1 Ug nahitabo nga human ako, ang Ginoong Dios, mihingilin kanila, nga si Adan misugod sa pagtikad sa yuta, ug sa pagmando ibabaw sa tanang mananap sa kaumahan, ug sa pagkaon sa iyang pan pinaagi sa singot sa iyang agtang, ingon nga ako ang Ginoo misugo kaniya. Ug si Eva, usab, nga iyang asawa, naghago uban kaniya.

2 Ug si Adan nakigdulog sa iyang asawa, ug siya nanganak kaniya og mga anak nga lalaki ug mga anak nga babaye, ug nagsugod sila sa pagsanay ug sa pagpuno sa yuta.

3 Ug sukad nianang higayona, ang mga anak nga lalaki ug mga anak nga babaye ni Adan nagsugod sa pagminyoay diha sa yuta, ug sa pagtikad sa yuta, ug sa pag-atiman sa mga kahayopan, ug usab nanganak sila og mga anak nga lalaki ug mga anak nga babaye.

4 Ug si Adan ug si Eva, nga iyang asawa, mitawag sa ngalan sa Ginoo, ug nakadungog sila sa tingog sa Ginoo gikan sa agianan paingon sa Tanaman sa Eden, nga nagsulti ngadto kanila, ug wala sila makakita kaniya; kay sila gipahilayo gikan sa iyang atubangan.

5 Ug siya mihatag kanila og mga sugo, nga sila kinahanglan nga mosimba sa Ginoo nga ilang Dios, ug kinahanglan nga mohalad sa unang mga anak sa ilang mga kahayopan, isip halad ngadto sa Ginoo. Ug si Adan nagmasulundon sa mga sugo sa Ginoo.

6 Ug human sa daghang adlaw ang usa ka anghel sa Ginoo mipakita ni Adan, nga nag-ingon: Nganong naghalad ka og mga sakripisyo ngadto sa Ginoo? Ug si Adan miingon kaniya: Wala ako masayod, gawas nga ang Ginoo misugo kanako.

7 Ug unya ang anghel misulti, nga nag-ingon: Kini nga butang usa ka pagkasama sa sakripisyo sa Bugtong Anak sa Amahan, nga puno sa grasya ug kamatuoran.

8 Mao nga, buhaton mo ang tanan nga imong buhaton pinaagi sa ngalan sa Anak, ug ikaw maghinulsol ug motawag sa Dios pinaagi sa ngalan sa Anak hangtod sa kahangtoran.

9 Ug niana nga adlaw ang Espiritu Santo mikunsad ni Adan, nga nagpamatuod sa Amahan ug sa Anak, nga nag-ingon: Ako mao ang Bugtong Anak sa Amahan gikan sa sinugdanan, gikan karon ug sa kahangtoran, ingon nga ikaw napukan ikaw mahimong matubos, ug ang tanang katawhan, gani bisan kinsa nga magtinguha.

10 Ug niana nga adlaw si Adan mihimaya sa Dios ug natagbaw, ug misugod sa pagpanagna mahitungod sa tanang pamilya sa yuta, nga nag-ingon: Daygon ang ngalan sa Dios, kay tungod sa akong kalapasan ang akong mga mata nabuka, ug niini nga kinabuhi makabaton ako og kalipay, ug usab sa unod makakita ako sa Dios.

11 Ug si Eva, nga iyang asawa, nakadungog niining tanang butang ug nalipay, nga nag-ingon: Kon dili pa tungod sa atong kalapasan dili unta kita makaangkon og binhi, ug dili gayod masayod sa maayo ug sa daotan, ug sa kalipay sa atong katubsanan, ug sa kinabuhing dayon nga ihatag sa Dios ngadto sa tanang masulundon.

12 Ug si Adan ug si Eva mihimaya sa ngalan sa Dios, ug ang tanang butang ilang gipahibalo sa ilang mga anak nga lalaki ug sa ilang mga anak nga babaye.

13 Ug si Satanas miabot taliwala kanila, nag-ingon: Anak usab ako sa Dios; ug siya misugo kanila, nga nag-ingon: Ayaw pagtuo niini; ug wala sila motuo niini, ug gihigugma nila si Satanas labaw pa kaysa Dios. Ug ang mga tawo sukad nianang higayona nagsugod sa pagkakalibotanon, pagkamahilayon, ug pagkayawan-on.

14 Ug ang Ginoong Dios mitawag sa mga tawo pinaagi sa Espiritu Santo bisan asa ug misugo kanila nga sila kinahanglang maghinulsol;

15 Ug kutob sa mituo sa Anak, ug naghinulsol sa ilang mga sala, pagaluwason; ug kutob sa dili motuo ug dili maghinulsol, pagasilotan; ug ang mga pulong migula gikan sa ba-ba sa Dios pinaagi sa hugot nga balaod; mao nga kini kinahanglan gayod nga matuman.

16 Ug si Adan ug si Eva, nga iyang asawa, wala mohunong sa pagtawag sa Dios. Ug si Adan nakigdulog ni Eva nga iyang asawa, ug nanamkon siya ug nanganak ni Cain, ug miingon: Ako nakapanamkon og tawo gikan sa Ginoo; mao nga siya dili mahimong mosalikway sa iyang mga pulong. Apan tan-awa, si Cain wala maminaw, nga nag-ingon: Kinsa ang Ginoo nga kinahanglan man ako nga makaila kaniya?

17 Ug nanamkon na usab siya ug nanganak sa iyang igsoong lalaki nga si Abel. Ug si Abel naminaw sa tingog sa Ginoo. Ug si Abel usa ka magbalantay sa karnero, apan si Cain usa ka magtitikad sa yuta.

18 Ug si Cain nahigugma ni Satanas labaw pa kaysa Dios. Ug si Satanas misugo kaniya, nga nag-ingon: Paghimo og halad ngadto sa Ginoo.

19 Ug paglabay sa panahon nahitabo nga si Cain nagdala og bunga sa yuta isip halad ngadto sa Ginoo.

20 Ug si Abel, nagdala usab siya sa unang mga anak sa iyang kahayopan, ug sa tambok niana. Ug ang Ginoo adunay pagtahod ni Abel, ug sa iyang halad;

21 Apan kang Cain, ug sa iyang halad, siya walay pagtahod. Karon si Satanas nasayod niini, ug nakapahimuot kini kaniya. Ug hilabihan ang kasuko ni Cain, ug ang iyang panagway nahugno.

22 Ug ang Ginoo misulti ni Cain: Nganong nasuko ka? Nganong subo man ang imong panagway?

23 Kon magbuhat ka og maayo, ikaw pagadawaton. Ug kon dili ka magbuhat og maayo, ang sala nagahulat sa pultahan, ug si Satanas nagtinguha sa pag-angkon kanimo; ug gawas kon ikaw maminaw sa akong mga sugo, moluwas ako kanimo, ug mahitabo kini kanimo sumala sa iyang tinguha. Ug ikaw ang magmando kaniya;

24 Kay sukad niining higayona ikaw mahimong amahan sa iyang mga bakak; pagatawgon ikaw og Kapildihan; kay ikaw ingon usab niana sa wala pa ang kalibotan.

25 Ug kini igasulti sa panahon nga moabot—Nga kining mga pagkasalawayon nagsugod kang Cain; kay iyang gisalikway ang mahinungdanong tambag nga nadawat gikan sa Dios; ug mao kini ang tunglo nga akong ibutang diha kanimo, gawas kon ikaw maghinulsol.

26 Ug si Cain nasuko, ug wala na maminaw sa tingog sa Ginoo, ni ngadto kang Abel, nga iyang igsoon nga lalaki, nga naglakaw sa pagkabalaan sa atubangan sa Ginoo.

27 Ug si Adan ug ang iyang asawa nagbangotan sa atubangan sa Ginoo, tungod ni Cain ug sa iyang kaigsoonan.

28 Ug nahitabo nga si Cain mikuha sa usa sa mga anak nga babaye sa iyang mga igsoong lalaki aron pangasaw-on, ug gihigugma nila si Satanas nga labaw pa kaysa Dios.

29 Ug si Satanas misulti ni Cain: Panumpa ngari kanako pinaagi sa imong tutonlan, ug kon ikaw motug-an niini ikaw mamatay; ug papanumpaa ang imong kaigsoonan pinaagi sa ilang mga ulo, ug pinaagi sa buhi nga Dios, nga sila dili motug-an niini; kay kon sila motug-an niini, sila sa pagkatinuod mamatay; ug himoa kini aron ang imong amahan dili masayod niini; ug niini nga adlaw akong itugyan ang imong igsoon nga lalaki nga si Abel nganha sa imong mga kamot.

30 Ug si Satanas nanumpa ni Cain nga siya mobuhat sumala sa iyang mga sugo. Ug kining tanan nga butang gibuhat diha sa tago.

31 Ug si Cain miingon: Sa pagkatinuod ako si Mahan, ang agalon niining dako nga tinago, nga ako mopatay ug makaangkon og bahandi. Mao nga si Cain gitawag og Agalong Mahan, ug siya naghimaya sa iyang pagkadaotan.

32 Ug si Cain miadto sa kaumahan, ug si Cain nakigsulti ni Abel, nga iyang igsoong lalaki. Ug nahitabo nga samtang anaa sila didto sa kaumahan, si Cain midasmag ni Abel, iyang igsoong lalaki, ug mipatay kaniya.

33 Ug si Cain nalipay nianang iyang nabuhat, nga nag-ingon: Gawasnon na ako; segurado gayod nga ang mga kahayopan sa akong igsoong lalaki maangkon na nako.

34 Ug ang Ginoo miingon ngadto ni Cain: Hain si Abel, nga imong igsoon nga lalaki? Ug miingon siya: Wala ko masayod. Ako ba ang magbalantay sa akong igsoong lalaki?

35 Ug ang Ginoo miingon: Unsa ang imong gibuhat? Ang tingog sa dugo sa imong igsoong lalaki mituaw ngari kanako gikan sa yuta.

36 Ug karon ikaw pagatunglohon gikan sa yuta nga mibuka sa iyang ba-ba aron dawaton ang dugo sa imong igsoong lalaki gikan sa imong kamot.

37 Kon ikaw magtikad sa yuta dili na kini mohatag kanimo sa iyang abot. Ikaw mahimong usa ka laag ug usa ka latagaw diha sa yuta.

38 Ug si Cain miingon sa Ginoo: si Satanas mitental kanako tungod sa mga kahayopan sa akong igsoong lalaki. Ug nasuko usab ako; kay ang iyang halad imong gidawat ug dili ang akoa; ang akong silot labaw pa kaysa akong madaog.

39 Tan-awa ikaw mihingilin kanako niini nga adlaw gikan sa nawong sa Ginoo, ug gikan sa imong nawong ako pagatagoan; ug ako mahimong usa ka laag ug usa ka latagaw dinhi sa yuta; ug mahitabo, nga siya nga makakita kanako mopatay kanako, tungod sa akong pagkadaotan, kay kini nga mga butang dili matago sa Ginoo.

40 Ug ako ang Ginoo miingon kaniya: Si bisan kinsa nga mopatay kanimo, ang panimalos ipahamtang kaniya sa pito ka pilo. Ug ako ang Ginoo nagbutang og usa ka marka diha kang Cain, basin unya og kon kinsa ang makakita kaniya mopatay kaniya.

41 Ug si Cain gipahilayo gikan sa atubangan sa Ginoo, ug uban sa iyang asawa, ug daghan sa iyang kaigsoonan nagpuyo didto sa yuta sa Nod, sa silangan sa Eden.

42 Ug si Cain nakigdulog sa iyang asawa, ug nanamkon siya ug nanganak ni Enoch, nanganak usab siya og daghang anak nga lalaki ug mga anak nga babaye. Ug nagtukod siya og usa ka siyudad, ug iyang ginganlan ang siyudad sama sa ngalan sa iyang anak nga lalaki, nga si Enoch.

43 Ug ngadto ni Enoch natawo si Irad, ug ubang mga anak nga lalaki ug mga anak nga babaye. Ug gipanganak ni Irad si Mahujael, ug ubang mga anak nga lalaki ug mga anak nga babaye. Ug gipanganak ni Mahujael si Methusael, ug ubang mga anak nga lalaki ug mga anak nga babaye. Ug gipanganak ni Methusael si Lamech.

44 Ug si Lamech mikuha sa iyang kaugalingon og duha ka asawa; ang ngalan sa usa si Adah, ug ang ngalan sa lain si Zilla.

45 Ug gipanganak ni Adah si Jabal; siya ang amahan sa nagpuyo diha sa mga tolda, ug sila ang magbalantay sa mga baka; ug ang ngalan sa iyang igsoong lalaki mao si Jubal, nga mao ang amahan sa tanang naggunit sa alpa ug organo.

46 Ug si Zilla, iya usab nga gipanganak si Tubal Cain, usa ka tigtudlo sa tanang panday sa tumbaga ug puthaw. Ug ang igsoon nga babaye ni Tubal Cain ginganlan og Naamah.

47 Ug si Lamech miingon sa iyang mga asawa, nga si Adah ug si Zilla: Paminaw sa akong tingog, kamo nga mga asawa ni Lamech, paminaw sa akong isulti; kay nakapatay ako og usa ka tawo tungod sa pagsamad kanako, ug usa ka batan-on nga tawo tungod sa pagpasakit kanako.

48 Kon pito ka pilo ang pagpanimalos kang Cain, sa pagkatinuod ang kang Lamech kapitoan ug pito ka pilo;

49 Kay si Lamech nakasulod sa panumpa ngadto ni Satanas, sumala sa paagi ni Cain, diin nahimo siya nga si Agalong Mahan, ang agalon nianang dako nga tinago nga gihatag ngadto ni Cain pinaagi ni Satanas; ug si Irad, ang anak ni Enoch, sa pagkasayod sa ilang tinago, misugod sa pagtug-an niini ngadto sa mga anak nga lalaki ni Adan;

50 Mao nga si Lamech, kay nasuko, mipatay kaniya, dili sama ni Cain, sa iyang igsoong lalaki nga si Abel, aron makaangkon og bahandi, apan siya mipatay kaniya tungod sa gipanumpaan.

51 Kay, sukad sa mga adlaw ni Cain, adunay tinago nga kalihokan, ug ang ilang mga buhat anaa sa kangitngit, ug nailhan nila ang matag lalaki nga iyang igsoon.

52 Mao nga ang Ginoo mitunglo ni Lamech, ug sa iyang panimalay, ug nilang tanan nga nanumpa ni Satanas; kay wala sila maghupot sa mga sugo sa Dios, ug nakapasubo kini sa Dios, ug wala siya mangalagad ngadto kanila, ug ang ilang mga buhat mga salawayon, ug misugod sa pagkatap taliwala sa tanang anak nga lalaki sa mga tawo. Ug anaa kini taliwala sa mga anak nga lalaki sa mga tawo.

53 Ug taliwala sa mga anak nga babaye sa mga tawo kini nga mga butang wala hisgoti, tungod kay si Lamech nakasulti sa tinago ngadto sa iyang mga asawa, ug misukol sila batok kaniya, ug mipadayag niini nga mga butang sa lain nga nasod, ug walay mga kaluoy;

54 Mao nga si Lamech gisaway, ug gisalikway, ug wala moipon taliwala sa mga anak nga lalaki sa mga tawo, basin pa unya og siya mamatay.

55 Ug sa ingon niana ang mga buhat sa kangitngit misugod sa pagdaghan taliwala sa tanang anak nga lalaki sa mga tawo.

56 Ug ang Dios mitunglo sa yuta og hilabihan kapintas nga tunglo, ug nasuko sa daotan, uban sa tanang anak nga lalaki sa mga tawo nga iyang gibuhat;

57 Kay wala sila maminaw sa iyang tingog, ni motuo sa iyang Bugtong Anak, bisan kaniya nga iyang gipadayag nga moabot sa tunga-tunga sa panahon, nga giandam sa wala pa ang katukoran sa kalibotan.

58 Ug sa ingon niana ang Ebanghelyo gisugdan sa pagsangyaw, gikan sa sinugdanan, ingon nga gipadayag sa balaang mga anghel nga gipadala gikan sa atubangan sa Dios, ug pinaagi sa iyang kaugalingon nga tingog, ug pinaagi sa gasa sa Espiritu Santo.

59 Ug sa ingon niana ang tanang butang natugyan ngadto kang Adan, pinaagi sa balaan nga ordinansa, ug ang Ebanghelyo gisangyaw, ug usa ka balaod ang gipadala, nga kini kinahanglang maanaa sa kalibotan, hangtod sa kataposan niini; ug mao gayod kadto. Amen.