Chapit 42
Siy sou Krisifiksyon Kris la
Kounyea yo t ap siveye siy sou lanmò l yo; twa jou fènwa yo.
Kèk nan yo pa t kwè ke siy yo t ap parèt. Yo te diskite avèk moun ki te kwè yo.
Yon jou yon gwo tanpèt te leve. Te gen yon van terib.
Zeklè t ap flache, epi loray t ap souke tout tè a.
Vil Zarayemla a te pran dife. Vil Mowoni an te plonje antre anba lanmè a. Vil Mowoniya a te antere.
Yon tranblemandtè te sekwe tout tè a nèt. Wout prensipal yo te demoli, epi batiman yo te kraze. Anpil vil te detwi, epi anpil moun te mouri.
Tanpèt la ak tranblemandtè a te dire prèske twazèdtan.
Lè tanpèt ak tranblemandtè a te sispann, yon fènwa epè te kouvri peyi a. Pa t gen limyè okenn kote. Moun yo te ka menm santi fènwa a.
Fènwa a te dire twa jou. Balèn pa t ka limen, epi moun yo pa t ka wè solèy, lalin, ni zetwal yo.
Moun yo te rele akoz fènwa a, destriksyon an, ak lanmò. Yo te regrèt paske yo pa t repanti pou peche yo.
Apresa moun yo te tande vwa Jezikri.
Jezi te pale yo de destriksyon terib ki te fèt nan peyi a. Li te di yo ke moun pi mechan yo te mouri.
Li te di yo ke moun ki pa t mouri yo te bezwen repanti. Si yo te fè sa epi yo te vinn jwenn ni, li t ap beni yo.
Moun yo te sitèlman sezi lè yo te tande vwa a ke yo te sispann rele. Tout bagay te fè silans pandan plizyè èdtan.
Apresa Jezi te pale ankò, pou l te di ke l te souvan eseye ede moun yo. Si yo te vle repanti kounyea, yo te ka toujou tounen vin jwenn ni.
Apre twa jou, fènwa a te disparèt. Moun yo te rejwi epi yo te remèsye Senyè a ak lajwa.