Chapit 40
Samyèl, Lamanit la, pale de Jezikri
Samyèl, yon pwofèt Lamanit, te ale Zarayemla pou l te preche Nefit mechan yo. Li te di yo pou yo te repanti.
Nefit yo te mete Samyèl deyò nan vil la, epi l te kòmanse retounen al nan peyi li.
Men Senyè a te di Samyèl pou l te retounen Zarayemla epi di pèp la sa Bondye t ap mete nan kè li.
Nefit yo pa t kite Samyèl tounen antre nan vil la, konsa, li te grenpe sou tèt miray vil la epi l te kanpe la pou l te preche.
Li te pwofetize ke Nefit yo ta pral detwi nan 400 zan amwenske moun yo te repanti epi yo te vin gen lafwa nan Jezikri.
Samyèl te di Nefit yo ke Jezikri t ap vin pran nesans nan senkan epi li t ap sove tout moun ki kwè nan li.
Samyèl te pale yo konsènan siy nesans Jezi yo. Yon nouvo zetwal t ap parèt, epi nuit anvan nesans Jezi t ap fèt la pa t ap fènwa.
Samyèl te pale yo de siy sou lanmò Jezi yo. Ta pral gen twa jou fènwa total—solèy la, lalin nan, ak zetwal yo pa t ap briye.
Ta pral gen loraj ak zèklè ak tranblemandtè tou. Montay yo ta pral kraze, epi anpil vil ta pral detwi.
Kèk Nefit te kwè Samyèl epi yo te repanti pou peche yo. Yo t al jwenn Nefi, yon Nefit jis ki te kapab batize yo.
Rès Nefit yo pa t kwè Samyèl. Yo te voye wòch epi yo te lanse flèch kont li. Men Senyè a te pwoteje li, epi okenn nan wòch yo ni flèch yo pa t touche li.
Lè moun yo te wè yo pa t ka touche li, plis moun te vin kwè epi yo t al jwenn Nefi pou l te batize yo.
Nefi te anseye moun yo konsènan Jezi tou. Li te vle yo kwè nan Jezi, repanti, epi vin batize.
Men, pifò nan Nefit yo pa t kwè Samyèl. Yo te eseye kaptire li.
Samyèl te vole desann sou miray la epi l te kouri ale nan peyi li.
Samyèl te kòmanse anseye Lamanit yo. Yo pa t janm te tande pale de li ankò pami Nefit yo.