Chapit 52
Destriksyon Jaredit yo
Jaredit yo te grandi an kantite epi yo te vin rich. Yo te chwazi yon wa pou te dirije yo.
Anpil ane te pase, epi Jaredit yo te vin mechan. Senyè a te voye pwofèt pou te di yo pou yo repanti oubyen yo t ap detwi.
Moun yo pa t koute pwofèt yo. Yo te eseye touye yo.
Te gen lagè ak grangou nan peyi a. Anpil Jaredit te mouri.
Senyè a te voye yon lòt pwofèt, ki te rele Etè. Li te preche maten rive aswè, pou l te di Jaredit pou yo te kwè nan Bondye epi repanti.
Etè te di Jaredit yo si yo te kwè nan Bondye, yon jou yo t ap viv avèk Pè Selès la nan yon pi bon mond.
Etè te di Jaredit yo anpil bagay enpòtan, men yo pa t kwè li. Yo te fè l kite vil la.
Etè te kache nan yon twouwòch pandan lajounen pou yo pa t touye li. Aswè li te soti pou l te wè sa k tap pase avèk Jaredit yo.
Li te fin ekri istwa Jaredit yo pandan l te nan kache a.
Senyè a te voye Etè kote Koryantoumr, ki sete yon wa Jaredit mechan. Etè te di li pou l te repanti oubyen li t ap viv pou l te asiste lanmò tout pèp li a.
Koryantoumr ak pèp li a pa t repanti. Li te eseye fè touye Etè, men Etè te kouri epi l t al kache nan yon twouwòch.
Moun yo te sitèlman mechan ke Senyè a te modi peyi a. Yo pa t ka depoze zouti yo ak epe yo atè paske nan demen, tout t ap disparèt.
Tout Jaredit yo te batay nan lagè yo, enkli fi yo ak timoun yo. Koryantoumr te dirije yon lame epi yon mesye ki te rele Chiz te dirije yon lòt.
Koryantoumr ak Chiz sete de mesye mechan. Sentespri a te abandone Jaredit yo akoz mechanste yo. Satan te gen tout pouvwa sou yo.
Jaredit yo te goumen jiskaske Koryantoumr ak Chiz sete sèl moun ki te rete. Lè Chiz te pèdi konesans akoz li te pèdi twòp san, Konryantoumr te koupe tèt li.
Pwofesi Etè yo te akonpli: Koryantoumr sete dènye Jaredit ki te ret vivan. Pèp Zarayemla te jwenn ni.
Etè te fin ekri istwa Jaredit yo. Yo te detwi nèt akoz mechanste yo. Nefit yo te vin jwenn anal Jaredit yo nan apre.