetele. Na toe liliu i tua, ma mulimuli atu loa Polika ia i latou i totonu. Na ia vaaia o latou foliga naunau mai, ma na suia ai lona mafaufau. Na latou iloaina na latou manaomia le faaeega o le mana ina ia onosaia ai faigata o loo i luma atu, ma manumalo ai i le tui o le oti, ma toe foi atu ai i le afioaga o le Atua.
Mo le vaega o totoe o lena aso, na faatino ai e le aufaigaluega o le malumalu sauniga o le faitau selau o le Au Paia.43 O le aso na sosoo ai, o le aso 4 lea o Fepuari, 1846, na maua ai e le isi lima selau o le Au Paia o latou faaeega paia ao gasolo lemu atu taavale solofanua muamua i fafo o Navu.
Mulimuli ane, i le aso 8 o Fepuari, na feiloai ai Polika ma aposetolo i luga o le fogafale i luga o le malumalu. Na latou tootutuli faataamilo i le fatafaitaulaga ma tatalo ai, ma ole atu i le faamanuiaga a le Atua i luga o tagata o loo agai atu i sisifo ma i luga o i latou e nonofo i Navu e faauma le malumalu ma faapaiaina ia te Ia.44
I isi aso ma vaiaso na sosoo ai, na faatumu ai e vaega o le Au Paia a latou taavale solofanua ma povi i luga o vaalaau ma auina atu ai i latou i le isi itu o le vaitafe, ma faatasi atu i isi ua uma ona sopoia le vai. Ao latou agai atu i luga o se mato maualuga i ni nai maila i sisifo o le vaitafe, e toatele le Au Paia na toe tepa i tua i Navu ma faia se faatofa faamomoiloto i le malumalu.45
Mai i lea aso i lea aso, na matamata ai Luisa i ana uo ma tuaoi ua tuua le aai. Na ia le manao lava e mafaufau e alu i sisifo e aunoa ma le fesoasoani ma le faatasi mai o Atisone. Na iloa uma e tagata o le malaga o le a tumu i ni faigata e le iloa atu, ae e oo mai nei lava e leai ma se isi na fesili mai ia te ia pe ua ia saunia e faia le malaga. Ma e leai se alii na valaaulia Atisone i le misiona na ofo mai e fesoasoani ia te ia e siitia atu.
“Tuafafine Palate,” na fai atu ai se uo i se tasi aso ina ua ia faaleo atu ona lagona, “ua latou faamoemoe ia te oe ia lava lou atamai e alu ai oe lava ia e aunoa ma se fesoasoani, ma ia fesoasoani atu foi i isi.”
Na mafaufau Luisa i lena mea mo sina taimi. “Ia,” na ia fai atu ai, “o le a ou faaali atu ia i latou le mea e mafai ona ou faia.”46
Faatasi ai ma le kiona o loo siomia ai o ia, na tetete lava Emili Paterika ao ia nofo i luga o se laau pau i le auvai i sisifo o le Misisipi. Na kolosi atu e lona tina ma ona uso le vaitafe i le ono aso talu ai ma na tolauapi latalata ane, ae e le o iloa e Emili po o fea. E pei o le toatele o le Au Paia na tuua Navu, na lelava o ia, fiaai, ma na popole e uiga i le malaga o loo i luma atu. O le taimi lona fa lenei ua tuliese ai o ia mai lona fale ona o lona faatuatua.47
Mo le toeitiiti lava o le umi e mafai ai ona ia manatua, na avea ai o ia ma Au Paia o Aso e Gata Ai. Ao teineitiiti, na ia matamata i lona tama ma lona tina o puapuagatia i sauaga ma le mativa ina ia auauna ia Iesu Keriso ma faatuina Siona. E oo atu i lona sefuluono, ina ua faamalosia e le au faatupu faalavelave lona aiga mai Misuri, sa faaaluina e Emili le tele o lona olaga i le sailiga mo se nofoaga o le saogalemu ma le filemu.
Ua toeitiiti luasefulu-lua nei, o lea ua ia toe amataina se isi malaga. Ina ua mavae le maliu o Iosefa, na ia faaipoipo atu ia Polika Iaga o se autaunonofo. Ia Oketopa talu ai, na maua ai se la tama tama, o Eteuati Paterika Iaga, na faaigoa i lona tama. I le lua masina mulimuli ane, na ulufale ai Emili i le malumalu ma maua ai lona faaeega paia.
Afai e sao mai lana pepe i le malaga, o le a ia ola ae i mauga, saogalemu mai faatupu faalavelave o taimi talavou o lona tina. Ae peitai o le a ia le iloaina lava, e pei ona iloa e Emili, pe na faapefea le ola ai i le Itumalo o Siakisone po o Navu. O le a ia le feiloai lava ia Iosefa Samita pe faalogo ia te ia ao lauga atu i le Au Paia i se aoauli o le aso Sa.
Ae lei sopoia le vaitafe, na afe atu Emili i le Maota o Navu e vaai i le atalii pepe o Iosefa ma Ema, o Tavita Ailama, lea na fanau i le lima masina talu ona maliu le perofeta. Ua leai ni lagona tiga na i ai muamua i le va o Ema ma Emili, ma na valaaulia e Ema o ia i totonu o lona fale ma talia o ia ma le agalelei.
E le o i sisifo Ema ma tamaiti. O lana tauiviga e talia le autaunonofo, e faapea foi ma feteenaiga i meatotino, na faaauau ai ona le lelei lana fesootaiga ma le ekalesia ma le Toasefululua. Na ia talitonu pea i le Tusi a Mamona ma na i ai sana molimau malosi i le valaauga faaperofeta a lana tane. Ae nai lo le mulimuli i aposetolo, na ia filifili e nofo i Navu faatasi ma isi tagata o le aiga o Samita.48
Ao nofonofo i auvai o le Misisipi, na faateteleina le maalili o Emili ao faaputuputu mai kiona i luga o ona ofu. Na i ai pea Polika i Navu, o loo vaavaaia le malaga tele, o lea na ia siiina ai lana pepe mai le tasi afi o le tolauapiga i le isi, ma saili mo se mafanafana ma se foliga masani. E lei umi, ae toe faatasia o ia ma lona uso o Ilaisa lea na aveatua o ia i se tolauapiga o le Au Paia i se nofoaga e taua o le Vai Suka. O iina na ia vaaia ai ni aiga o loo faapupuu faatasi i totonu o faleie ma taavale solofanua, o loo pipii faatasi mo le mafanafana ma le lagolelei mai le malulu ma se lumanai e le mailoa.49
E leai se tasi i le tolauapiga na iloa pe o le a le mea o le a tupu i le taeao. Ae peitai latou te le o feosofi tauaso i totonu o le pogisa. Na latou osia ni feagaiga ma le Atua i le malumalu, ma faamalosia ai lo latou faatuatua i Lona mana e taitaia ma lagolagoina i latou i la latou malaga. Na talitonu i latou taitasi e faapea, e i ai se mea i sisifo, i le isi itu o tumutumu o Mauga o le Vavau, o le a latou maua ai se nofoaga e faapotopoto ai faatasi, fausia se isi malumalu, ma faatuina le malo o le Atua i le lalolagi.50