1 Eo̧ron̄ eō, O kom̧ elder ro an Kabun̄ eo Aō, im letok lo̧jiln̄ōmi n̄an Aō naan, im ekkatak jān Eō ta ankilaō n̄an kom̧, im barāinwōt kōn āniin eo I ar jilkintok kom̧ n̄an e.

2 Bwe em̧ool Ij ba n̄an kom̧, em̧ōņōņō eo ej kōjparok kien ko Aō, men̄e ilo mour ak ilo mej; im eo ej kijenmej ilo en̄taan, wōņāān eo n̄an ejja in wōt eļapļo̧k ilo aelōn̄ in lan̄.

3 Kom̧ij jab maron̄ lo kōn mejān kanniōk ko mājāmi, bwe ilo iien in, karōk eo an ami Anij kōn men ko renaaj itok ālikin, im wōj eo enaaj itok ālikin eļap en̄taan.

4 Bwe ālikin eļap en̄taan ej itok jeraam̧m̧an ko. Kōn menin raan eo ej itok n̄e kom̧ naaj pālik kūrawūn in wōj eļap; awa eo ejjan̄in kiiō, ak ej epaaktok.

5 Keememej men in, eo I ar ba n̄an kom̧ m̧oktaļo̧k, bwe kom̧in maron̄ likūti ilo būruōmi, im bōk men eo ej itok ālikin.

6 Lo, em̧ool Ij ba n̄an kom̧, bwe kōn un in I ar jilkinļo̧k kom̧—bwe kom̧in pokake, im bwe būruōmi ren maron̄ pojak n̄an kwaļo̧k naan in kam̧ool kōn men ko rej itok;

7 Im barāinwōt bwe kom̧in maron̄ utiej ilo kalōk pedped eo, im ilo kwaļo̧k m̧ool eo kōn āneo me Zaion an Anij enaaj jutak ioon.

8 Im barāinwōt bwe kwōjkwōj in men ko rematōk en maron̄ pojak n̄an ro rej jeram̧ōl; aaet, juon kwōjkwōj in men ko rematōk, in wain ioon lūm ko em̧m̧an liklikier, bwe laļ en maron̄ jeļā ke lo̧n̄iin rikanaan ro rej jamin likjab;

9 Aaet, juon kejota an m̧weo im̧ōn Irooj, ekanooj polōmen, eo n̄an e aolep laļ naaj ruwainene.

10 M̧oktata, rim̧weiie im rijeļāļo̧kjeņ, eo rimālōtlōt im rirajimjim;

11 Im ālikin ej itok raan in kajoor eo Aō; innām rijeram̧ōl, riakā, im ripilo, im rijarron̄ron̄, renaaj itok ilo kwojkwoj in pālele eo an Lamb eo, im bōk m̧ōttan kōjota eo an Irooj, kar kōpooje n̄an raan eo eļap ej itok.

12 Lo, N̄a, Irooj, I ar ba men in.

13 Im bwe naan in kam̧ool eo e maron̄ ilo̧k jān Zaion, aaet, jān lo̧n̄in jikin kwelo̧k in jolōt eo an Anij—

14 Aaet, kōn un in I ar jilkintok kom̧ ijin, im kar kāālet eo karejera Edward Partridge, im kar jitōn̄ e n̄an mijen eo an ilo āniin.

15 A eļan̄n̄e ej jab ukeļo̧k jān jero̧wiwi ko an, ko rej jab tōmak im pilo in bōro, e en eo̧ron̄ men in n̄e eab wōtlo̧k.

16 Lo mijen eo an em̧ōj leļo̧k n̄an e, im jamin naaj bar leļo̧ke.

17 Im jabdewōt eo ej jutak ilo mijen in em̧ōj kāālet e bwe en juon riekajet ilo Israel, āinwōt kar ilo raan ko etto, n̄an ajeje āniin n̄an āneen jolōt in an Anij n̄an ro nejin;

18 Im n̄an ekajet armej ro An jān naan in kam̧ool eo an ro rejim̧we, im jān jipan̄ eo an rikōkapilōklōk ro an, ekkar n̄an kien ko an aelōn̄ eo ko rej litok jān rikanaan ro an Anij.

19 Bwe em̧ool Ij ba n̄an kom̧, kien eo Aō naaj kōjparoke ioon āniin.

20 En ejjeļo̧k armej ej ļōmņak e ej irooj; ak Anij en irooj ioon eo ej ekajet, ekkar n̄an kapilōk eo an ankilaan make, ak, ilo bar juon wāween ba, e eo ej kapilōk ak jijet ioon jea in ekajet eo.

21 En ejjeļo̧k armej ej rupi kien ko an āniin, bwe e eo ej kōjparok kien ko an Anij ejjeļo̧k an aikuj in rupi kien ko an āneo.

22 Kōn menin, kōttāik kom̧ n̄an ritōl ro iāneo, m̧ae iien eo E ej irooj eo ej an jim̧we n̄an irooj, im ej likūt aolep rikōjdat ium̧win neen.

23 Lo, kien ko kom̧ ar bōki jān Peiū rej kien ko an kabun̄ in, im ilo jekjek in kom̧ naaj kōjparoki. Lo, en̄in ej jeļāļo̧kjeņ.

24 Im kiiō, āinwōt I ar ekkōnono kōn eo karejera Edward Partridge, āniin ej āneen jokwe eo an, im āneen ro eaar jitōn̄ er an rikōkapilōklōk; im barāinwōt āneen jokwe eo an eo I ar jitōn̄ e n̄an kōjparok im̧ōn ko̧kkoņkoņ eo aō.

25 Kōn menin, ren bōktok baam̧le ko aer n̄an āniin, āinwōt ke renaaj bōk kapilōk ikōtaaer im N̄a.

26 Bwe lo, ejjab ekkar bwe In aikuj jiron̄ kom̧ ilo men otemjeļo̧k; bwe eo kipel e ilo men otemjeļo̧k, ejja in wōt ej karejeran eo ejowan im jajeļo̧kjeņ; kōn menin ej bōk ejjeļo̧k wōņāān.

27 Em̧ool Ij ba, armej reaikuj kanooj m̧ōņōņō in poub kōn tokjān, im kōm̧m̧an elōn̄ men ko kōn wōt anemkwōj in kāālet eo aer, im kwaļo̧k eļap em̧m̧an;

28 Bwe kajoor eo epād ilo er, eo kōn e rej ripinej jenkwaer make. Im toun wōt an armej kōm̧m̧an em̧m̧an rej jamin ilo jabdewōt wāween m̧wijkōk jān wōņāer.

29 Ak eo ej jab kōm̧m̧an jabdewōt m̧ae jiron̄ e, im bōk juon naan in jiron̄ kōn būruōn pere, im kōjparok e kōn jerwaan, ejja in wōt em̧ōj an jako.

30 Wōn N̄a eo ekar kōm̧anm̧an bwe armej, Irooj ej ba, im ba ejjeļo̧k ruōn eo ej jab pokake kien ko Aō?

31 Wōn N̄a, Irooj ej ba, bwe in kallim̧ur im jab kakūrm̧ool?

32 Ij jiron̄ im armej rej jab pokake; Ij kajejtokjān im rej jab bōk kōjeraam̧m̧an eo.

33 Innām rej ba ilo burueer: Men in ej jab jerbal an Irooj, bwe kallim̧ur ko An rej jab kūrm̧ool. Ak wo n̄an rein, bwe wōņāer ej jān kōppao ijo ilaļ, im jab jān ijo ilōn̄.

34 Im kiiō Ij lewōj n̄an kom̧ eļapļo̧k naan in tōl kōn āniin.

35 Ej mennin mālōtlōt ilo N̄a bwe eo rikarejera Martin Harris en juon waanjon̄ok n̄an kabun̄ in, ilo doori jāān ko an im̧aan bisop eo an kabun̄ in.

36 Im barāinwōt, en̄in ej kien eo n̄an jabdewōt armej eo ej itok n̄an āniin im bōk an jolōt; im enaaj kōm̧m̧an kōn jāān ko an ekkar n̄an ta kien eo ej kōmlet.

37 Im ebarāinwōt mennin mālōtlōt bwe en wōr jikin ko wiaiki ilo Independence, n̄an jikin im̧ōn ko̧kkoņkoņ eo, im barāinwōt n̄an im̧ōn kōm̧m̧an bok eo.

38 Im bar jet naan in tōl kōn rikarejera Martin Harris naaj leļo̧k n̄an e jān Jetōb, bwe en maron̄ bōk jikin jolōt eo an āinwōt em̧m̧an n̄an e;

39 Im en ukeļo̧k jān jero̧wiwi ko an, bwe ej kappukot nebar ko an laļ.

40 Im barāinwōt kōtļo̧k rikarejera William W. Phelps bwe en jutak ilo opij eo I ar jitōn̄ n̄an e, im bōk jikin jolōt eo an ilo āneo;

41 Im barāinwōt eaikuj in ukeļo̧k, bwe N̄a, Irooj, ej jab bun̄-buruō ippān, bwe ej kappukot n̄an bun̄bun̄, im e ej jab bwe an ettā im̧aō.

42 Lo, e eo em̧ōj an ukeļo̧k jen jero̧wiwi ko an, ejja in wōt ej bōk jeorļo̧k bōd, im N̄a, Irooj, ij jab bar keememeji.

43 Jān men in kom̧ maron̄ jeļā eļan̄n̄e juon armej ej ukeļo̧k jān jero̧wiwi ko an—lo, enaaj kwaļo̧ki im eļļo̧k jāni.

44 Im kiiō, em̧ool, Ij ba kōn bwe in elder ro an kabun̄ eo Aō, bwe iien eo ejjan̄in itok, ium̧win elōn̄ iiō ko, n̄an er n̄an bōk jikin jolōt ko aer ilo āniin, ijello̧kun wōt n̄e rej kōņaan bōk e kōn jar in tōmak, ilo wōt wāween eo naaj jitōn̄ n̄an er jān Irooj.

45 Bwe, lo, renaaj iuuntok armej ippān doon jān jabōn ko an laļ.

46 Kōn menin, kom̧in kuktok ippān doon; im ro kar jab jitōn̄ er n̄an pād ilo āniin, ren kwaļo̧k naan kōn gospel eo ilo jikin ko ipeļaakin ijin; im ālikin men in ren jepļaakļo̧k n̄an ijoko jikier.

47 Ren kwaļo̧k naan ilo iaļ eo ļo̧k, im kwaļo̧k naan in kam̧ool kōn m̧ool eo ilo jikin otemjej, im kūr n̄an ro rim̧weie, ro reutiej im ro rettā, im ro rijeram̧ōl n̄an ukeļo̧k.

48 Im ren ekkal kajutak jarlepju in rijar ko, toun wōt an ro ilaļ naaj ukeļo̧k.

49 Im en wōr juon ripinej jenkwan jitōn̄e jān ainikien kabun̄ in, n̄an kabun̄ eo ilo Ohio, n̄an bōk monni ko n̄an wiaiki wāto ko ilo Zaion.

50 Im Ij leļo̧k n̄an rikarejera Sidney Rigdon juon naan in jiron̄, bwe en jeje juon kōmmeļeļe in wāto eo an Zaion, im juon ennaan kōn ankilaan Anij, āinwōt naaj kwaļo̧k jān Jetōb n̄an e;

51 Im juon lōta im ellaajrak, n̄an jakeļo̧k im̧aan im̧ōn jar ko rej itōn bōk monni ko, n̄an likūt ilo pein bisop eo, ilo pein make ak ilo pein eo ej an rikōnono, ekkar n̄an wāween eo em̧m̧an n̄an e ak āinwōt e enaaj tōl, n̄an wiaiki wāto ko n̄an āneen jolōt n̄an ro nejin Anij.

52 Bwe, lo, em̧ool I ba n̄an kom̧, ej ankilaan Irooj bwe ro rikaļooran im ro nejin armej ren kōpeļļo̧k burueer, em̧ool n̄an wiaki aolepān peļaakin jikin in, ilo wōt iien eo naaj kaalikkare.

53 Lo, en̄in ej mālōtlōt. Ren kōm̧m̧ane men in n̄e jaab reban bōk aer āneen jolōt, ijello̧kun wōt n̄e ej kōn kōto̧o̧rļo̧k bōtōktōk.

54 Im bar juon alen, toun wōt an lōn̄ wāto bōke, en wōr rijerbal in jekjek otemjeļo̧k jilkinļo̧k n̄an i, n̄an jerbal n̄an ro rekwōjarjar an Anij.

55 Aolep men kein ren kōm̧m̧an ilo ekkar, im jeraam̧m̧an ko an āneo ren jeļā kaki jān iien n̄an iien, jān bisop eo ak eo riņa ainikien kabun̄ in.

56 Im kōm̧m̧an bwe jerbal in aintok eo en jab ilo kaiur, ak ilo jidimkij, ak en kōm̧m̧an āinwōt naaj kapilōk jān elder ro an kabun̄ in ilo kwelo̧k ko reļļap, ekkar n̄an jeļā eo rej bōk e jān iien n̄an iien.

57 Im rikarejera Sidney Rigdon en wūjlepļo̧k im ajeļo̧k bwidej in, im jikin eo n̄an tampeļ n̄an Irooj.

58 Im juon kwelo̧k en kōm̧m̧an, im ālikin men in ro rikarejera Sidney Rigdon im Josep Smith, Jun., ren ro̧o̧l, im barāinwōt Oliver Cowdery ippāer, n̄an kōtōprak bwe in jerbal in me I ar jitōn̄ n̄an erjeel ilo āne eo āneer make, im bwe eo āinwōt naaj karōk peeke jān kwelo̧k ko reļļap.

59 Im en ejjeļo̧k armej ej ro̧o̧l jān āniin ijello̧kun n̄e ej kwaļo̧k naan in kam̧ool ilo iaļ eo ļo̧k, kōn men ko ejeļā im kanooj tōmaki.

60 Kōm̧m̧an bwe men eo em̧ōj kar likūt ioon Ziba Peterson ren bōke jān e; im e en jutak āinwōt juon uwaan kabun̄ in, im jerbal kōn pein make, ippān ro jet uwaan kabun̄, m̧ae iien eo ebwe kauweiki kōn aolep jero̧wiwi ko an; bwe ej jab kwaļo̧ki, im ej ļōmņak in ņoji.

61 Kōm̧m̧an bwe bwein elder ro an kabun̄ in, ro rej itok n̄an āniin, ro im jet iaer rekanooj jeraam̧m̧an otem jeraam̧m̧an em̧ool eļap jān jon̄an, ren barāinwōt kōm̧m̧ane juon kwelo̧k ioon āniin.

62 Im kōm̧m̧an bwe rikarejera Edward Partridge en tōl kwelo̧k eo renaaj kōm̧m̧an e.

63 Im ren barāinwōt ro̧o̧l, kwaļo̧k naan ilo iaļ eo aer ļo̧k, kwaļo̧k naan in kam̧ool kōn men kein ko kwaļo̧ki n̄an er kōn revelesōn.

64 Bwe, lo, jilel eaikuj ilo̧k jān jikin in n̄an aolepān laļ, im n̄an m̧ōttan ko rettoļo̧ktata ilo laļ—gospel eo eaikuj kwaļo̧k n̄an mennin kōm̧anm̧an otemjej, kōn kakōļļe ko rej ļoorļo̧k ro rej tōmak.

65 Im lo eo Nejin Armej ej itok. Amen.