“O Mailei Uma,” mataupu 23 o le Au Paia: O Le Tala o le Ekalesia a Iesu Keriso i Aso e Gata Ai, Voluma 1, O Le Tagavai o le Upumoni, 1815–1846 (2018)
Mataupu 23: “O Mailei Uma”
Mataupu 23
O Mailei Uma
Sa galue Ionatana Crosby i lona fale i Katelani i le tautoulu o le 1836. E oo atu ia Novema ua puipui ma ato, ae e lei uma lava le fola toe leai foi ni faamalama po o ni faitotoa o le fale. I le latalata ai ona fanau le pepe, sa uunai ai o ia e Karoline e faauma le fale i le vave e mafai ai. Na sologa lelei mea uma ma le fafine e ona le fale mau totogi, o Tuafafine Granger, ae sa naunau lava Karoline e mei ese mai le fale pu moomoo ae nofo i lona ia lava fale.1
Ao galue punouai Ionatana e faanofoia le fale ae lei fanau le pepe, sa faasilasila mai e taitai o le Ekalesia la latou fuafuaga e amataina le Sosaiete o le Saogalemu a Katelani, o se faletupe a le nuu e faia ia siitia ai le tulaga faaletonu o le tamaoaiga ma sue ai tupe mo le Ekalesia. E pei o nisi faletupe laiti i le Iunaite Setete, o le a faia ai nonoga tupe mo le au nono tupe e mafai ai ona latou faatauina ni fanua ma oloa, ma fesoasoani ai e siitia le tamaoaiga i le lotoifale. Ao toe totogiina e le au nono tupe a latou nonoga tupe faatasi ai ma le tupe faasili, o le a maua ai se polofiti.2
O nonoga tupe o le a tuuina atu i pepa a le faletupe e faamaonia e le faaputuga tupe faatapulaa o tupe siliva ma tupe auro a le Sosaiete o le Saogalemu. Ina ia faatupuina lea faaputuga tupe o tupe fai tino, o le a faatauina atu e le faletupe sea o oloa i tagata fai saofaga, o e na naunautai e fai a latou peimeni ia latou sea i le taimi atofaina.3
E oo atu i le amataga o Novema, ua silia ma le tolu sefulu faisea, e aofia ai Iosefa ma Sini, o e na faagalueina le tele o a laua lava tupe i le faletupe.4 Na tofia e le au faisea Sini e avea ma peresitene o le faalapotopotoga ma Iosefa e avea ma teutupe, ma faia ai ia ma tagata e vaaia teugatupe a le faletupe.5
I le maea ai ona faatulaga fuafuaga mo le faletupe, sa alu loa i sasae Oliva e faatau mai mea e manaomia e lolomi ai pepa a le faletupe, ae alu Osone Hyde e talosaga mo se pepa faataga mai le lesitala a le setete e mafai ai ona faatino galuega o le faletupe faaletulafono. O Iosefa, i lena taimi, sa uunaia uma le Au Paia ia faagalue a latou tupe i le Sosaiete o le Saogalemu, ma sii atu mau o le Feagaiga Tuai o loo valaau atu ia Isaraelu anamua ia aumai a latou auro ma siliva i le Alii.6
Sa lagona e Iosefa o loo fiafia mai le Atua i a latou taumafaiga, ma sa ia folafola atu o le a lelei mea uma pe afai e usiusitai le Au Paia i poloaiga a le Alii.7 I le talitonu ai i le upu a le perofeta, sa faagalue loa e isi Au Paia a latou tupe i le Sosaiete o le Saogalemu, e ui ina sa sili atu ona faaeteete isi i le faatauina o oloa i se faalapotopotoga e lei faataitaia muamua. Na mafaufau le au Crosby e faatau ni sea, ae o le taugata tele o le tau o le fausiaina o le la fale sa le totoe ai se la tupe faaleoleo.8
I le amataga o Tesema, faatoa faapipii ai e Ionatana faamalama ma faitotoa mo le fale, ma la mei loa iai ma Karoline. E lei uma lelei totonu o le fale, ae sa iai se ogaumu fai meaai e faamafanafana ai ma fafaga i laua. Na eli foi e Ionatana se vai eli e latalata ane e faigofie ai ona maua le vai.
Sa fiafia Karoline ua maua sona ia lava fale, ma o le aso 19 o Tesema, sa ia fanauina ai se pepe tama malosi ao patiapata mai se timu aisa mamafa i fafo.9
Na ufitia e le tau malulu Katelani, ma ia Ianuari o le 1837, sa tatala ai le Sosaiete o le Saogalemu a Katelani mo pisinisi.10 I lona aso muamua, na tauaaoina atu ai e Iosefa pepa a le faletupe, fou lava mai le falelomi tusi, e iai le igoa o le faalapotopotoga ma lana saini i luma.11 Ao toatele le Au Paia na faia nonoga tupe, na masani ona faaaoga ai a latou fanua e taofi ai, sa amata ona faataamilo pepa a le faletupe i Katelani ma isi nofoaga.12
O Fipe Carter, lea faatoa mei mai i Katelani mai le Iunaite Setete i matusasae, e lei faagalueina se tupe pe faia foi se nonoga tupe i le Sosaiete o le Saogalemu. Ae sa ia tu ia faamanuiaina mai le manuia sa folafola mai ai. Toeitiiti lava atoa le tolu sefulu o ona tausaga ma e lei faaipoipo, ma sa leai sona aiga i Katelani e faamoemoe iai mo se fesoasoani. E pei o isi mafine e tutusa o latou tulaga, sa tau leai ni galuega e filifili ai, ae sa mafai ona ia maua se seleni faatauvaa mai le suisui ma le faiaoga i le aoga, e pei ona ia faia ae e lei siitia atu i Ohaio.13 Afai e faaleleia le tulaga o le tamaoaiga a Katelani, o le a tele ni tagata o le a iai tupe e faaalu i ofu fou ma le aoga.
Ae, mo Fipe, o lana filifiliga e sau i Katelani sa faaleagaga, e lei faaletamaoaiga. Sa tetee ona matua i lona papatisoga, ma i le maea ai ona faailoa atu ana fuafuaga e faapotopoto faatasi ma le Au Paia, sa faatuiese lona tina. “Fipe,” o le tala lea a lona tina, “e te toe foi mai ia te au pe afai e te iloa e sese le faaMamona?”
“Ioe, Tina, o le a ou toe foi mai,” o le folafolaga lea a Fipe.14
Ae na ia iloa ua ia maua le talalelei toefuataiina a Iesu Keriso. I ni nai masina talu ona taunuu i Katelani, na ia mauaina ai se faamanuiaga faapeteriaka mai ia Iosefa Samita Le Matua na faamautinoa mai ai ia te ia taui tetele i luga o le fogaeleele ma i le lagi. “Ia faamafanafanaina oe, aua ua mavae atu ou puapuaga,” na fetalai atu ai le Alii ia te ia. “O le a umi lou soifua ma o le a e vaai i aso lelei.”15
Sa faamautuina e le faamanuiaga lagona na maua e Fipe ao ia tuua lona aiga. I le faanoanoa tele e faatofa faaletino, na ia tusia ai se tusi ma tuu i luga o le laulau a lo latou aiga. “Aua e te atuatuvale mo lau tama,” na faitauina ai. “Ou te talitonu o le a tausia au e le Alii ma tuuina mai ia te au mea mo le silisili.”16
Sa faatuatua Fipe i folafolaga o lana faamanuiaga faapeteriaka. Sa taua o le a avea o ia ma se tina i se fanau e toatele ma faaipoipo atu i se alii e iai le atamai, poto, ma le malamalama.17 Ae mai i lena taimi sa leai se manatu o Fipe mo se faaipoipoga, ma sa ia iloa sa matua ai lava o ia nai lo le tele o mafine ua faaipoipo ma amata ona maua ni fanau.
I se tasi afiafi ia Ianuari o le 1837, sa tafao ai Fipe i ana uo ma fetaui ai ma se alii e malosi le lanu o le lauulu ma ni mata lanu moana vaivai. Na o ni nai aso e matua ai lea alii ia te ia ma e lei leva ona toe foi mai i Katelani ina ua uma ona savali i le Tolauapiga a Isaraelu ona auauna lea i se misiona i le itu i saute o le Iunaite Setete.
O lona igoa, sa ia mauaina, o Uilifoti Uitilafi.18
I lena taumalulu atoa, sa faaauau ai ona nono ni tino i tupe lapopoa e le Au Paia i Katelani e faatau ai fanua ma oloa. O e sa faafaigaluegaina tagata sa totogi i nisi taimi a latou aufaigaluega i pepa a le faletupe, e mafai ona faaaogaina o se tupe pe tuuina atu i le ofisa o le Sosaiete o le Saogalemu a Katelani mo ni tino i tupe.19
E lei leva ona tatalaina le Sosaiete o le Saogalemu mo pisinisi, ae amata ona faaputu e se tamaloa e igoa ia Grandison Newell pepa a le faletupe. I le avea ai o se tagata ua leva ona nofo i se taulaga latalata ane, sa ita Grandison ia Iosefa ma le Au Paia. Sa ia fiafia i sina lauiloa na iai i le itumalo seia taunuu atu le Au Paia, ma o lea ua tele ina saili ni auala, faaletulafono po o se isi ala, e faasoesa ai ia te i latou.20
Afai e o atu tagata o le Ekalesia ia te ia mo ni galuega, na te le taliaina i latou. Afai e talai ni faifeau e latalata ane i lona fale, na te faatulagaina se vaega o alii ia tauai i latou i fuamoa. Ina ua amata ona ao e Fomai Filasitusa Hurlbut faamatalaga tau faaleaga agai ia Iosefa, sa fesoasoani Grandison e faatupe lana galuega.21
E ui i ana taumafaiga, sa faaauau pea ona faapotopoto atu le Au Paia i lena eria.22
O le tatalaina o le Sosaiete o le Saogalemu a Katelani sa maua ai e Grandison se auala fou e osofai ai. I le popole ai i le siitia o le fuainumera o faletupe fou i Ohaio, e lei tauaaoina mai ai e le lesitala a le setete se laisene ia Osone Hyde. A aunoa ma lea faatagaga, e le mafai ona ta’ua le Sosaiete o le Saogalemu o se faletupe, ae e mafai lava ona latou teuina tupe ma tuuina atu nonoga tupe. O lona faamanuiaina sa faamoemoe i luga o faisea e faia peimeni i a latou sea e mafai ai ona faatumauina faaputuga tupe a le faalapotopotoga. E na o ni nai faisea sa lava a latou tino i tupe e faia ai lena mea, ae ui i lea, ma sa manatu Grandison sa laiti faaputuga tupe a le Sosaiete o le Saogalemu e faatumauina ai mo se taimi umi.23
I le faamoemoe ai e gau le pisinisi pe afai e lava tagata e tuuina atu a latou pepa mo ni tupe auro ma tupe siliva, sa femalagaai Grandison i le pitonuu ma faatauina pepa a le Sosaiete o le Saogalemu.24 Ona ia aumaia lea o ana faaputuga pepa i le ofisa o le Sosaiete o le Saogalemu ma fesili mo ni tupe e sui ai. Afai e le suitupeina ana pepa, o lana taufaafefe lea, o le a ia moliaina loa.25
I le popole, sa leai se filifiliga a Iosefa ma le au ofisa a le Sosaiete o le Saogalemu ae suitupeina pepa ma tatalo mo nisi tagata e faagalueina a latou tupe.
E ui ina itiiti ana tupe, sa faatauina e Uilifoti Uitilafi sea e lua sefulu i oloa a le Sosaiete o le Saogalemu a Katelani.26 O lana uo lelei o Warren Parrish sa failautusi i le Sosaiete o le Saogalemu. Sa malaga Uilifoti i sisifo faatasi ma Warren ma lona toalua, o Peti, o se vaega o le Tolauapiga a Isaraelu. Ina ua maliu Peti i le faamai o le kolera, sa auauna atu faatasi i se misiona Warren ma Uilifoti ae lei toe foi atu Warren i Katelani ma avea ma tusi upu ma uo faamoemoeina a Iosefa.27
Talu mai lana misiona, sa siitia mai i lea nofoaga i lea nofoaga Uilifoti, ma na tele lava ina ola i le agalelei o uo e pei o Warren. Ae ina ua fetaui ia Fipe Carter, sa amata ona ia mafaufau e uiga i le faaipoipoga, ma o le faagalueina o tupe i le Sosaiete o le Saogalemu o se tasi o auala e mafai ai ona ia faatulagaina o ia i tulaga tau tupe ao lei amataina se aiga.
E oo atu i le faaiuga o Ianuari, e ui i lea, ua feagai le Sosaiete o le Saogalemu ma se faafitauli. Ao taumafai ai Grandison Newell e faamama ese ana faaputuga tupe, sa lolomiina e nusipepa i le eria ni tala sa tau le talitonuina ai tagata i lona faamaoni. E pei o isi tagata i le atunuu, o nisi Au Paia sa manatu i fanua ma oloa, ma le faamoemoe e mauoa ai i se taumafaiga laitiiti. O isi na faatalale i le faia o peimeni na manaomia i a latou oloa. E lei umi, ae le toe taliaina e tagata faigaluega ma pisinisi i totonu ma autafa o Katelani ni pepa a le Sosaiete o le Saogalemu.28
I le fefe ai i le faatoilaloina, sa tapunia le tumau e Iosefa ma Sini le Sosaiete o le Saogalemu ma agai atu i se isi aai e taumafai e fai paaga ma se faletupe ua mautu iina.29 Ae o le vaivai o le amataga o le Sosaiete o le Saogalemu na luluina ai le faatuatua o le toatele o le Au Paia, ma iu ai ina latou fesiligia le taitaiga faaleagaga a le perofeta lea na faaosoina ai la latou tupe faagalueaiina.30
I le taimi ua tuanai, sa faaalia mai e le Alii tusitusiga paia e ala mai ia Iosefa, sa faigofie ai ona latou faatinoina le faatuatua faapea o ia o se Perofeta a le Atua. Ae ina ua foliga mai ua le faataunuuina faamatalaga a Iosefa na fai e uiga i le Sosaiete o le Saogalemu, ma ua amata ona mou atu a latou tupe e faagalueina, sa toatele le Au Paia na le mautonu ma faitioina Iosefa.
Sa faaauau pea ona talitonu Uilifoti o le a faamanuiaina le Sosaiete o le Saogalemu. Ina ua mavae ai le faipaaga o le perofeta ma se isi faletupe, sa ia toe foi i Katelani ma tali atu i tuuaiga a e na faitio ia te ia.31 Mulimuli ane, i le konafesi aoao a le Ekalesia, sa saunoa ai Iosefa i le Au Paia e faatatau i le mafuaaga e ala ai ona nono mai e le Ekalesia tupe ma faatu se faalapotopotoga e pei o le Sosaiete o le Saogalemu.
Na amata e le Au Paia le galuega o aso e gata ai i le mativa ma le le tagolima, na ia faamanatu atu ia te i latou, e ui i lea na faatonuina i latou e le Alii ia ositaulaga o latou taimi ma taleni e faapotopoto ai i Siona ma fausia se malumalu. O nei taumafaiga, e ui ina taugata, na taua mo le faaolataga o le fanau a le Atua.32 Ina ia tulei i luma le galuega a le Alii, sa tatau ai i taitai o le Ekalesia ona saili se auala e faatupeina ai.
E ui lava i lea, sa faanoanoa Iosefa i le aofai o tupe na latou aitalafu ai i tagata nonotupe. “O loo tatou nofoaitalafu ia te i latou, o le mea mautinoa lena,” na ia tautino ai, “ae toe lava o le taunuu mai o o tatou uso mai fafo ma a latou tupe.” Na ia talitonu afai e faapotopoto mai le Au Paia i Katelani ma ave o latou fanua mo le Alii, o le a fesoasoani tele lea e aveeseina ai le avega o aitalafu a le Ekalesia.33
Ao saunoa Iosefa, sa lagonaina e Uilifoti le mamana o ana upu. “E, pe ana mafai ona tatou manatua pea o ana upu,” na ia mafaufau ai, “ina ia tumau e faavavau ina ia tatou faia i o tatou olaga.” Sa ia mafaufau pe faapefea ona faalogo se tasi i le perofeta o saunoa ma masalosalo pea na valaauina o ia e le Atua.34
E ui i lea sa faaauau pea masalosaloga. E oo atu i le ogatotonu o Aperila, ua faateteleina le leaga o le tamaoaiga i Katelani ao feagai le atunuu i le faafitauli o le tulaga tautupe. O tausaga o nonoga tupe tetele sa faavaivaiina ai faletupe i Egelani ma le Iunaite Setete, ma faapopoleina ai le lautele ina nei pau le tamaoaiga. Sa ao e faletupe aitalafu, ma o nisi ua taofia atoa le tuuina atu o nonoga tupe. E lei umi ae sosolo le le toa mai i lea taulaga i lea taulaga ao tapunia faletupe, gau pisinisi, ma siitia le tulaga o le le faigaluega.35
I lenei tulaga o mea tautupe, sa itiiti ai se avanoa e tu ai se faalapotopotoga o tau faaola e pei o le Sosaiete o le Saogalemu a Katelani. Sa tau leai se mea a Iosefa e mafai ona faia e fofo ai le faafitauli, ae sa faigofie i nisi ona tuuaia o ia nai lo o le pau o le tamaoaiga o le atunuu.
E lei umi ae tulituli e tagata na nono mai ai tupe Iosefa ma Sini i taimi uma. O se tasi tamaloa na molia i laua mo se aitalafu e lei totogiina, ma na faia e Grandison Newell ni moliaga sese e faasagatau ia Iosefa, fai mai o le perofeta sa faufau ia te ia. I le aluga o aso taitasi, sa faatupuina le popole o le perofeta i taofia o ia pe fasiotia.36
Ua fai nei le faamau a Uilifoti ma Fipe, ma sa la talosaga ia Iosefa e faaipoipoina i laua. Ae i le aso o le la faaipoipoga, sa leai se mea e maua ai o ia, ma tuua ai loa Feterika Viliamu e faia le sauniga.37
E lei leva ona nimo faafuasei Iosefa, ae maua e Ema se tusi mai ia te ia, e faamautinoa mai ai o loo ia saogalemu.38 Sa la sosola ma Sini mai Katelani, ma faamamao ese mai ia i latou o mananao e lepetia i laua. O lo la nofoaga sa lilo, ae na iloa e Niueli Uitini ma Ailama le auala e faafesootai ai i laua ma fautuaina i laua mai se mea mamao.39
Sa malamalama Ema i le ogaoga o le tulaga o loo i ai Iosefa. Ina ua taunuu mai lana tusi, o nisi alii—e foliga o ni uo o Grandison Newell—sa iloiloina le faailogatusi, e taumafai e vaai po o fea o i ai o ia. O isi sa tilofia lana faleoloa tau atiae.
E ui sa tumau lona manatu mo le lelei, ae sa popole Ema i tamaiti. O le la atalii e tasi le tausaga, o Feterika, sa laitiiti tele e malamalama i le mea o loo tupu, ae o Julia e ono tausaga ma Iosefa e fa tausaga sa amata ona popole ina ua la iloa o le a le sau i le fale lo latou tama i se taimi lata mai.40
Sa iloa e Ema e tatau ona ia faalagolago i le Alii, aemaise lava lenei taimi i le toatele o tagata i Katelani ua amata ona masalosalo ma le talitonu. “Afai ua le toe iai sou faamoemoe i le Atua nai lo o nisi e mafai ona ou tolaulauina, o le a avea au ma se tulaga faanoanoa moni lava,” o le tusi atu lea a Ema ia Iosefa i le faaiuga o Aperila. “Ae ou te talitonu pea afai ta te faamaualalo i taua lava ma faatuatua i le mea e gata ai lo taua faatuatua, e laveaiina i taua mai mailei uma e ono faataatitia i o ta vae.”41
E ui lava i lea, sa ia popole nei faaaoga e le au nonotupe le toesea o Iosefa ma avanoa e sei ese ai soo se fanua po o ni tupe latou te mafaia. “E le mafai ona ou faia se mea,” o lana aue lea, “ao malosi atu ai le aia tatau a tagata uma i mea uma e taua o a oe nai lo o au.”
Sa sauni Ema mo ia e sau i le fale. Sa toaitiiti nai tagata sa ia faatuatuaina i lena taimi, ma sa ia musu e ave i se isi soo se mea e lei fesoasoani e totogi uma ai aitalafu a Iosefa. Ma e faaopoopo i le leaga o le tulaga, sa ia popole na aafia foi le la fanau i le misela.
“Ou te moomoo e mafai ona e i le fale ao mamai i latou,” o lana tusi lea. “E tatau ona e manatua i latou, aua latou te manatua uma oe.”42
I le totonugalemu o lenei vevesi, sa toe foi atu ai Pale ma Faafetai i Katelani mo le fanau mai o le la pepe. E pei ona valoia e Heber, sa fanauina e Faafetai se pepe tama, lea na la faaigoaina ia Pale. Ae sa ia mafatia tele i le taimi ao faatiga, ma sa ia maliu ai i ni nai itula mulimuli ane. I le le mafai ai ona ia tausia na o ia lona atalii faatoa fanau, sa tuu atu ai e Pale o ia i aao o se tina e mafai ona ia faafaileleina le pepe ae toe foi atu i Kanata. O iina sa ia amata ai ona fuafua se misiona i Egelani ma le fesoasoani a le Au Paia e pei o Iosefa Filitia, o le sa tusitusi e uiga i le talalelei toefuataiina i uo ma aiga i le isi itu o le vasa.43
Ina ua maea lana misiona i Kanata, sa toe foi Pale i Ohaio ma faaipoipo atu i se tina talavou ua maliu lona tane i Katelani e igoa ia Maria Ana Frost. Na ia mauaina foi se tusi mai ia Tomasi Marsh, o le peresitene o le Korama a le Toasefululua, na uunaia o ia e tolopo le misiona i Egelani seia uma ona fono aposetolo o se korama i lena taumafanafana i Katelani.44
Ao faatali Pale mo isi aposetolo ia potopoto mai, sa toe foi atu Iosefa ma Sini i Katelani ma taumafai e taulimaina a laua aitalafu ma faafilemu vevesi i le lotolotoi o le Au Paia.45
I ni nai aso na sosoo ai, sa asia ai e Sini ia Pale ma faiatu ia te ia ua ia alu atu e ao se aitalafu ua tea lona taimi e totogiina ai. I se taimi na muamua atu, sa nono ai e Iosefa le $2,000 ia Pale e faatau ai se fanua i Katelani. Ina ia faamama ana ia lava aitalafu, sa faatau ai loa e Iosefa le aitalafu a Parley i le Sosaiete o le Saogalemu, ma o lea la ua aoina e Sini le tupe.
Sa faiatu Pale ia Sini e le o i ai ia te ia le $2,000 ae sa ia ofo atu e toe faafoi le fanua e totogi ai. Sa fai atu Sini ia te ia e tatau foi ona tuu mai lona fale faatasi ma le fanua e faapaleni ai le aitalafu.46
Sa matuai ita lava Pale. I le taimi faatoa faatau atu ai e Iosefa ia te ia le fanua, sa ia fai ia Pale o le a le afaina o ia i le maliega. Ae faapefea le faamanuiaga a Heber Kimball sa folafola mai ai ia te ia oa e le mafaitaulia ma le saolotoga mai aitalafu? I lena taimi sa lagona ai e Pale e pei ua aveese e Iosefa ma Sini mea uma sa ia te ia. Afai ua leai sona fanua ma se fale, o le a le mea a lona aiga o le a fai?47
O le aso na sosoo ai, sa lafo ai e Pale se tusi ita ia Iosefa. “O lea la ua ou matuai talitonu o le faigatala sa ta faia e faatiapolo,” o lana tusi lea, “o lea ua tupu mai ai le pepelo, faavaleaina, ma le faaaogaina o tuaoi a isi.” Sa fai atu Pale ia Iosefa sa ia talitonu pea i le Tusi a Mamona ma le Mataupu Faavae ma Feagaiga, ae ua ia le malie i faatinoga a le perofeta.
Sa ia manao ia salamo Iosefa ma talia le fanua o se totogi mo le aitalafu. A le o lena, o le a ia ave loa i le tulafono.
“O le a noatia au e faia le mea tiga o le faaulu o le tagi e faasaga ia te oe,” o lana lapatai lea, “mo le ave faamalosi, manao fua, ma le faaaogaina o lou uso.”48
Ia Me 28, i ni nai aso talu ona lafo le tusi a Pale ia Iosefa, sa alu ai Uilifoti Uitilafi i le malumalu mo le sauniga o le Aso Sa. Ao faatuputupulaia le faatuiese i Katelani, sa tumau pea Uilifoti o se lagolago malosi a Iosefa. Ae o Warren Parrish, o le sa galulue soosoo tauau ma Iosefa mo ni tausaga, sa amata ona faifai i le perofeta mo lana matafaioi i le faaletonu tau tupe ma na vave ona avea ma se taitai o le au faatuiese.
Sa tatalo Uilifoti ia tafi ese atu le agaga o le finauga mai le Ekalesia.49 Ae o le a ia le nofo umi i Katelani e fesoasoani. Talu ai nei, na musuia ai o ia e ave le talalelei i motu o Fox, i tala ane o matafaga o le setete i matusasae o Maine, e latalata i le fale o matua o Fipe. Na ia faamoemoe o lana malaga atu iina, o le a ia maua ai le avanoa e aoao ai ona ia lava matua ma lona tuafafine laitiiti i le talalelei. O le a faatasi atu Fipe ma ia e feiloai i lona aiga ma ave atu o ia i tala atu i matu e feiloai i lona[Fipe] aiga.50
E pei o lona naunau e faatasia ma lona aiga, sa le mafai ona taofia le popole o Uilifoti ia Iosefa ma le tulaga o loo i ai le ekalesia i Katelani. Sa nofo ae i lalo i le malumalu, ma ia iloa atu Iosefa i le pulelaa. I le feagai ai ma le tele o le faatuiese, sa foliga faatoilaloina le perofeta. Sa leiloa lana fia afe o tala i le gau ai o le Sosaiete o le Saogalemu, e sili atu nai lo o se isi lava.51 Ma, e le pei o le toatele, sa ia le tuulafoaina le faalapotopotoga ina ua amata ona gau.
I le vaai mai ai i le faatasiga, sa puipui e Iosefa o ia mai e na tuuaia o ia, ma saunoa atu i le suafa o le Alii.
Ao faalogo Uilifoti, sa ia iloa ai sa ia Iosefa le mana ma le Agaga o le Atua. Sa ia lagona foi sa afio ifo ia Sini ma isi ao latou tutu ai ma molimau i le faamaoni o Iosefa.52 Ae lei tuua le sauniga, sa tu i luga Warren ma tuuaia Iosefa i luma o le faatasiga.
Sa momomo le fatu o Uilifoti ao ia faalogo i le tuuaiga. “Oi, Warren, Warren,” o lana tagi lea.53