“Uputomua,” Au Paia: O Le Tala o le Ekalesia a Iesu Keriso i Aso e Gata Ai, Voluma 1, O Le Tagavai o le Upumoni, 1815–1846 (2018)
“Uputomua,” Au Paia, Voluma 1
Uputomua
O tala moni e lelei ona faamatalaina e mafai ona uunaia, lapataia, faafiafia, ma faatonu ai. Na malamalama Polika Iaga i le mana o se tala lelei ina ua ia fautuaina tusitala o le talafaasolopito o le Ekalesia ia faia ia sili atu nai lo le faamaumauina na o mea moni lava ua tuanai. “Tusi i se auala faamatala,” na ia fautua atu ai ma “tusi na o le tasi vae sefulu lava,”1
O le vaega o loo mulimuli mai o se faamatalaga o le talafaasolopito ua mamanuina e tuuina atu ai i tagata faitau se malamalama autu o le talafaasolopito o le Ekalesia. O vaaiga uma lava, tagata, ma laina o talanoaga e faavae i punaoa o le talafaasolopito, o loo taua i le faaiuga o le tusi. O i latou e mananao e faitau i nei punaoa, ia malamalama atili i autu fesootai, ma iloaina nisi lava tala o le a mauaina fesootaiga i punaoa faaopoopo i le initoneti i le history.lds.org.
O le tusi muamua lenei o se talafaasolopito e fa-voluma o Le Ekalesia a Iesu Keriso o le Au Paia o Aso e Gata Ai. Ua faamatalaina faatasi, e voluma le tala o le Toefuataiga o le talalelei a Iesu Keriso mai uluai aso lava o le Ekalesia seia oo mai nei. Ua tusia i se auala matagofie lena e mafai ai ona maua e le Au Paia i le lalolagi atoa.
Na lolomiina e le Ekalesia ni talafaasolopito se lua e tele voluma i le taimi ua tuanai. O le tusi muamua o se faamatalaga o le talafaasolopito na amata e Iosefa Samita i le vaitaimi o le 1830 ma lolomiina i le amataga o le 1842. O le lona lua na tusia e le tusitala faasolopito lagolago o le Ekalesia o B. H. Roberts ma lolomiina i le 1930.2 O le oo atu o le talalelei toefuataiina i le lalolagi talu mai lena taimi, ma le poloaiga a le Alii ia tausia pea le talafaasolopito “mo le lelei o le ekalesia, ma mo tupulaga fai aʼe,”3 e faailo mai ai ua oo i le taimi e faalelei ai ma faaaofia ai nisi Au Paia i le tala.
E oo lava i le sili atu nai lo talafaasolopito talu ai, ua faamatalaina e le Au Paia olaga ma tala o alii ma tamaitai masani i le Ekalesia. Ua ia saunia foi se faamatalaga ma se vaaiga fou i ni tagata e sili atu le iloaina ma mea na tutupu mai le talafaasolopito o le Ekalesia. O le a fesoasoani mataupu taitasi i tagata faitau ina ia malamalama ma faafetaia le Au Paia o e na faia le Ekalesia e pei ona i ai i le aso. Ua lalagaina faatasi, o a latou tala ua fatuina se ie lalaga matagofie o le Toefuataiga.
O leAu Paia e le o se tusitusiga paia, ae e pei lava o tusitusiga paia, e aofia ai upumoni mamana ma tala o tagata e le atoatoa o loo taumafai ia avea ma ni Au Paia e ala i le Togiola a Iesu Keriso.4 O a latou tala—e pei o tala a isi Au Paia uma lava, i le tuanai ma le taimi nei—e faamanatu ai i tagata faitau le alofa mutimutivale tele o le Alii i Ona tagata ao latou aufaatasi i le lalolagi e faateleina le galuega a le Atua.