1 Լսեք, ով իմ եկեղեցո՛ւ երեցներ, և ականջ դրեք իմ խոսքին, և սովորեք ինձանից, թե որն է իմ կամքը ձեր վերաբերյալ և նաև այս հողի վերաբերյալ, ուր ուղարկել եմ ձեզ:

2 Քանզի ճշմարիտ ասում եմ ձեզ, որ օրհնված է նա, ով պահում է իմ պատվիրանները՝ կյանքում լինի, թե մահվան մեջ. և ով որ հավատարիմ է նեղության մեջ, նրա վարձքն ավելի մեծ է երկնքի արքայությունում:

3 Ներկայումս, դուք ձեր բնական աչքերով չեք կարող տեսնել ձեր Աստծո ծրագիրը, այն բաների վերաբերյալ, որոնք ապագայում տեղի են ունենալու, և փառքը, որը պիտի գա շատ նեղությունից հետո:

4 Քանզի շատ նեղությունից հետո գալիս են օրհնությունները: Ուստի գալիս է օրը, երբ դուք պիտի պսակվեք մեծ փառքով. դեռևս ժամը չէ, բայց մոտ է՝ առ ձեռն:

5 Հիշեք սա, որն ասում եմ ձեզ նախապես, որ կարողանաք այն սրտի մեջ դնել, և ընդունել այն, ինչը պիտի հետևի:

6 Ահա, ճշմարիտ ասում եմ ձեզ, որ այս նպատակով եմ ձեզ ուղարկել,– որ կարողանաք լինել հնազանդ, և որ ձեր սրտերը պատրաստ լինեն վկայություն բերելու այն բաների մասին, որոնք պիտի գան.

7 Եվ նաև, որ դուք պատիվ ունենաք հիմքը դնելու և վկայելու այն հողի մասին, որի վրա Աստծո Սիոնը պիտի կանգնի.

8 Եվ նաև, որ պարարտ բաներով մի խնջույք պատրաստվի աղքատների համար. այո, մի խնջույք՝ պարարտ բաներով, հին և մաքրված գինով, որպեսզի երկիրն իմանա, որ մարգարեների բերանները չեն խափանվելու.

9 Այո, Տիրոջ տան մի ընթրիք, լավ պատրաստված, որին բոլոր ազգերը պիտի հրավիրվեն:

10 Առաջինը՝ հարուստները և ուսյալները, իմաստուններն ու ազնվականները.

11 Իսկ դրանից հետո գալիս է իմ զորության օրը. այն ժամանակ, աղքատները, կաղերը, և կույրերը, և խուլերը պիտի ներս մտնեն Գառի հարսանիքը, և ճաշակեն Տիրոջ ընթրիքից, որ պատրաստվել է գալիք մեծ օրվա համար:

12 Ահա, ես՝ Տերս եմ ասել դա:

13 Եվ որպեսզի վկայությունը դուրս գա Սիոնից, այո՛, Աստծո ժառանգության քաղաքի բերանից,–

14 Այո, դրա համար եմ ես ձեզ ուղարկել այստեղ, և ընտրել իմ ծառա Էդվարդ Պատրիջին, և նշանակել նրան նրա առաքելությունն այս հողի վրա:

15 Բայց եթե նա չապաշխարի իր մեղքերից, որոնք են թերահավատությունն ու սրտի կուրությունը, թող նա զգուշանա՝ չլինի թե ընկնի:

16 Ահա, նրա առաքելությունը տրված է նրան, և այն չի տրվելու կրկին:

17 Եվ ով որ կանգնած է այս առաքելության մեջ, նշանակված է՝ լինելու դատավոր Իսրայելում, ճիշտ ինչպես հին օրերում, բաժանելու Աստծո ժառանգության հողերն իր զավակներին.

18 Եվ դատելու իր ժողովրդին արդարի վկայությամբ, և իր խորհրդականների օժանդակությամբ, համաձայն արքայության օրենքների, որոնք տրվել են Աստծո մարգարեների կողմից:

19 Քանզի ճշմարիտ ասում եմ քեզ, որ իմ օրենքը պիտի պահպանվի այս երկրի վրա:

20 Թող ոչ ոք չմտածի, թե ինքը կառավարիչ է. այլ թող Աստված կառավարի նրան, ով դատում է, ըստ իր կամքի խորհրդի, կամ, այլ խոսքով, նրան, ով խորհուրդ է տալիս կամ նստում է դատավորական աթոռին:

21 Թող ոչ ոք չխախտի երկրի օրենքները, քանզի նա, ով պահում է Աստծո օրենքները, պետք չէ որ խախտի երկրի օրենքները:

22 Ուստի, ենթարկվեք իշխանություններին, որոնք կան, մինչև որ թագավորի նա, ում իրավունքն է թագավորել, և բոլոր թշնամիներին հպատակեցնի իր ոտքերի տակ:

23 Ահա, օրենքները, որոնք դուք ստացաք իմ ձեռքից, եկեղեցու օրենքներն են, և այդ լույսի ներքո պիտի դուք պահեք դրանք: Ահա, այստեղ է իմաստությունը:

24 Եվ այժմ, ինչպես ես ասեցի իմ ծառա Էդվարդ Պատրիջի մասին, այս հողն է նրա բնակության հողը, և նրանց, ում նա նշանակել է իրեն խորհրդականներ լինելու. և նաև նրա բնակության հողը, ում ես նշանակել եմ պահպանելու իմ շտեմարանը.

25 Ուստի, թող նրանք բերեն իրենց ընտանիքներն այս հողը, ինչպես որ կխորհրդակցեն միմյանց և ինձ հետ:

26 Քանզի ահա, լավ չէ, որ ես պատվիրեմ բոլոր բաներում. քանզի ով հարկադրվում է բոլոր բաների մեջ, նա ծույլ է և իմաստուն ծառա չէ. ուստի նա վարձք չի ստանում:

27 Ճշմարիտ ասում եմ. Մարդիկ պետք է ջերմեռանդ ներգրավված լինեն բարի գործի մեջ, և շատ բաներ անեն իրենց իսկ ազատ կամքով, և շատ արդարություն գործեն.

28 Քանզի զորություն կա նրանց մեջ, որով նրանք գործակալն են իրենց կամքի: Եվ որքան որ մարդիկ բարիք գործեն, նրանք ոչ մի դեպքում չեն կորցնի իրենց վարձքը:

29 Բայց ով ոչինչ չի անում, մինչև նրան չեն պատվիրում, և ընդունում է պատվիրանը կասկածամիտ սրտով, և պահում է այն ծուլությամբ, նա նզովված է:

30 Ո՞վ եմ ես, որ արարեցի մարդուն, ասում է Տերը, որ անմեղ համարեմ նրան, որ չի հնազանդվում իմ պատվիրաններին:

31 Ո՞վ եմ ես, ասում է Տերը, որ խոստացել եմ և չեմ կատարել:

32 Ես պատվիրում եմ, և մարդիկ չեն հնազանդվում. ես չեղյալ եմ համարում, և նրանք չեն ստանում օրհնությունը:

33 Ապա նրանք ասում են իրենց սրտում. Սա Տիրոջ աշխատանքը չէ, քանզի նրա խոստումները չեն կատարվում: Սակայն, վա՜յ այդպիսիներին, քանզի նրանց վարձքը թաքնված է ներքևում, և վերևից չէ:

34 Իսկ այժմ, ես ձեզ լրացուցիչ ուղղություններ եմ տալիս այս երկրի վերաբերյալ:

35 Դա իմ իմաստությամբ է, որ իմ ծառա Մարտին Հարրիսը պետք է օրինակ լինի եկեղեցու համար՝ դնելով իր գումարը եկեղեցու եպիսկոպոսի առաջ:

36 Եվ նաև, սա օրենք է ամեն մարդու համար, որ գալիս է այս երկիր՝ ժառանգություն ստանալու համար. և նա պետք է իր դրամի հետ վարվի, ինչպես օրենքն է թելադրում:

37 Եվ նաև իմաստություն է այն, որ հողեր գնվեն Ինդիփենդենսում, շտեմարանի տեղի համար և նաև տպագրատան համար:

38 Եվ լրացուցիչ ուղղություններ, իմ ծառա Մարտին Հարրիսի վերաբերյալ, նրան կտրվեն Հոգու կողմից, որ նա կարողանա ստանալ իր ժառանգությունը, ինչպես բարի է համարում.

39 Եվ թող նա ապաշխարի իր մեղքերից, քանզի նա փնտրում է գովքն աշխարհի:

40 Եվ նաև, թող իմ ծառա Վիլյամ Վ. Ֆելփսը կանգնի այն պաշտոնում, որին նրան նշանակել եմ, և ստանա իր ժառանգությունն այս հողում.

41 Եվ բացի այդ, նա կարիք ունի ապաշխարելու, քանզի ես՝ Տերս, չեմ հավանում նրան, քանզի նա գերազանցություն է փնտրում և բավականաչափ հեզ չէ իմ առաջ:

42 Ահա, ով որ ապաշխարել է իր մեղքերից, նա ներվում է, և ես՝ Տերս, այլևս չեմ հիշում դրանք:

43 Այս բանով դուք կարող եք իմանալ, թե արդյոք մարդն ապաշխարում է իր մեղքերից,– ահա նա կխոստովանի և կթողնի դրանք:

44 Եվ արդ, ճշմարիտ, ես ասում եմ իմ եկեղեցու մնացած երեցների վերաբերյալ. ժամանակը դեռ չի եկել, և դեռ շատ տարիներ կան նրանց համար, որ ստանան իրենց ժառանգությունն այս հողում, բացառությամբ, եթե նրանք ցանկանան դա հավատքի աղոթքով, միայն եթե դա նրանց նշանակվի Տիրոջ կողմից:

45 Քանզի, ահա, նրանք պիտի մղեն մարդկանց՝ հավաքվել աշխարհի ծայրերից:

46 Ուստի, ժողովվեք միասին, և նրանք, ովքեր նշանակված չեն մնալու այս հողում, թող քարոզեն ավետարանը մերձակա շրջաններում. իսկ դրանից հետո, թող վերադառնան իրենց տները:

47 Թող ճանապարհին նրանք քարոզեն և վկայություն բերեն ճշմարտության մասին, բոլոր վայրերում, և ապաշխարելու կոչ անեն հարուստներին, բարձր և ցածր խավերին, և աղքատներին:

48 Եվ թող նրանք եկեղեցիներ հիմնեն, որքան որ երկրի բնակիչները կապաշխարեն:

49 Եվ թող մի գործակալ նշանակվի եկեղեցու ձայնով, Օհայոյի եկեղեցու համար, որ գումար վերցնի՝ Սիոնում հողեր գնելու համար:

50 Եվ ես իմ ծառա Սիդնի Ռիգդոնին տալիս եմ պատվիրան, որ նա պիտի գրի Սիոնի հողի նկարագրությունը, և մի հաղորդագրություն՝ Աստծո կամքի մասին, ինչպես նրան հայտնի կդարձվի Հոգու կողմից.

51 Եվ մի նամակ ու վկայագիր, որ ներկայացվի բոլոր եկեղեցիներին՝ գումար հայթայթելու համար, որպեսզի դրվի եպիսկոպոսի ձեռքում, իր կամ գործակալի ձեռքում, ինչպես ճիշտ կհամարի, կամ, ինչպես ինքը կհրահանգի, հողեր գնելու՝ Աստծո զավակների ժառանգության համար:

52 Քանզի, ահա, ճշմարիտ ասում եմ ձեզ. Տերը կամենում է, որ աշակերտներն ու մարդկանց զավակները բացեն իրենց սրտերը, այսինքն՝ երկրի այս ողջ շրջանը գնելու համար, այնքան շուտ, որքան ժամանակը կների:

53 Ահա, այստեղ է իմաստությունը: Թող նրանք անեն այդ, այլապես նրանք չեն ստանա ոչ մի ժառանգություն, բացի միայն արյուն թափելով:

54 Եվ բացի այդ, որքան որ հող է ձեռք բերվում, թող տարբեր տեսակի աշխատավորներ ուղարկվեն այդ հողը՝ աշխատելու Աստծո սրբերի համար:

55 Թող բոլոր այս բաներն արվեն կարգով, և թող, ժամանակ առ ժամանակ, եպիսկոպոսի կամ եկեղեցու գործակալի կողմից հայտնի դարձվեն հողի արտոնությունները:

56 Եվ թող հավաքման գործը չլինի հապճեպ, ոչ էլ փախուստով. այլ թող դա կատարվի, ինչպես խորհուրդ կտրվի եկեղեցու երեցների կողմից, համաժողովներում, այն գիտելիքի համաձայն, որը նրանք ժամանակ առ ժամանակ կստանան:

57 Եվ թող իմ ծառա Սիդնի Ռիգդոնը նվիրաբերի ու նվիրագործի այս հողը և տաճարի հողակտորը՝ Տիրոջ համար:

58 Եվ թող համաժողովի մի հավաք կանչվի. և դրանից հետո թող իմ ծառաներ Սիդնի Ռիգդոնը և Ջոզեֆ Սմիթ կրտսերը վերադառնան, և նաև Օլիվեր Քաուդերին նրանց հետ, ավարտելու համար գործի մնացած մասը, որը ես նրանց նշանակել եմ իրենց իսկ հողում, իսկ մնացածը, ինչպես կկառավարվի համաժողովների կողմից:

59 Եվ թող ոչ մի մարդ չվերադառնա այս հողից, մինչև նա ճանապարհին վկայություն չբերի այն բանի մասին, ինչ գիտի և ինչին ամենայն համոզվածությամբ հավատում է:

60 Թող այն, ինչ դրվել է Զիբա Պիտերսոնի վրա, վերցվի նրանից. և թող նա կանգնի որպես անդամ՝ եկեղեցում, և աշխատի իր սեփական ձեռքերով, եղբայրների հետ, մինչև որ նա բավականաչափ խրատվի բոլոր իր մեղքերի համար. քանզի նա չի խոստովանում դրանք, և նա մտածում է թաքցնել դրանք:

61 Թող այս եկեղեցու մնացած երեցները, որոնք գալիս են այս հողը, որոնցից ոմանք մեծապես օրհնվել են, նույնիսկ չափից շատ, նույնպես համաժողով անցկացնեն այս հողի վրա:

62 Եվ թող իմ ծառա Էդվարդ Պատրիջը ղեկավարի համաժողովը, որը պիտի անցկացվի նրանց կողմից:

63 Եվ թող նրանք նույնպես վերադառնան, ճանապարհին քարոզելով ավետարանը, վկայություն բերելով այն բաների մասին, որոնք բացահայտվել են իրենց համար:

64 Քանզի, ճշմարիտ, ձայնն առաջ պիտի գնա այստեղից դեպի ողջ աշխարհը, և դեպի երկրի ծայրամասերը,– ավետարանը պիտի քարոզվի ամեն արարածի, նշաններով, որոնք կհետևեն նրանց, ովքեր կհավատան:

65 Եվ ահա, Մարդու Որդին գալիս է: Ամեն: